មិនដល់មួយសប្ដាហ៍ផងបន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសគម្រោងបញ្ចុះតម្លៃអគ្គិសនីដែលកម្មករកាត់ដេរត្រូវបង់នៅក្នុងរាជធានីភ្នំពេញ សាលារាជធានីបានរៀបចំវេទិការសាធារណៈចំនួន១២កាលពីម្សិលមិញ ដើម្បីពិភាក្សាអំពីគម្រោងបង់ថ្លៃអគ្គិសនីថ្មី ដែលស្ថិតក្រោមការគ្រប់គ្រងរបស់អគ្គិសនីកម្ពុជា (EDC)។
នៅក្នុងកិច្ចខិតខំប្រឹងប្រែងដើម្បីទប់ស្កាត់ម្ចាស់ផ្ទះកុំឲ្យទទួលបានប្រាក់ចំណេញច្រើនហួសហេតុពីការលក់អគ្គិសនីបន្តទៅឲ្យអ្នកជួលបន្ទប់របស់ខ្លួន រដ្ឋាភិបាលមានគម្រោងដាក់កុងទ័រផ្ទាល់ខ្លួនជូនអ្នកជួលបន្ទប់រាប់ម៉ឺននាក់នៅក្នុងរាជធានីភ្នំពេញ ដោយអ្នកជួលបន្ទប់នឹងត្រូវបង់ថ្លៃអគ្គិសនីចន្លោះពី៦១០រៀល ដល់៨២០រៀលក្នុង១គីឡូវ៉ាត់ម៉ោងដោយផ្ទាល់ទៅឲ្យ EDC។
បច្ចុប្បន្នម្ចាស់ផ្ទះដែលមានកុងទ័រអគ្គិសនីផ្ទាល់ខ្លួន បានចែកចាយអគ្គិសនីបន្តទៅឲ្យអ្នកជួលបន្ទប់ដោយយកថ្លៃអគ្គិសនីខ្ពស់ជាងអ្វីដែលខ្លួនត្រូវបង់ទៅឲ្យ EDC ។
នៅក្នុងវេទិការសាធារណៈដែលមានម្ចាស់ផ្ទះជាង២០០នាក់ ក្នុងខណ្ឌសែនសុខបានចូលរួម លោក អុឹម សោភ័ណ ប្រធាន EDC នៅក្នុងខណ្ឌនេះបានលើកឡើងថា កុងទ័រអគ្គិសនីថ្មីនឹងត្រូវតម្លើងទូទាំងរាជធានីភ្នំពេញនៅប៉ុន្មានខែខាងមុខនេះ។
លោកបានមានប្រសាសន៍ថា “យើងកំពុងតែរង់ចាំកុងទ័រភ្លើងដែលទិញពីប្រទេសថៃមក។ មានកុងទ័រភ្លើងប្រហែលពី៣០.០០០ទៅ៤០.០០០ដែលនឹងមកដល់នៅប្រហែល២ខែទៀត”។
ម្ចាស់ផ្ទះមួយចំនួនដែលមកចូលរួមនៅក្នុងវេទិការសាធារណៈនេះបានលើកឡើងថា ផែនការនេះមានគុណវិបត្តិ ព្រោះថា ទាំងម្ចាស់ផ្ទះ ទាំងអ្នកជួលបន្ទប់គឺសុទ្ធតែមិនអាចរា៉ប់រងចំពោះការចំណាយលើការដាក់កុងទ័រអគ្គិសនីថ្មី។
លោក ថាន ភារម្យ អាយុ៣៦ឆ្នាំ ដែលជាម្ចាស់ផ្ទះមួយរូបមកពីសង្កាត់ភ្នំពេញថ្មីបានលើកឡើងថា កម្មករនឹងគ្មានលទ្ធភាពក្នុងការបង់ប្រាក់ប្រហែល៧,៥០ដុល្លារ ដែល EDC តម្រូវឲ្យអ្នកជួលបន្ទប់បង់មុនពេលដាក់កុងទ័រអគ្គិសនីថ្មីឡើយ។
លោក ភារម្យ បានសួរដូច្នេះថា ” តើកម្មករនឹងបង់ប្រាក់ចំនួន៣០.០០០រៀលទៅឲ្យ EDC តាមរបៀបណាទៅ បើនៅពេលនេះពួកគេគ្រាន់តែអាចរកលុយទិញបាយត្រឹមតែ១.០០០រៀលក្នុងមួយថ្ងៃសឹងតែមិនបានផងនោះ?”។
នៅក្នុងវេទិការសាធារណៈមួយផ្សេងទៀតក្នុងខណ្ឌឫស្សីកែវ រវាងតំណាង EDC និងម្ចាស់ផ្ទះជាង៤០០នាក់នោះ ម្ចាស់ផ្ទះក៏បានសម្ដែងការជំទាស់របស់ខ្លួនដែរ។ លោក សុខ នី ជាម្ចាស់ផ្ទះជួលមួយរូបបាននិយាយថា “EDC មិនគួរធ្វើការផ្លាស់ប្ដូរអ្វីឡើយ។ ខ្ញុំនឹងយកថ្លៃភ្លើងតែបន្តិចបន្តួចប៉ុណ្ណោះមិនដូចពីមុនឡើយ”។
ប៉ុន្តែលោក គង់ ផល្លា ប្រធានសាខា EDC នៅវត្តភ្នំបានលើកឡើងថា ប្រព័ន្ធថ្មីគឺវាចាំបាច់។ លោកបានមានប្រសាសន៍ថា “គម្រោងនេះគឺដើម្បីផ្ដល់អត្ថប្រយោជន៍ដល់ពលរដ្ឋក្រីក្រ”៕ ស៊ុយឈាង