ក្រសួងវប្បធម៌ និងវិចិត្រសិល្បៈបានស្នើសុំឲ្យលោកនាយករដ្ឋមន្ត្រី ហ៊ុន សែន ផ្ដល់គ្រឿងឥស្សរិយយសដល់មន្ត្រីនគរបាលចំនួន១៤រូប ដែលបានចូលរួមរកឃើញមកវិញនូវព្រះសុវណ្ណកោដ្ឋតម្កល់ព្រះបរមសារីរិកធាតុដែលត្រូវបានលួចពីភ្នំឧដុង្គកាលពីខែធ្នូ។
នៅក្នុងលិខិតចុះថ្ងៃទី២៤ ខែតុលា លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានស្នើសុំឲ្យផ្ដល់គ្រឿងឥស្សរិយយសដល់មន្ត្រីនគរបាលចំពោះការស៊ើបអង្កេតព្រះបរមសារីរិកធាតុដែលត្រូវបានចោរលួចនោះ។
លិខិតដដែលនេះមានខ្លឹមសារថា ” នាងខ្ញុំមានកិត្តិយសដ៏ខ្ពង់ខ្ពស់សូមគោរពជម្រាបជូនសម្ដេចអគ្គមហាសេនាបតីតេជោ ហ៊ុន សែន មេត្តាជ្រាបថា ដោយមានការខិតខំយកចិត្តទុកដាក់ពីថ្នាក់ដឹកនាំនិងមន្ត្រីនគរបាលទើបធ្វើឲ្យរកឃើញមកវិញនូវព្រះសុវណ្ណកោដ្ឋតម្កល់ព្រះរមសារីរិកធាតុនិងព្រះពុទ្ធប្បដិមានៅភ្នំព្រះរាជទ្រព្យ ដែលបានបាត់កាលពីថ្ងៃទី១០ ខែធ្នូ ឆ្នាំ២០១៣…សូមសម្ដេចមេត្តាផ្ដល់នូវគ្រឿងឥស្សរិយយសជូនថ្នាក់ដឹកនាំ និងមន្ត្រីនគរបាលជាតិចំនួន១៤រូប”។
ក្នុងចំណោមមន្ត្រីនគរបាលទាំង១៤រូប គឺលោក នេត សាវឿន អគ្គស្នងការនគរបាលជាតិ និងលោកឧត្តមសេនីយ៍ឯក កង សុខន អគ្គស្នងការរងនគរបាលជាតិ និងលោកឧត្ដមសេនីយ៍ឯក ម៉ក់ ជីតូ ប្រធាននាយកដ្ឋានកណ្ដាលនគរបាលយុត្តិធម៌ក្រសួងមហាផ្ទៃ។ លោកទាំងបីត្រូវបានស្នើសុំផ្តល់គ្រឿងឥស្សរិយយស “ឯករាជ្យជាតិ”។
ព្រះបរមសារីរិកធាតុនេះត្រូវបានប្រទេសស្រីលង្កាផ្ដល់មកឲ្យប្រទេសកម្ពុជាក្នុងឆ្នាំ២០០២។ ការលួចព្រះបរមសារីរិកធាតុបានធ្វើឲ្យមានកំហឹងទូទាំងប្រទេស ជាពិសេសក្នុងចំណោមពុទ្ធបរិស័ទ ដែលបានចោទរដ្ឋាភិបាលថា មិនបានប្រឹងប្រែងស្វែងរកព្រះបរមសារីរិកធាតុមកវិញឡើយ។
ក្រោយមកនគរបាលបានចាប់ខ្លួន និងចោទប្រកាន់សន្តិសុខបីនាក់យាមព្រះសក្យមុនីចេតិយ គឺឈ្មោះ ចម ថៃ អាយុ៥៧ឆ្នាំ សៀង សារិន អាយុ៥៨ឆ្នាំ និង កា សាក់ អាយុ៤៦ឆ្នាំជាប្រធានសន្តិសុខ ផា សុខែម អាយុ៥៩ឆ្នាំ និង កាន់ សុភ័ក្ត្រ អាយុ៣៩ឆ្នាំ ជាអ្នករត់ម៉ូតូឌុប។
កាលពីខែកុម្ភៈ កែវ រស្មី អាយុ២៤ឆ្នាំត្រូវបានចាប់ខ្លួន និងចោទប្រកាន់ពីបទចោរកម្ម បន្ទាប់ពីព្រះបរមសារីរិកធាតុ និងព្រះសុវណ្ណកោដ្ឋត្រូវបានរកឃើញនៅក្នុងផ្ទះបាយរបស់ខ្លួនក្នុងខេត្តតាកែវ។ ក្រោយមកជននេះបានសារភាពចំពោះបទឧក្រិដ្ឋនេះ។
លោក លឹម សុគន្ថា ចៅក្រមស៊ើបសួរសាលាដំបូងខេត្តកណ្ដាលបានមានប្រសាសន៍កាលពីម្សិលមិញថា ការសម្រេចថា តើត្រូវដោះលែងអ្នកទាំងប្រាំនាក់ ឬបញ្ជូនករណីនេះទៅតុលាការឬយ៉ាងណានោះនឹងធ្វើឡើងនៅថ្ងៃសុក្រ។
សៀង ចំរើន កូនស្រីរបស់លោក ណារិន បាននិយាយថា ឪពុករបស់នាងគ្មានកំហុសទេ។ នាងបាននិយាយថា “ប្រសិនបើតុលាការមិនដោះលែងគាត់ទេ ខ្ញុំនឹងធ្វើការតវ៉ានៅមុខតុលាការសុំឲ្យដោះលែងគាត់”។ នាងបានបន្ថែមថា “ខ្ញុំសូមស្នើឲ្យព្រះមហាក្សត្រ សីហមុនី និងសម្ដេច ហ៊ុន សែន ធ្វើអន្តរាគមន៍ដោះលែងពួកគាត់ ពីព្រោះពួកគាត់គ្មានកំហុសទេ”។
ទន្ទឹមនឹងនោះដែរ លោក ម៉ក់ ជីតូ បានស្វាគមន៍ព័ត៌មាននៃការផ្តល់គ្រឿងឥស្សរិយយស ហើយបានរិះគន់ជនសង្ស័យទាំងនោះ។ លោកបានមានប្រសាសន៍ថា ” ខ្ញុំគិតថា តុលាការអាចដោះលែងពួកគេ ប៉ុន្តែអាស្រ័យលើភ័ស្តុតាង ពីព្រោះសន្តិសុខខ្លះមានការធ្វេសប្រហែសក្នុងពេលបំពេញការងារ ហើយខ្លះទៀតបានយកព្រះពុទ្ធប្បដិមាទៅទុកនៅផ្ទះរបស់ខ្លួន”៕ សារុន