លោក ប៉ែន សុវណ្ណ អតីតនាយករដ្ឋមន្ត្រីបានអះអាងកាលពីម្សិលមិញថា លោកត្រូវបានហាមឃាត់មិនឲ្យចូលសហរដ្ឋអាមេរិក ដោយសារតែជំនួយការម្នាក់របស់លោកដែលបានស្នាក់នៅទីនោះជាង១ទសវត្សរ៍កន្លងមកហើយ បន្ទាប់ពីទិដ្ឋាកាហួសសុពលភាព ហើយលោកបានចុះទៅស្ថានទូតអាមេរិកប្រចាំរាជធានីភ្នំពេញ ដើម្បីខិតខំដោះស្រាយបញ្ហានេះ។
ការប្រកាសរបស់លោក ប៉ែន សុវណ្ណ ត្រូវបានធ្វើឡើងបន្ទាប់ពីមានសេចក្ដីរាយការណ៍ថា លោកដែលឥឡូវជាសមាជិកសភាមកពីគណបក្សសង្គ្រោះជាតិត្រូវសហរដ្ឋអាមេរិកកត់ត្រាចូលក្នុងបញ្ជីខ្មៅពីបទជួញដូរមនុស្ស។ ការអះអាងនេះជាដំបូងឡើយបានលេចឡើងនៅលើអុីនធើណិតកាលពីថ្ងៃសុក្រ តាមរយៈការបង្ហោះរបស់ចលនាអំណាចពលរដ្ឋខ្មែរ ជាក្រុមប្រឆាំងដែលមានសមាជិកសុទ្ធតែជាជនជាតិខ្មែររស់នៅអាមេរិក។
ការបង្ហោះនេះដែលក៏អះអាងថា លោក ថាច់ សេដ្ឋា អតីតសមាជិកព្រឹទ្ធសភារបស់គណបក្ស សម រង្ស៊ី ស្ថិតក្នុងបញ្ជីខ្មៅដែរនោះ បន្ទាប់មកត្រូវបានចែករំលែកតាមហ្វេសប៊ុក ដោយលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី។
កាលពីម្សិលមិញលោក ប៉ែន សុវណ្ណ បានលើកឡើងថា ការអះអាងអំពីបម្រាមហាមមិនឲ្យចូលសហរដ្ឋអាមេរិកនេះគឺត្រឹមត្រូវ។ លោកបានលើកឡើងទៀតថា លោកដឹងថា មានបម្រាមនេះប្រហែល១ឆ្នាំកន្លងមកហើយ ហើយថា វាមានឫសគល់កើតចេញពីការធ្វើដំណើរមួយរបស់លោកទៅសហរដ្ឋអាមេរិកជាមួយជំនួយការរបស់លោកម្នាក់កាលពីឆ្នាំ២០០១។
លោកបានមានប្រសាសន៍ថា “មន្ត្រីស្ថានទូតអាមេរិកប្រចាំរាជធានីភ្នំពេញបានជូនដំណឹងដល់ខ្ញុំថា ពួកគេនឹងមិនចេញទិដ្ឋាកាអនុញ្ញាតឲ្យខ្ញុំទៅសហរដ្ឋអាមេរិកឡើយ ព្រោះខ្ញុំបាននាំមនុស្សម្នាក់ទៅកាន់ទីនោះ ហើយថា មនុស្សម្នាក់នោះមិនទាន់ត្រឡប់មកវិញទេ”។
លោក ប៉ែន សុវណ្ណ បានលើកឡើងទៀតថា លោកបានធ្វើដំណើរទៅសហរដ្ឋអាមេរិកកាលពីឆ្នាំ២០០១ជាមួយលោក សេង វណ្ណា ជំនួយការរបស់លោកនៅពេលនោះ ហើយថា លោក វណ្ណា បានសុំស្នាក់នៅសហរដ្ឋអាមេរិកបន្តទៀតសម្រាប់ការព្យាបាលដ៏បន្ទាន់មួយ។
លោកបានមានប្រសាសន៍ថា “ជំនួយការនៅពេលនោះរបស់ខ្ញុំបានប្រាប់ខ្ញុំថា គាត់មានជំងឺធ្ងន់ ហើយមិនអាចដើរបានស្រួលឡើយ ហេតុដូច្នេះគាត់មិនអាចត្រឡប់មកវិញតាមការកំណត់ឡើយ។ ប៉ុន្តែវាមិនមែនជាការជួញដូរមនុស្សដូចអ្នកខ្លះបានអះអាងនោះឡើយ”។
លោក ប៉ែន សុវណ្ណ បានលើកឡើងបន្ថែមទៀតថា ទីបំផុតអតីតជំនួយការរបស់លោកបានត្រឡប់មកប្រទេសកម្ពុជាវិញហើយកាលពីប្រហែល២ខែកន្លងមកនេះ ពោលគឺជាង១៣ឆ្នាំបន្ទាប់ពីជំនួយការរូបនេះបានចាកចេញពីប្រទេសកម្ពុជា។
លោក ប៉ែន សុវណ្ណ បានមានប្រសាសន៍ថា “មន្ត្រីនៅស្ថានទូតអាមេរិកប្រចាំនៅរាជធានីភ្នំពេញបានប្រាប់ខ្ញុំថា ពួកគេនឹងចេញទិដ្ឋាកាអនុញ្ញាតឲ្យខ្ញុំធ្វើដំណើរទៅសហរដ្ឋអាមេរិកបានឡើងវិញនៅពេលណាអតីតជំនួយការរបស់ខ្ញុំ ដែលបានគេចហើយស្នាក់នៅសហរដ្ឋអាមេរិកបន្ទាប់ពីទិដ្ឋាកាហួសសុពលភាពត្រឡប់មកវិញ។ ឥឡូវនេះគាត់ត្រឡប់មកវិញហើយ”។
អតីតនាយករដ្ឋមន្ត្រីរូបនេះ បានលើកឡើងបន្តទៀតថា លោកបានចុះទៅស្ថានទូតអាមេរិកប្រចាំរាជធានីភ្នំពេញ ដើម្បីព្យាយាមឲ្យមានការលុបឈ្មោះរបស់លោកចេញពីបញ្ជីខ្មៅ ប៉ុន្តែគេបានប្រាប់លោកថា លោកចាំបាច់ត្រូវតែធ្វើការណាត់ជួបជាមុនសិន។ ហើយលោកបាននិយាយថា លោកនឹងត្រឡប់ទៅម្ដងទៀតដើម្បីដោះស្រាយបញ្ហានេះ។
លោក សេង វណ្ណា បានលើកឡើងកាលពីម្សិលមិញថា លោកពិតជាបានត្រឡប់មកប្រទេសកម្ពុជាវិញហើយ ហើយបានត្រឡប់មកវិញប្រហែលជា២ខែកន្លងមកហើយ។ លោកបានលើកឡើងទៀតថា លោកបានស្នាក់នៅក្នុងសហរដ្ឋអាមេរិកបន្ទាប់ពីទិដ្ឋាកាហួសសុពលភាពកាលពីឆ្នាំ២០០១ ដើម្បីព្យាបាលគ្រោះក្នុងតម្រង់នោម ហើយបានបន្តរស់នៅក្នុងសហរដ្ឋអាមេរិកបន្តទៀត បន្ទាប់ពីរៀបការជាមួយស្ត្រីជនជាតិខ្មែរដែលរស់នៅទីនោះ ប៉ុន្តែលោកមិនដែលដាក់ពាក្យសុំចូលជាពលរដ្ឋអាមេរិកឡើយ។
លោក សេង វណ្ណា បានមានប្រសាសន៍ថា “បន្ទាប់ពីយើងបានទៅដល់អាមេរិក ខ្ញុំមានអារម្មណ៍ថា ឈឺក្នុងតម្រង់នោមយ៉ាងខ្លាំង វាគឺជារោគសញ្ញាគ្រោះក្នុងតម្រង់នោម ហេតុដូច្នេះខ្ញុំបានស្នាក់នៅក្នុងសហរដ្ឋអាមេរិកទាំងទិដ្ឋាកាហួសសុពលភាព ដើម្បីព្យាបាលជំងឺនេះ។ វាគ្មានអ្វីពាក់ព័ន្ធនឹងលោក ប៉ែន សុវណ្ណ ទេ ហើយវាមិនពិតទេដែលថាលោកបានជួញដូរខ្ញុំទៅទីនោះ”។
លោក ថាច់ សេដ្ឋា បានបដិសេធចំពោះការអះអាងពាក់ព័ន្ធនឹងការជួញដូរនេះ ហើយថា លោកមិនដែលត្រូវបានគេជូនដំណឹងអំពីបម្រាមហាមមិនឲ្យចូលសហរដ្ឋអាមេរិកនេះឡើយ។
លោកបានមានប្រសាសន៍ថា “ខ្ញុំគ្មានអ្វីត្រូវនិយាយដើម្បីការពារខ្លួនរបស់ខ្ញុំចំពោះអ្វីដែលខ្ញុំមិនបានធ្វើនេះឡើយ។ ប្រសិនបើខ្ញុំបានធ្វើរឿងបែបនេះមែន រដ្ឋាភិបាលកម្ពុជានឹងមិនបណ្ដោយឲ្យខ្ញុំមានសេរីភាពដូច្នេះទេ។ ប្រសិនបើវាជារឿងពិត ម្លេ៉ះខ្ញុំប្រហែលជាត្រូវបានគេចាប់ឡើងសវនាការបាត់ទៅហើយ”។
លោក ថាច់ សេដ្ឋា បានលើកឡើងទៀតថា លោកបានទៅសហរដ្ឋអាមេរិកជាលើកចុងក្រោយកាលពីឆ្នាំ២០០៥។ ស្ថានទូតអាមេរិកមិនបានបញ្ជាក់ ឬបដិសេធចំពោះការដាក់បម្រាមទាំងនេះឡើយ។ លោក ជេ រ៉ាម៉ាន (Jay Raman) អ្នកនាំពាក្យស្ថានទូតអាមេរិកបានលើកឡើងតាមរយៈអុីម៉េលមួយថា ”យើងមិនអាចផ្ដល់ព័ត៌មានលម្អិតអំពីករណីផ្ដល់ទិដ្ឋាកាឲ្យបុគ្គលណាមួយឡើយ ព្រោះថា របាយការណ៍ទាំងអស់គឺជារឿងសម្ងាត់បើយោងតាមច្បាប់សហរដ្ឋអាមេរិក។ ប្រសិនបើហើយនៅពេលមានភ័ស្តុបញ្ជាក់ថា បុគ្គលរូបនោះត្រូវបានហាមមិនឲ្យចូលសហរដ្ឋអាមេរិក ឬក៏គ្មានសិទ្ធិទទួលបានទិដ្ឋាកា ក្រសួងការបរទេសនឹងចាត់វិធានការដ៏សមរម្យមួយ”៕ ស៊ុយឈាង (រាយការណ៍បន្ថែមដោយ Zsombor Peter)