កម្មករប្រហែល៥.០០០នាក់មកពីរោងចក្រកាត់ដេរ Grand Twins International (GTI) នៅក្នុងរាជធានីភ្នំពេញ ដែលបានធ្វើកូដកម្មទាមទារដំឡើងប្រាក់ឈ្នួល និងលក្ខខណ្ឌការងារ បានត្រឡប់ចូលធ្វើការវិញកាលពីថ្ងៃព្រហស្បតិ៍ គោរពតាមដីកាបង្គាប់របស់តុលាការ ប៉ុន្តែបានតវ៉ានៅថ្ងៃបន្ទាប់ក្រោយពីមានពាក្យចចាមអារ៉ាមថា មេដឹកនាំសហជីពពីររូបបានប្រាក់ដែលក្រុមហ៊ុនឲ្យសម្រាប់ចែកកម្មករ ដាក់ហោប៉ៅខ្លួនឯង។
កម្មករនៅរោងចក្រកាត់ដេររបស់ចិនតៃវ៉ាន់ ក្នុងខណ្ឌពោធិ៍សែនជ័យ ដែលស្ថិតក្នុងចំណោមក្រុមហ៊ុនតែពីរគត់ដែលបានចុះបញ្ជីនៅផ្សារមូលបត្រកម្ពុជា បានត្រឡប់ចូលធ្វើការវិញកាលពីថ្ងៃព្រហស្បតិ៍ តាមដីកាបង្គាប់របស់សាលាដំបូងរាជធានី ហើយពួកគេនឹងត្រូវមានទោសចំពោះការប្រព្រឹត្តខុសធ្ងន់ធ្ងរ ប្រសិនបើពួកគេធ្វើកូដកម្មតទៅទៀត នេះបើយោងតាមឯកសារមួយរបស់ក្រុមហ៊ុន ដែលបានលោតនៅលើផ្សារមូលបត្រកម្ពុជានៅក្នុងថ្ងៃដដែលនេះ។ ឯកសារនេះបញ្ជាក់ថា “GTI សូមប្រកាសថា កម្មករ និងនិយោជិតបានត្រឡប់ចូលធ្វើការធម្មតាវិញហើយ”។
ប៉ុន្តែបន្ទាប់ពីមានពាក្យចចាមអារ៉ាមថា តំណាងសហជីពពីររូបបានលួចប្រាក់២០.០០០ដុល្លារដែលក្រុមហ៊ុនបានឲ្យពួកគេចែកចាយក្នុងចំណោមអ្នកតវ៉ា ដើម្បីឲ្យពួកគេចូលធ្វើការវិញ កម្មករទាំងនេះក៏បានសម្រេចចិត្តធ្វើកូដកម្មតទៅទៀត នេះបើយោងតាមការលើកឡើងរបស់លោក គឹម ណាហួ ប្រធានសហព័ន្ធសហជីពសំឡេងកម្មករកម្ពុជា ជាសហជីពមួយក្នុងចំណោមសហជីពដែលបានរៀបចំកូដកម្មនេះ។
លោក គឹម ណាហួ បានមានប្រសាសន៍ទៀតថា អំឡុងពេលចរចាកាលពីម្សិលមិញ អ្នកគ្រប់គ្រងរោងចក្របានបដិសេធពាក្យចចាមអារ៉ាមនេះ ដោយលើកឡើងថា មិនធ្លាប់មានការដោះដូរប្រាក់ទនោះទេ។ លោកមានប្រសាសន៍បន្តថា ” តំណាងរោងចក្របានសរសេរលិខិតមួយដើម្បីបញ្ជាក់ថា ពួកគេ [រោងចក្រ] មិនបានឲ្យប្រាក់មកសហជីពទេ ហើយសហជីពក៏មិនបានយកប្រាក់ពីពួកគេដែរ”។
លោកបានលើកឡើងទៀតថា ការចរចាជុំវិញការទាមទារលើកមុនរបស់កម្មករបានបរាជ័យ។ លោក នួន នី ប្រធានសហព័ន្ធសហជីពគាំទ្រកម្មករកម្ពុជា ជាសហជីពមួយទៀតដែលបានរៀបចំកូដកម្មនេះបានមានប្រសាសន៍កាលពីម្សិលមិញថា កម្មករនឹងបន្តធ្វើការតវ៉ា ពីព្រោះក្រុមហ៊ុនបានផ្ដល់សម្បទានតិចតួចប៉ុណ្ណោះ។
លោកបានមានប្រសាសន៍ថា “ក្រុមហ៊ុននឹងឈប់បង្ខំឲ្យកម្មករបោកសម្លៀកបំពាក់ និងភួយរបស់អ្នកគ្រប់គ្រងជនជាតិចិន ដែលនឹងលែងជេរប្រទេចកម្មករ ហើយចង្អុលមុខពួកគេនៅពេលពួកគេធ្វើខុសបន្តិចបន្តួចទៀតហើយ”។
លោក ស្រា៊ គឹមយូ មេធាវីតំណាងឲ្យរោងចក្រ Grand Twins បានមានប្រសាសន៍កាលពីម្សិលមិញថា ក្រុមហ៊ុននឹងពិចារណាចាត់វិធានការផ្លូវច្បាប់ ប្រសិនបើកម្មករបន្តប្រឆាំងដីកាបង្គាប់របស់តុលាការ៕ សុខុម