លោក អិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍នៅព្រឹកថ្ងៃពុធថា លោកនឹងឲ្យសេចក្តីយល់ព្រមលើប្រាក់ខែ១២៣ដុល្លារ ជាប្រាក់ខែអប្បបរមាថ្មីក្នុងវិស័យកាត់ដេរ ចូលជាធរមាននៅខែមករា ហើយថា រដ្ឋាភិបាលនឹងធ្វើសេចក្តីសម្រេចចុងក្រោយអំពីប្រាក់ខែថ្មីនេះនៅថ្ងៃនេះ។
លោករដ្ឋមន្ត្រីបានថ្លែងទៅកាន់អ្នកយកព័ត៌មានបន្ទាប់ពីការបោះឆ្នោតដោយគណៈកម្មការប្រឹក្សាការងារ (LAC) ដែលក្នុងការបោះឆ្នោតនោះ តួលេខនេះបានទទួលការគាំទ្រភាគច្រើនពីខាងរដ្ឋាភិបាល រោងចក្រ និងតំណាងសហជីព ដែលមានសមាជិក២៨រូប ។
លោក សំហេង បានមានប្រសាសន៍ថា “ក្នុងការប្រជុំ យើងសម្រេចដោយសំឡេង១៦ភាគច្រើនក្នុងចំណោម២៥សំឡេង ដើម្បីអនុវត្តយក[ប្រាក់ខែគោល]១២៣ដុល្លារនៅឆ្នាំ២០១៥។ ល្ងាចនេះ ប្រាក់ខែគោលនេះនឹងត្រូវប្រកាសជាផ្លូវការ”។
គណៈកម្មការប្រឹក្សាការងារមានតំណាងមកពីរដ្ឋាភិបាល១៤រូប តំណាងរោងចក្រ៧រូប និងមេដឹកនាំសហជីព៧រូប។ យោងតាមមេដឹកនាំសហជីព ជួន មុំថុល ដែលស្ថិតក្នុងគណៈកម្មការនេះបានឲ្យដឹងថា តំណាងរដ្ឋាភិបាល៣រូបអវត្តមាន។
តួលេខចំនួន៣ស្ថិតក្រោមការពិចារណាដោយគណៈកម្មការប្រឹក្សាការងារកាលពីថ្ងៃពុធគឺ១១០ដុល្លារស្នើដោយម្ចាស់រោងចក្រ ១២៣ដុល្លារស្នើដោយរដ្ឋាភិបាល និង១៤០ដុល្លារស្នើដោយសហជីព។ សមាជិក២រូបបានបោះឆ្នោតយកតួលេខ១៤០ដុល្លារ រីឯ៧នាក់ផ្សេងទៀតយកតួលេខ១១០ដុល្លារ។មានិត