មន្ត្រីរដ្ឋាភិបាលម្នាក់បាននិយាយថា គណៈប្រតិភូរដ្ឋាភិបាលដែលបានធ្វើដំណើរទៅប្រទេសណូរូ ជាប្រទេសដែនកោះបា៉ស៊ីហ្វិកខាងត្បូងកាលពីសប្ដាហ៍មុន ដើម្បីសិក្សាអំពីលទ្ធភាពនៃការតាំងទីលំនៅថ្មីដល់ជនភៀសខ្លួននៅក្នុងប្រទេសកម្ពុជាដែលបច្ចុប្បន្ននេះត្រូវបានឃុំខ្លួននៅទីនោះ នឹងត្រឡប់មកដល់រាជធានីភ្នំពេញវិញនៅថ្ងៃនេះ។
ប្រទេសកម្ពុជាបានចុះហត្ថលេខាលើកិច្ចព្រមព្រៀងក្នុងទឹកប្រាក់៣៥លានដុល្លារជាមួយប្រទេសអូស្ត្រាលីកាលពីខែកញ្ញា ដើម្បីទទួលយកជនភៀសខ្លួនក្នុងចំនួនមិនជាក់លាក់ ប៉ុន្តែមិនទាន់បានតាំងទីលំនៅដល់ពួកគេនៅឡើយទេ។
នៅពេលត្រូវបានទាក់ទងកាលពីម្សិលមិញនៅក្នុងរាជធានីភ្នំពេញ លោក សុខ វាសនា ប្រធាននាយកដ្ឋានអន្តោប្រវេសន៍ក្រសួងមហាផ្ទៃ បានមានប្រសាសន៍ថា លោក កែម សារិន ប្រធានសេវាកម្មជនភៀសខ្លួនរបស់នាយកដ្ឋាននេះ បានដឹកនាំគណៈប្រតិភូទាំងនេះ។
លោកបានមានប្រសាសន៍ថា ” គាត់ស្ថិតក្នុងប្រទេសណូរូ ហើយគ្រោងត្រឡប់មកវិញនៅថ្ងៃស្អែកនេះ”។
លោក វាសនា បានមានប្រសាសន៍ថា លោកមិនដឹងថាតើគណៈប្រតិភូទាំងនោះបានធ្វើអ្វីខ្លះនៅក្នុងប្រទេសណូរូឡើយ ហើយក្រុមមន្ត្រីនាយកដ្ឋានអន្តោប្រវេសន៍ផ្សេងទៀតបានលើកឡើងដូចគ្នានេះដែរ។ គេមិនអាចទាក់ទងលោក សារិន ដើម្បីសុំអត្ថាធិប្បាយបានទេ។
រដ្ឋាភិបាលមិនបាននិយាយអ្វីឡើយអំពីការធ្វើដំណើរនោះឡើយ ដែលធ្លាប់ត្រូវបានអះអាងដោយសម្ព័ន្ធសកម្មភាពជនភៀសខ្លួន ដែលមានមូលដ្ឋាននៅទីក្រុងស៊ីដនី ជាក្រុមតស៊ូមតិរបស់អង្គការមិនមែនរដ្ឋាភិបាល និងអង្គការអន្តរជាតិទេសន្តរប្រវេសន៍របស់អង្គការសហប្រជាជាតិ ដែលបានបញ្ជូនគណៈប្រតិភូរបស់ខ្លួនទៅប្រទេសណូរូក្នុងនាមជាអ្នកសង្កេតការណ៍។
កាលពីថ្ងៃសុក្រ លោក Ian Rintoulអ្នកនាំពាក្យសម្ព័ន្ធសកម្មភាពជនភៀសខ្លួនបានមានប្រសាសន៍ថា ក្រុមមន្ត្រីកម្ពុជាបានធ្វើដំណើរទៅមណ្ឌលឃុំខ្លួន និងជំរំជនភៀសខ្លួននៅលើកោះនោះ។
លោកបានមានប្រសាសន៍ថា អ្នកស្វែងរកសិទ្ធិជ្រកកោនពីរបីនាក់ត្រូវបានផ្ដល់ឱកាសឲ្យជួបជាមួយគណៈប្រតិភូទាំងនោះ ប៉ុន្តែអ្នកទាំងនោះបានបដិសេធ៕ សារុន