មន្ត្រីក្រសួងការពារជាតិម្នាក់បានស្នើសុំឲ្យរថយន្តដែលពាក់ស្លាកលេខកងខេមរភូមិន្ទទទួលបានការអនុគ្រោះពន្ធផ្លូវ ដោយលើកឡើងថា ការដំឡើងពន្ធនាពេលថ្មីៗនេះដោយមន្ត្រីពន្ធ អាចប៉ះពាល់ “អារម្មណ៍របស់មន្ត្រីយោធា”។
ឧត្តមសេនីយ៍ឯក ចៅ ភិរុណ អគ្គនាយកនៃអគ្គនាយកដ្ឋានសម្ភារៈបច្ចេកទេសក្រសួងការពារជាតិ ដែលបានសរសេរទៅក្រសួងហិរញ្ញវត្ថុកាលពីថ្ងៃសៅរ៍ បាននិយាយថា ការពិនិត្យរថយន្តមានស្លាកលេខកងខេមរភូមិន្ទគួរបញ្ឈប់ ក្នុងពេលដែលក្រុមមន្ត្រីមកពីក្រសួងទាំងពីរពិភាក្សាគ្នាអំពីការអនុគ្រោះពន្ធ។
លោកបាននិយាយកាលពីថ្ងៃអាទិត្យថា “ការពិនិត្យរថយន្តធុនតូចត្រូវតែផ្អាកដើម្បីដោះស្រាយបញ្ហាទាំងនេះ។ ខ្ញុំគិតថា ពន្ធផ្លូវមិនគួរដាក់ទេ ប្រសិនបើយើងគិតអំពីផលប្រយោជន៍ជាតិ”។
ឧត្តមសេនីយ៍ឯក ភិរុណ បាននិយាយថា យោធាតាមធម្មតាមិនអាចទិញរថយន្តសម្រាប់មន្ត្រី ដែលត្រូវបង្ខំចិត្តចេញប្រាក់របស់ខ្លួនផ្ទាល់ដើម្បីទិញរថយន្តធ្វើការទេ។ លោកបាននិយាយថា ដោយសារតែពន្ធផ្លូវប្រចាំឆ្នាំប្រហែល៥០០ដុល្លារមិនបង់ចំពោះរថយន្តយោធាផ្លូវការនោះ មន្ត្រីទាំងនោះក៏គួរទទួលបានការរួចពន្ធដែរ។
លោកបាននិយាយថា “ប្រសិនបើតម្រូវឲ្យបង់ពន្ធផ្លូវមែន នឹងមានផលប៉ះពាល់លើអារម្មណ៍របស់មន្ត្រីយោធាជាមិនខាន។ ដូច្នេះយើងគួររកបទបញ្ញត្តិមូលដ្ឋានមួយដើម្បីអនុវត្តទើបនឹងមិនប៉ះពាល់ដល់ប្រយោជន៍ជាតិនិងយោធា”។
ក្នុងលិខិតរបស់លោកផ្ទាល់ផ្ញើទៅក្រសួងហិរញ្ញវត្ថុអមជាមួយលិខិតរបស់លោកឧត្តមសេនីយ៍ ភិរុណ លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសនិយាយថា លោកនឹងទុកឲ្យមន្ត្រីក្រសួងការពារជាតិចរចាជាមួយមន្ត្រីពន្ធដារពាក់ព័ន្ធនឹងអត្រាពន្ធផ្លូវថ្មីនេះ។
លោក គង់ វិបុល អគ្គនាយកនៃអគ្គនាយកដ្ឋានពន្ធដារក្រសួងហិរញ្ញវត្ថុ មិនអាចទាក់ទងបានទេកាលពីថ្ងៃអាទិត្យ។
លោក សុន ឆ័យ សមាជិកសភាខាងគណបក្សប្រឆាំងបាននិយាយថា ឧត្តមសេនីយ៍ឯក ភិរុណ គឺត្រឹមត្រូវក្នុងការលើកឡើងថា ពន្ធផ្លូវមិនបានដាក់លើរថយន្តយោធាផ្លូវការ ប៉ុន្តែថា ការប្រើស្លាកលេខយោធាលើរថយន្តឯកជនគឺខុសនឹងច្បាប់។
លោក សុន ឆ័យ បាននិយាយថា “វាជាកំហុសចំពោះក្រសួងការពារជាតិក្នុងការសរសេរលិខិតបែបនេះ”។ លោកបានពន្យល់បន្ថែមថា ច្បាប់ផ្លូវអនុម័តថ្មីៗនេះហាមប្រាមការប្រើស្លាកលេខយោធាលើរថយន្តឯកជន។
លោកបាននិយាយថា “មិនបញ្ហាទេ ប្រសិនបើយានយន្តជារបស់រដ្ឋ ឬជារបស់ក្រសួងនោះ ប៉ុន្តែខ្ញុំគិតថា លិខិតនេះប្រហែលត្រូវគេផ្ញើទៅ ពីព្រោះរដ្ឋមន្ត្រីក្រសួងការពារជាតិ លោក ទៀ បាញ់ ចូលចិត្តការចេញស្លាកលេខទាំងនេះឲ្យមនុស្សជាច្រើន ឲ្យពួកគេអាចប្រើដើម្បីគេចការបង់ពន្ធនាំចូលនិងពន្ធផ្លូវ”។
លោក ខេង ទីតូ អ្នកនាំពាក្យកងរាជអាវុធហត្ថ បានបដិសេធការបកស្រាយច្បាប់របស់លោក សុន ឆ័យ។
លោកបាននិយាយថា “មិនខុសច្បាប់ទេ ពីព្រោះពួកគេប្រើប្រាក់ឯកជនរបស់ខ្លួនទិញរថយន្តដើម្បីបម្រើការងារសមូហភាពរបស់យើង។ រថយន្តទាំងអស់នោះបង់ពន្ធដោយស្របច្បាប់ ដូច្នេះពួកគេក៏បង់ពន្ធផ្លូវដែរ”៕ មានិត