ក្រុមមន្ត្រីបាននិយាយកាលពីម្សិលមិញថា មនុស្សប្រាំមួយនាក់បានស្លាប់នៅក្នុងភូមិមួយក្នុងខេត្តក្រចេះ រយៈពេលពីរសប្ដាហ៍មុនបន្ទាប់ពីផឹកស្រាសដែលអាជ្ញាធរមូលដ្ឋានសង្ស័យថា មានជាតិពុល។
ការស្លាប់ដំបូងកើតឡើងកាលពីថ្ងៃទី១៤ ខែវិច្ឆិកា នៅពេលនោះលោក ឱ រ៉េន អាយុ៥២ឆ្នាំបានស្លាប់នៅផ្ទះរបស់គាត់ក្នុងឃុំតាម៉ៅ ស្រុកព្រែកប្រសព្វ បន្ទាប់ពីបានផឹកស្រាសដែលបិតក្នុងមូលដ្ឋាន។ មនុស្សប្រាំនាក់ទៀតបានស្លាប់ចន្លោះពេលនោះ និងថ្ងៃទី២២ ខែវិច្ឆិកា រួមទាំងប្រពន្ធរបស់អ្នកបិតស្រាម្នាក់ផង។
លោក អេង ចំណាត សមាជិកក្រុមប្រឹក្សាឃុំបានមានប្រសាសន៍ថា ជនរងគ្រោះមានអាការដូចជា ឈឺក្បាល ក្អួតចង្អោរ និងចេះតែថប់ដង្ហើមមួយថ្ងៃបន្ទាប់ពីផឹកស្រារួច។ លោកបានមានប្រសាសន៍ថា “មុនពេលពួកគេស្លាប់ ជនរងគ្រោះទាំងអស់សុទ្ធតែមានសុខភាពល្អ។ យើងសន្និដ្ឋានថា ពួកគេស្លាប់ដោយសារផឹកស្រាសនេះឯង ប៉ុន្តែយើងមិនទាន់ប្រាកដនៅឡើយទេ ពីព្រោះមិនមានអ្វីកើតឡើងឡើយនៅពេលពួកគេផឹកស្រាពីមុនមក”។
លោក ឆេង ហុង ប្រធានមន្ទីរពេទ្យបង្អែកខេត្តក្រចេះបានមានប្រសាសន៍ថា មន្ត្រីមួយក្រុមមកពីមន្ទីរសុខាភិបាលខេត្តបានទៅកន្លែងនោះកាលពីសប្ដាហ៍មុន ដើម្បីធ្វើតេស្តស្រាសនោះ។ លោកបានបន្ថែមថា ទោះយ៉ាងណា យើងមិនអាចឆ្លើយសំណួរ ណាមួយបានឡើយ ពីព្រោះលទ្ធផលនៃការធ្វើតេស្តមិនទាន់ដឹងនៅឡើយ”។
លោក អ៊ុំ ភី ស្នងការរងនគរបាលខេត្តបានមានប្រសាសន៍ថា លោកបានបញ្ជាឲ្យអ្នកបិតស្រាស និងអ្នកលក់ស្រាសនៅក្នុងតំបន់នោះបិទអាជីវកម្មរបស់ខ្លួនជាបណ្ដោះអាសន្នសិន បន្ទាប់ពីមានការសង្ស័យអំពីស្រានេះដែលបានលើកឡើងកាលពីថ្ងៃទី១៦ ខែវិច្ឆិកា ពីរថ្ងៃបន្ទាប់ពីជនរងគ្រោះទី១បានស្លាប់។
លោកបានមានប្រសាសន៍ថា “យើងមិនដឹងថា តើនរណាម្នាក់មានបំណងយកថ្នាំសម្លាប់សត្វល្អិតលាយក្នុងស្រាសនោះឡើយ ប៉ុន្តែយើងនឹងចាប់ខ្លួន ហើយបិទហាងរបស់ពួកគេប្រសិនបើលទ្ធផលបង្ហាញថា មានជាតិពុលក្នុងស្រាមែន”។
លោក អ៊ុំ ភី បានបន្ថែមថា អ្នកភូមិក៏ត្រូវបានដាស់តឿនកុំឲ្យផឹកស្រាសទៀត លុះណាតែមន្ត្រីសុខាភិបាលធ្វើការវាយតម្លៃរួចរាល់សិន។
ការផឹកស្រាសដែលសង្ស័យថាមានជាតិពុលមិនមែនជារឿងប្លែកទេនៅក្នុងប្រទេសកម្ពុជាទេ ដែលអ្នកភូមិជាច្រើនគ្រួសារបិតនិងលក់ស្រាទាំងនេះ។
កាលពីឆ្នាំ២០១១មនុស្សយ៉ាងតិចប្រាំបួននាក់បានស្លាប់ និងជាច្រើននាក់ទៀតបានធ្លាក់ខ្លួនឈឺនៅក្នុងភូមិដាច់ស្រយាលមួយក្នុងខេត្តពោធិ៍សាត់ បន្ទាប់ពីផឹកស្រាដែលគេសង្ស័យថា មានលាយសារធាតុមេតាណុល៕ សារុន