មន្ត្រីឃុំម្នាក់បាននិយាយកាលពីម្សិលមិញថា បុរសអាយុ៣២ឆ្នាំម្នាក់បានស្លាប់កាលពីយប់ថ្ងៃពុធបន្ទាប់ពីគ្រាប់បែកច្នៃដែលគាត់មានគម្រោងប្រើដើម្បីបោកត្រី បានផ្ទុះនៅពេលគាត់កំពុងធ្វើនៅក្នុងស្រុកស្ទឹងត្រង់ ខេត្តកំពង់ចាម។
លោក មេឃុំ តុប ចាន់ បានមានប្រសាសន៍ថា លោក ទូច សុផល បានដាក់រំសេវចូលក្នុងបំពង់ឫស្សី ស្រាប់តែវាបានផ្ទុះនៅក្នុងឃុំអូរម្លូកាលពីរសៀលថ្ងៃពុធ។ លោកបានមានប្រសាសន៍ថា “គាត់បានប្រើរំសេវច្រើន ហើយបន្ទាប់មកបានដាក់ផាវ រួចបង្ហាប់ឲ្យណែន។ បន្ទាប់មក វាបានផ្ទុះដោយសារធ្វើខុសបច្ចេកទេស”។
លោក តុប ចាន់ បានមានប្រសាសន៍ថា ការផ្ទុះនេះបានបណ្តាលឲ្យលោក សុផល ដែលនៅក្នុងឃុំនេះគេស្គាល់ថាបានប្រើប្រាស់បច្ចេកទេសចាប់ត្រីខុសច្បាប់នោះ រងរបួសធ្ងន់ ហើយក្រោយមកបានស្លាប់នៅក្នុងមន្ទីរពេទ្យ។
លោកបានមានប្រសាសន៍ថា “គាត់បាក់ជើងទាំងពីរ។ គាត់ត្រូវបានបញ្ជូនទៅមន្ទីរពេទ្យបង្អែកខេត្ត ហើយបន្ទាប់មកត្រូវបានបញ្ជូនបន្តមករាជធានីភ្នំពេញនៅពេលល្ងាច ពីព្រោះគាត់ហូរឈាមយ៉ាងខ្លាំង”។
លោក តុប ចាន់ បានមានប្រសាសន៍ថា លោកបានទៅចូលរួមបុណ្យសព លោក ទូច សុផល កាលពីម្សិលមិញ ដែលអ្នកភូមិបានជជែកគ្នាពីទម្លាប់រកត្រីរបស់គាត់។ លោកបានមានប្រសាសន៍ថា “ជារឿយៗគាត់ចាប់ត្រីដោយខុសច្បាប់។ គាត់តែងតែច្នែគ្រាប់បែក”។
នៅក្នុងករណីដាច់ដោយឡែកមួយទៀត ទាក់ទងការចាប់ត្រីខុសច្បាប់ដែលបានបណ្តាលឲ្យស្លាប់នេះដែរ ក្មេងប្រុសអាយុ៣ឆ្នាំម្នាក់បានស្លាប់កាលពីថ្ងៃអង្គារនៅក្នុងស្រុកពាមរក៍ ខេត្តព្រៃវែងបន្ទាប់ពីត្រូវឆក់ស្លាប់ដោយឧបករណ៍ចាប់ត្រីរបស់អ្នកជិតខាង។
លោក អ៊ុំ គឹមសាន នាយរងនគរបាលព្រហ្មទណ្ឌស្រុកបានមានប្រសាសន៍កាលពីម្សិលមិញថា ឡូត ឌី អាយុ២៦ឆ្នាំបានប្រើឧបករណ៍ឆក់ត្រីនៅបឹងក្បែរផ្ទះរបស់ខ្លួន។
បន្ទាប់ពីឆក់ត្រីរួច ឌី បានទុកឧបករណ៍នោះនៅលើដី ដោយនៅមានចរន្តអគ្គិសនីនៅឡើយ។ ក្មេងប្រុសអាយុ៣ឆ្នាំម្នាក់រស់នៅក្បែរខាងគ្នាបានដើរប៉ះឧបករណ៍នោះ។ លោកបានមានប្រសាសន៍ថា “បន្ទាប់ពីរកត្រីរួច គាត់ភ្លេចដកឌុយភ្លើងចេញ ហើយនៅពេលក្មេងប្រុសនេះដើរប៉ះ ស្រាប់តែឆក់តែម្តងបន្ទាប់ពីវាបានចាប់ឧបករណ៍នោះ”។
លោក គឹមសាន បានមានប្រសាសន៍ថា ឈ្មោះ ឌី នេះបានរត់គេចខ្លួនពីឃុំព្រែកខ្សាយ “ខ” ហើយនគរបាលកំពុងស្វែងរកចាប់ខ្លួនជននេះ។ លោកបានមានប្រសាសន៍ថា “ខ្ញុំកំពុងរៀបចំឯកសារបញ្ជូនទៅសាលាដំបូងខេត្តនៅថ្ងៃច័ន្ទ”។ លោកបានបន្ថែមថា លោកនឹងចោទប្រកាន់ ឈ្មោះ ឌី នេះពីបទមនុស្សឃាតដោយអចេតនា និងរំលោភច្បាប់នេសាទ៕សារុន