អង្គការសហប្រជាជាតិ និងអង្គការសិទ្ធិជនភៀសខ្លួនអូស្ត្រាលីបានលើកឡើងថា គណៈប្រតិភូនៃមន្ត្រីកម្ពុជា បានមកដល់ប្រទេសណូរូ ជាប្រទេសដែនកោះប៉ាស៊ីហ្វិកខាងត្បូងកាលពីថ្ងៃច័ន្ទ ទីដែលប្រទេសអូស្ត្រាលីបានឃុំខ្លួនអ្នកស្វែងរកសិទ្ធិជ្រកកោនរាប់រយនាក់ ហើយសង្ឃឹមថា យ៉ាងហោចណាស់នឹងបញ្ចុះបញ្ចូលពួកគេមួយចំនួនឲ្យមកតាំងទីលំនៅក្នុងប្រទេសកម្ពុជា។
កាលពីខែកញ្ញា ប្រទេសកម្ពុជាបានចុះហត្ថលេខាលើកិច្ចព្រមព្រៀងដ៏ចម្រូងចម្រាសជាមួយប្រទេសអូស្ត្រាលីក្នុងការតាំងទីលំនៅថ្មីដល់ជនភៀសខ្លួនមួយចំនួនមិនជាក់លាក់ជាថ្នូរនឹងប្រាក់ជំនួយ៣៥លានដុល្លារបន្ថែមសម្រាប់រយៈពេលបួនឆ្នាំក្រោយ។
នេះជាការធ្វើដំណើររបស់មន្ត្រីកម្ពុជាលើកទី១ហើយទៅប្រទេសដែនកោះនេះ ដើម្បីត្រៀមខ្លួនសម្រាប់អ្វីដែលអាចជាក្រុមអ្នកស្ម័គ្រចិត្តលើកដំបូង។
លោក Ian Rintoul អ្នកនាំពាក្យសម្ព័ន្ធសកម្មភាពជនភៀសខ្លួនបានមានប្រសាសន៍ថា “ឥឡូវនេះមន្ត្រីកម្ពុជាបានមកដល់ប្រទេសណូរូហើយ។ ពួកគាត់បានមកដល់កាលពីម្សិលមិញ”។
អង្គការអន្តរជាតិទេសន្តរប្រវេសន៍របស់អង្គការសហប្រជាជាតិបានអះអាងថា តំណាងរបស់ខ្លួនក៏បានមកដល់ប្រទេសណូរូជាមួយមន្ត្រីកម្ពុជា និងអូស្ត្រាលីផងដែរ។
លោក ចូ ឡូរី អ្នកនាំពាក្យអង្គការអន្តរជាតិទេសន្តរប្រវេសន៍ បានមានប្រសាសន៍ពីទីក្រុងបាងកកថា “យើងទៅទីនោះក្នុងនាមជាអ្នកសង្កេតការណ៍នៃជំនួបរវាងរដ្ឋាភិបាលកម្ពុជា អូស្ត្រាលី និង ណូរូ”។
លោក ឡូរី បានមានប្រសាសន៍ថា លោក Leul Mekonnen ដែលជាប្រធានអង្គការអន្តរជាតិទេសន្តរប្រវេសន៍ប្រចាំប្រទេសកម្ពុជាបានដឹកនាំគណៈប្រតិភូរបស់អង្គការនេះ។
បច្ចុប្បន្ននេះអង្គការអន្តរជាតិទេសន្តរប្រវេសន៍កំពុងពិភាក្សាថា តើត្រូវចូលរួមក្នុងកម្មវិធីតាំងទីលំនៅថ្មីដែលបានពិភាក្សារវាងប្រទេសកម្ពុជានិងប្រទេសអូស្ត្រាលីជាសម្ងាត់ និងដោយមិនមានការចូលរួមពីទីភ្នាក់ងារជំនួយណាមួយ ឬអង្គការមិនមែនរដ្ឋាភិបាល ឬយ៉ាងណានោះ។ មន្ត្រីកម្ពុជា និងអូស្ត្រាលី ដែលត្រូវបានទាក់ទងកាលពីម្សិលមិញ មិនបានបញ្ជាក់ ឬក៏បដិសេធពីការធ្វើដំណើរនោះឡើយ។
លោក សុខ ផល មន្ត្រីអន្តោប្រវេសន៍កម្ពុជាបានបដិសេធមិនធ្វើអត្ថាធិប្បាយទេ ហើយបានបង្វែរសំណួរទៅលោក អ៊ុក គឹមឡេក អនុរដ្ឋលេខាធិការក្រសួងមហាផ្ទៃដែលបានបង្វែរសំណួរទៅឧត្តមសេនីយ៍ សុខ ផល វិញ។ លោក កុយ គួង អ្នកនាំពាក្យក្រសួងការបរទេសបានមានប្រសាសន៍ថា លោកមិនដឹងពីការធ្វើដំណើរទៅប្រទេសណូរូទេ។
អ្នកនាំពាក្យក្រសួងអន្តោប្រវេសន៍អូស្ត្រាលី បានបដិសេធមិនធ្វើអត្ថាធិប្បាយទេ។ ស្ថានទូតអូស្ត្រាលីប្រចាំរាជធានីភ្នំពេញមិនបានឆ្លើយតបចំពោះសំណើសុំអត្ថាធិប្បាយទេ។
កាសែត The Age របស់អូស្ត្រាលីបានរាយការណ៍កាលពីម្សិលមិញថា មន្ត្រីអូស្ត្រាលី ដែលបានចូលរួមក្នុងការធ្វើដំណើរនោះរួមមាន ឧត្តមសេនីយ៍ឯក Angus Campbell ដែលជាប្រធានប្រតិបត្តិការអធិបតេយ្យភាពព្រំដែនរបស់រដ្ឋាភិបាលប្រទេសអូស្ត្រាលី និងលោក Mark Cormack លេខារងទទួលបន្ទុកអន្តោប្រវេសន៍របស់ប្រទេសអូស្ត្រាលី។
ដោយមិនលើកឡើង ពីប្រភពណាមួយ កាសែត The Age ក៏បានរាយការណ៍ផងដែរថា ជនភៀសខ្លួនរ៉ូហីុងយ៉ា មួយចំនួនរំពឹងថា នឹងទទួលយកសំណើក្នុងការតាំងទីលំនៅថ្មីក្នុងប្រទេសកម្ពុជា។
ជនភៀសខ្លួនរ៉ូហីុងយ៉ា ត្រូវបានគាបសង្កត់ដោយហិង្សាក្នុងប្រទេសភូមា ដែលរដ្ឋាភិបាលប្រទេសនេះបដិសេធមិនទទួលស្គាល់ពួកគាត់តាមផ្លូវច្បាប់ក្នុងនាមជាជនជាតិដើមភាគតិចឡើយ បើទោះណាជា ពួកគាត់ជាច្រើនបានរស់នៅក្នុងប្រទេសនេះច្រើនជំនាន់មកហើយក៏ដោយ។
បើទោះណាជាប្រទេសកម្ពុជាបានអះអាងថា ខ្លួននឹងតាំងទីលំនៅថ្មីដល់ជនភៀសខ្លួនទាំងឡាយណាដែលស្ម័គ្រចិត្តក៏ដោយ ក៏អង្គការសិទ្ធិមនុស្ស និងសមាជិកសភាគណបក្សប្រឆាំងបានរិះគន់ប្រទេសអូស្ត្រាលី ចំពោះការមិនទទួលខុសត្រូវដល់អ្នកស្វែងរកសិទ្ធិជ្រកកោននៅប្រទេសណូរូ ហើយព្យាយាមបញ្ជូនពួកគេទៅប្រទេសមួយក្នុងចំណោមប្រទេសក្រីក្របំផុត និងពុករលួយបំផុតក្នុងតំបន់ទៅវិញ៕សារុន