29 C
Phnom Penh

កូដ​​​កម្ម​​​របស់​​​អ្នក​​​ប្រមូល​​​សំរាម​​​នឹង​​​បន្ត​​​នៅ​​​ក្នុង​​​ថ្ងៃ​​​ទី​​​៣​​​

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិលមិញ កម្មករ​​​រាប់​​​រយ​​​នាក់​​​ដែល​​​ធ្វើ​​​ការ​​​នៅ​​​ក្នុង​​​ក្រុមហ៊ុន​​​សីុនទ្រី ជា​​​ក្រុម​​​ហ៊ុន​​​ប្រមូល​​​សំរាម​​​តែ​​​មួយ​​​គត់​​​នៅ​​​ក្នុង​​​រាជ​​​ធានី​​​ភ្នំពេញ​​​បាន​​​នាំ​​​គ្នា​​​ប្តេជ្ញា​​​ថា នឹង​​​បន្ត​​​ធ្វើ​កូដកម្ម​​​ទៀត​​​នៅ​​​​​​ថ្ងៃ​​​នេះ​​​ ដើម្បី​​​ទាម​​​ទារ​​​ដំឡើង​​​ប្រាក់​​​ខែ​​​ និង​​​កាត់​​​បន្ថយ​​​ថ្ងៃ​​​ធ្វើ​​​ការ​​​បន្ទាប់​​​ពី​​​ការ​​​ចរចា​​​មិន​​​​​​អាច​​​ដោះ​​​ស្រាយ​​​វិវាទ​​​​​​បាន​​​នោះ​​​។

ស្រ្តីម្នាក់ដើរ​កាត់​គំនរសំរាម​នៅខាង​មុខ​​ផ្សារ​កាប់​គោ ដែល​កម្មករ​​​​​​ក្រុមហ៊ុន​​​សីុនទ្រីមិនបាន​ប្រមូល​បីថ្ងៃមក​ហើយ អំឡុងការតវ៉ា​។ ស៊ីវ ចានណា ​
ស្រ្តីម្នាក់ដើរ​កាត់​គំនរសំរាម​នៅខាង​មុខ​​ផ្សារ​កាប់​គោ ដែល​កម្មករ​​​​​​ក្រុមហ៊ុន​​​សីុនទ្រីមិនបាន​ប្រមូល​បីថ្ងៃមក​ហើយ អំឡុងការតវ៉ា​។ ស៊ីវ ចានណា ​

លោក​​​ មុំ​​​ សារ៉ន ប្រធាន​​​សហព័ន្ធ​​​​សហជីព​​​​លើក​​​​តម្កើង​ជីវភាព​​​​​​កម្មករ​​​ និយោជិត​ខ្មែរ​​​​​​បាន​​​លើក​​​ឡើង​​​ថា បុគ្គលិក​​​​ប្រហែល​​​៩០ភាគ​​​រយ​​​ក្នុង​​​ចំណោម​​បុគ្គលិក​ជាង​​​១.០០០​​​នាក់​​​របស់​​​ក្រុមហ៊ុន​​​សីុនទ្រី​​​បាន​​​នាំ​​​គ្នា​​​ធ្វើ​​​កូដ​​​កម្ម​​​កាល​​​​​​ពី​​​ថ្ងៃ​​​ច័ន្ទ​​​ ហើយ​​​ថា អ្នក​​​ដែល​​​នៅ​​​សេសសល់​​​បាន​​​ចូល​​​រួម​​​ជា​​​មួយ​​​ពួក​​​គេ​​​កាល​​​ពីម្សិលមិញ​​។

ខណៈ​​​អ្នក​​​បោស​​​​​​សំរាម​​​តាម​​​ផ្លូវ​​​បាន​​យល់​​​ព្រម​​​ត្រឡប់​​​ទៅ​​​ធ្វើ​​​ការ​​​វិញ​​​កាល​​​ពី​​​ម្សិលមិញ បន្ទាប់​​​ពី​​​ទទួល​​​យក​​​ការ​​​​ដំឡើង​ប្រាក់​​​ខែ​​​ចំនួន​​​១០​​​ដុល្លារ​​​ ដោយ​​​ធ្វើ​​​ឲ្យ​​​ប្រាក់​​​ខែ​​​របស់​​​ពួក​គេ​​​ឡើង​​​ដល់​​​១០៥ដុល្លារ​​​នោះ អ្នក​​​ប្រមូល​​​សំរាម​​​​​​នៅ​​​តែ​​​នាំ​​​គ្នា​​​ធ្វើ​​​កូដ​​​កម្ម​​​ដើម្បី​​​ទាម​​​ទារ​​​ដំឡើង​​​ប្រាក់​​​ខែ​​​ចំនួន​​​៤៥​​​ដុល្លារ​​​បន្ថែម​​​ទៀត​​​ ដែល​​​នឹង​​​ធ្វើ​​​ឲ្យ​​​ប្រាក់​​​ខែ​​​របស់​​​ពួកគេ​​​ឡើង​​​ដល់​​​១៥០​​​ដុល្លារ​​​ក្នុ​​​ង​​​មួយ​​​ខែ​​​​។ ចំណែក​​​ឯ​​​អ្នក​​​បើក​​​រថយន្ត​​​ដឹក​​​សំរាម​​​វិញ​​​កំពុង​​​ទាម​​​ទារ​​​ឲ្យ​​​មាន​​​ការ​​​ដំឡើង​​​ដល់​​​​​​៣០០ដុល្លារ​​​ក្នុង​​​មួយ​​​ខែ​​​។

ខណៈ​​​សំរាម​​​នៅ​​​គរ​​​តាម​​​ផ្លូវ​​​ក្នុង​​​រាជ​​​ធានី​​​ភ្នំពេញ​​​កាល​​​ពីម្សិលមិញ បុគ្គលិក​​​របស់​​​ក្រុមហ៊ុន​​​សីុនទ្រី​​​ប្រហែល​​​១០០​​​នាក់​​​បាន​​​ចូល​​​រួម​​​ការ​​​តវ៉ា​​​នៅ​​​ខាង​​​ក្រៅ​​​ការិយាល័យ​​​របស់​​​ក្រុមហ៊ុន​​​ក្នុង​​​ខណ្ឌ​​​ដង្កោ​​​​​​​​​​​​​​​​​​​​​​​​​​​​​ អំឡុង​​​ពេល​​​មេ​​​ដឹក​​​នាំ​​​សហជីព​​​ អ្នក​​​គ្រប់​​​គ្រង​​​ក្រុមហ៊ុន​​​ និង​​​តំណាង​​​សាលា​​​រាជ​​​ធានី​​​កំពុង​​​បន្ត​​​ពិភាក្សា​​​នៅ​​​ខាង​​​ក្នុង​​​។

លោក មុំ សារ៉ន បាន​​​មាន​​​ប្រសាសន៍​​​ថា “កម្មករ​​​បាន​​​លើក​​​ឡើង​​ថា ពួក​​​គាត់​​​នឹង​​​មិន​​​ត្រឡប់​​​ទៅ​​​ធ្វើ​​​ការ​​​ងារ​​​វិញ​​​ទេ ប្រសិន​​​បើ​​​ក្រុមហ៊ុន​​​មិន​​​ឆ្លើយ​​​តប​​​​​​ទៅ​​​នឹង​​​អ្វី​​​ដែល​​​ពួកគេ​​​ចង់​​​បាន​​​”។ លោក​​​ សេង​​​ ប៊ុនរិទ្ធ អ្នក​​​គ្រប់​​​គ្រង​​​ជាន់​​​ខ្ពស់​​​នៅ​​​ក្រុម​​​ហ៊ុន ស៊ីនទ្រី បាន​​​លើក​​​ឡើង​​​ថា ក្រុមហ៊ុន​​​មិន​​​មាន​​​លទ្ធភាព​​​ធ្វើ​​​តាម​​​ការ​​​ទាម​​​ទារ​​​របស់​​​កម្មករ​​​ឡើយ ប៉ុន្តែ លោក​​​បាន​​​បន្ថែម​​​ថា ការ​​​ចរចា​​​នឹង​​​បន្ត​​​ទៀត​​​នៅ​​​ថ្ងៃ​​​នេះ​​​៕ស៊ុយ​​​ឈាង​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស