លោក ឡុង ឌីម៉ង់ អ្នកនាំពាក្យសាលាក្រុងបានបញ្ជាក់ថា ប៉ូលិសបានចាប់ខ្លួនសកម្មជនប្រឆាំងការបណ្តេញចេញចំនួន៧នាក់នៅព្រឹកថ្ងៃច័ន្ទនេះក្នុងក្រុងភ្នំពេញ ពេលមានការតវ៉ាមួយប្រឆាំងនឹងការធ្វើឲ្យជន់លិចតំបន់បឹងកក់។
សកម្មជនប្រហែល២០នាក់បានអូសគ្រែមកដាក់លើមហាវិថីមុនីវង្សនៅមុខសាលាក្រុង ដើម្បីទាមទារឲ្យសាលាក្រុងបូមបង្ហូរទឹកជំនន់ចេញជាបន្ទាន់។ ក្រុមសកម្មជនបានប្រវាយប្រតប់ជាមួយសន្តិសុខខណ្ឌអស់រយៈពេលប្រហែលកន្លះម៉ោង បន្ទាប់ពីកម្លាំងសន្តិសុខបានអូសគ្រែនោះចេញពីផ្លូវ ហើយបំផ្លាញគ្រែនោះចោល។
ក្រោយមក អ្នកតវ៉ាបានចាកចេញពីផ្លូវ ហើយបានបន្តការតវ៉ានៅមុខសាលាក្រុង ក្នុងពេលនោះ ពួកគេ៧នាក់ រួមទាំងអ្នកស្រី ទេព វន្នី ជាសកម្មជនល្បីឈ្មោះ ត្រូវបានឃាត់ខ្លួន។
លោក ឌីម៉ង់ បានឲ្យដឹងថា “យើងបានឃាត់ខ្លួនមនុស្ស៧នាក់ដែលបានរំលោភច្បាប់ ដោយបិទផ្លូវសាធារណៈ។ យើងបានបញ្ជូនពួកគេទៅឲ្យប៉ូលិសក្រុង…ហើយប៉ូលិសនឹងធ្វើរបាយការណ៍”។
ក៏ប៉ុន្តែ លោក ជួន ណារិន ស្នងការរងក្រុងភ្នំពេញ បាននិយាយថា អ្នកតវ៉ាទាំងនោះស្ថិតនៅកន្លែងឃុំខ្លួនរបស់ប៉ូលិសចរាចរណ៍។ លោកបាននិយាយថា “អ្នកទាំងនោះត្រូវបានឃាត់ខ្លួនព្រោះបានបិទផ្លូវ ហើយត្រូវគេបញ្ជូនទៅការិយាល័យប៉ូលិសចរាចរណ៍”។
លោក ចេវ ហាក់ ប្រធានការិយាល័យចរាចរណ៍ផ្លូវគោក បានបដិសេធមិនធ្វើអត្ថាធិប្បាយទេ។
អ្នកភូមិបឹងកក់និយាយថា ការជន់លិចភូមិម្ករបស់ខ្លួន ដែលបណ្តាលឲ្យផ្ទះសំបែងលិចដោយទឹកសម្អុយនិងសំរាមស្កេកស្កះ នារដូវវស្សា ដែលបានចាប់ផ្តើមតាំងពីឆ្នាំ២០០៨មកម៉្លេះ គឺនៅពេលដែលក្រុមហ៊ុនរបស់លោក ឡៅ ម៉េងឃិន ឈ្មោះស៊ូកាគុ បានបូមខ្សាច់លុបបឹងនេះ ដើម្បីសាងសង់អគារទំនើបស្កឹមស្កៃ៕មានិត