ក្រសួងបរិស្ថានបានប្រកាសកាលពីម្សិលមិញថា ខ្លួនបានលុបចោលសម្បទានដីសេដ្ឋកិច្ចចំនួន២៦ ដែលគ្របដណ្ដប់លើផ្ទៃដីទំហំ១១៧.០០០ហិកតាកាលពីឆ្នាំមុន រួមទាំងសម្បទានចំនួនពីររបស់ឧកញ៉ាឈ្មួញឈើ ទ្រី ភាព នៅក្នុងឧទ្យានជាតិវីរជ័យ នៃខេត្តរតនគិរីផងដែរ។
នៅឯសន្និសីទកាសែតមួយកាលពីព្រឹកម្សិលមិញ លោក សាយ សំអាល់ រដ្ឋមន្ត្រីក្រសួងបរិស្ថានបានមានប្រសាសន៍ថា រដ្ឋាភិបាលបានលុបចោលសម្បទានចំនួន២៣ក្នុងចំណោមសម្បទានទាំងនេះ ចំណែកឯសម្បទានបីទៀតរួមទាំងរបស់លោក ទ្រី ភាព ផង ត្រូវបានប្រគល់ឲ្យរដ្ឋវិញដោយស្ម័គ្រចិត្ត។ លោកបានមានប្រសាសន៍ថា រដ្ឋាភិបាលក៏បានកាត់ដីទំហំ១០.០០០ហិកតាចេញពីសម្បទានដីសេដ្ឋកិច្ចចំនួនពីរទៀតផងដែរ ហើយបានចេញសេចក្តីជូនដំណឹងដល់សម្បទានចំនួនបួនទៀតថា ពួកគេក៏អាចបាត់បង់សម្បទានរបស់ខ្លួនដែរ ប្រសិនបើពួកគេបន្តបំពានលក្ខខណ្ឌដែលមានចែងនៅក្នុងកិច្ចសន្យារបស់ខ្លួនជាមួយរដ្ឋ។
នេះគឺជាការលុបចោលចុងក្រោយបំផុតនៃការលុបចោលសម្បទានជាបន្តបន្ទាប់ក្រោយពីលោកនាយករដ្ឋមន្ត្រី ហ៊ុន សែន បានចេញបទបញ្ជាមួយកាលពីឆ្នាំ២០១២ថា ក្រសួងបរិស្ថាន និងក្រសួងកសិកម្មត្រូវតែពិនិត្យផ្ទៀងផ្ទាត់សម្បទានដីសេដ្ឋកិច្ចទាំងអស់ឡើងវិញ ហើយលុបចោលកិច្ចសន្យារបស់ម្ចាស់ដីសម្បទានណាដែលបំពានច្បាប់។
បន្ទាប់ពីសន្និសីទកាលពីម្សិលមិញ លោក ស្រ៊ុន ដារិទ្ធ ប្រធានខុទ្ទកាល័យរបស់លោក សាយ សំអាល់ បានមានប្រសាសន៍ថា រដ្ឋាភិបាលបានលុបចោលសម្បទានចំនួន២៣ដោយសារហេតុផលចម្បងចំនួនបី។
លោកមានប្រសាសន៍បន្តថា “ទី១ក្រុមហ៊ុនមិនគោរពតាមនីតិវិធីច្បាប់។ ឧទាហរណ៍ មុនពេលអភិវឌ្ឍ ពួកគេចាំបាច់ត្រូវធ្វើ EIA [ការវាយតម្លៃអំពីផលប៉ះពាល់ផ្នែកបរិស្ថាន] និងផែនការមេ។ ទី២ គ្មានដំណោះស្រាយជាមួយអ្នកភូមិដែលរងផលប៉ះពាល់ ហើយទី៣ ក្រុមហ៊ុនគ្មានសមត្ថភាពអភិវឌ្ឍដីនោះ”។
សម្បទានដីសេដ្ឋកិច្ចដែលត្រូវបានប្រគល់ឲ្យក្រសួងវិញដោយស្ម័គ្រចិត្ត រួមមានសម្បទានទំហំ៩.៧០០ហិកតាដែលជួលឲ្យក្រុមហ៊ុន ទ្រី ភាព អាហរ័ណនីហរ័ណ និងសម្បទានទំហំ៩.១០០ហិកតាដែលជួលឲ្យទៅក្រុមហ៊ុន MDS Thmoda SEZ ដែលជាផ្នែកមួយនៃក្រុមហ៊ុន MDS Group របស់លោក ទ្រី ភាព។
លោក ស្រ៊ុន ដារិទ្ធ បានមានប្រសាសន៍ថា ឧកញ៉ារូបនេះបានបោះបង់សម្បទានទាំងនេះ ដែលសុទ្ធតែមានទីតំាងស្ថិតនៅក្នុងឧទ្យានជាតិវីរជ័យ និងជាប់ព្រំប្រទល់ប្រទេសវៀតណាម ដោយសារតែដីទាំងនេះមិនអំណោយផលសម្រាប់ការធ្វើកសិកម្ម។
បណ្ដាអង្គការសិទ្ធិមនុស្សបានចោទប្រកាន់លោក ទ្រី ភាព ថាបានធ្វើប្រតិបត្តិការកាប់ឈើខុសច្បាប់ដ៏ធំនៅទូទាំងទេសដោយមានការអនុញ្ញាតពីរដ្ឋាភិបាល។ នៅពេលក្រុមអ្នកយកព័ត៌មានចុះទៅពិនិត្យមើលស្ថានភាពនៅឧទ្យានជាតិវីរជ័យកាលពីឆ្នាំ២០១៣ ក្រុមកាប់ឈើខុសច្បាប់ដែលអះអាងថាខ្លួនធ្វើការឲ្យលោក ទ្រី ភាព បានគ្រប់គ្រងប្រតិបត្តិការមួយដែលមានការរៀបចំយ៉ាងល្អនៅទីនោះ ដោយកាប់ឈើមានតម្លៃបំផុតចេញពីតំបន់ការពារ។
លោក ទ្រី ភាព មានកិច្ចព្រមព្រៀងផ្លូវការជាមួយរដ្ឋាភិបាល ដោយទទួលបានសិទ្ធិផ្ដាច់មុខទិញយកឈើទាំងអស់ដែលកាប់ដោយម្ចាស់សម្បទានដីសេដ្ឋកិច្ចនៅក្នុងខេត្តរតនគិរី ព្រមទាំងឈើកាប់ដោយខុសច្បាប់ទាំងអស់ដែលរដ្ឋរឹបអូសបាននៅទូទាំងប្រទេសផងដែរ ប៉ុន្តែតំណាងក្រុមហ៊ុនរបស់លោកបានបដិសេធថា ក្រុមហ៊ុនរបស់លោកមិនបានកាប់ឈើខុសច្បាប់ដោយខ្លួនឯងនោះទេ។
លោក ស្រ៊ុន ដារិទ្ធ បានមានប្រសាសន៍ថា ដីសម្បទានទាំងពីរកន្លែងដែលលោក ទ្រី ភាព បានប្រគល់ឲ្យរដ្ឋវិញ មិនមានការកាប់ឈើទេ។ អង្គការសិទ្ធិមនុស្សអាដហុក និងលីកាដូ បាននិយាយថា ខ្លួនមិនអាចបញ្ជាក់ការអះអាងនេះបានទេ ពីព្រោះតំបន់នោះនៅដាច់ស្រយាលពេក ចំណែកឯតំណាងរបស់លោក ទ្រី ភាព មិនអាចទាក់ទងសុំការបំភ្លឺបានទេពាក់ព័ន្ធនឹងបញ្ហានេះ៕ សុខុម