ប៉ូលិសនៅក្រុងព្រះសីហនុកាលពីថ្ងៃច័ន្ទបានបញ្ជាក់ថា បុរសទី២បានរងរបួសក្នុងការវាយប្រហារហិង្សាលើមនុស្សមួយក្រុម ដែលមានទាំងអ្នកគ្រប់គ្រងក្រុមហ៊ុនចាត់ចែងលក់សំបុត្រសម្រាប់ការប្រគំតន្ត្រីកាហ្សានធីប (Kazantip) នៅសណ្ឋាគារនិងកាស៊ីណូ ឃ្វីនកូ នៅយប់ថ្ងៃសុក្រ។
បុរសរុស្ស៊ីពីរនាក់ដែលត្រូវបានចាប់ខ្លួនកាលពីព្រឹកថ្ងៃសៅរ៍ពីបទចូលរួមក្នុងការវាយប្រហារនោះ ត្រូវជាប់ចោទពាក់ព័ន្ធនឹងឧក្រិដ្ឋកម្មកាលពីល្ងាចថ្ងៃច័ន្ទ។
យោងតាមប៉ូលិសបានឲ្យដឹងថា ការវាយប្រហារនៅក្នុងសណ្ឋាគារនោះបានកើតឡើងនៅម៉ោងប្រហែល៨និង៣០នាទីយប់ថ្ងៃសុក្រ បន្ទាប់ពីមនុស្សមួយក្រុមមានគ្នា៦នាក់បានទាមទារយក៥០ភារយនៃប្រាក់ចំណូលពីការលក់សំបុត្រក្នុងការចូលកម្សាន្តសប្បាយល្បីល្បាញខាងអាសអាភាស ដែលនឹងធ្វើនៅលើកោះពស់នៅថ្ងៃពុធ ដោយពួកគេបានគំរាមថានឹងសម្លាប់ភរិយានិងកូនៗរបស់អ្នកគ្រប់គ្រង ប្រសិនបើគាត់មិនព្រមតាមលក្ខខណ្ឌរបស់ពួកគេ។
អ្នកគ្រប់គ្រងនោះ ជាជនជាតិ ម៉ូលដូវ៉ាន ឈ្មោះ វ៉្លាឌីមៀ ប៉ាឡានស៊ីកា អាយុ៣០ឆ្នាំ បានគេចខ្លួនដោយឥតរបួសស្នាម ប៉ុន្តែបុរសម៉ូលដូវ៉ានទី២ ឈ្មោះ មីហេ ប៊ុលហ្គា អាយុ២០ឆ្នាំ ត្រូវគេចាក់ចំខ្លួនហើយសម្រាកព្យាបាលនៅមន្ទីរពេទ្យ។ ប៉ូលិសបានតាមជនវាយប្រហារដល់ផ្ទះវីឡាជួលនៅសង្កាត់៣ក្រុងព្រះសីហនុ ដែលនៅទីនោះប៉ូលិសបានចាប់ខ្លួនជនសង្ស័យទី២ និងរឹបអូសបានកាំភ្លើងខ្លី កាំភ្លើងឆក់ និងអាវុធផ្សេងទៀត។
កាលពីថ្ងៃច័ន្ទ ស្នងការរងខេត្ត លោក កុល ផល្លី បាននិយាយថា បុរសទី២ដែលនៅជាមួយលោក ប៉ាឡានស៊ីកា នៅសណ្ឋាគារនោះ បានរងរបួសក្នុងការវាយប្រហារ ប៉ុន្តែថា កន្លែងស្នាក់នៅរបស់ជនរងគ្រោះមិនដឹងនៅទីណាទេ ហើយឈ្មោះ សញ្ជាតិនិងអាយុ ក៏គាត់មិនដឹងដែរ។
លោក ផល្លី បាននិយាយថា “គាត់មិនបានមកប្តឹង ហើយយើងព្យាយាមស្វែងរកគាត់ ប៉ុន្តែយើងរកមិនឃើញ”។ លោកបានពន្យល់ថា គាត់ស្គាល់ភិនភាគបុរសនោះពី”ប្រភព”ជាច្រើន។
លោក ម៉ែន វណ្ណនី នាយការិយាល័យព្រហ្មទណ្ឌកម្រិតស្រាលខេត្តព្រះសីហនុ បានឲ្យដឹងដែរថា មានជនរងគ្រោះទី២។ លោកបាននិយាយថា បុរសនោះតាមសេចក្តីរាយការណ៍ឲ្យដឹងថា ត្រូវគ្រាប់ចំជង្គង់ ប៉ុន្តែដោយសាររកសំបកគ្រាប់មិនឃើញនៅសណ្ឋាគារ ដូច្នេះរបួសរបស់គាត់មិនទំនងបង្កឡើងដោយគ្រាប់កាំភ្លើងទេ។ លោកបាននិយាយថា “យើងសង្ស័យថា គាត់ត្រូវគ្រាប់កាំភ្លើងខ្សល់”។
កាលពីថ្ងៃអាទិត្យ ទាំងលោក ប៉ាឡានស៊ីកា និងលោក អីុលីយ៉ា រ៉ូសេនហ្វេល ដែលតំណាងទីភ្នាក់ងារពិគ្រោះយោបល់ច្បាប់បន្ទាន់ ជាដៃគូក្រុមហ៊ុន Lotus Tours បានអះអាងថា ការវាយប្រហារនោះដឹកនាំដោយបុរសរុស្ស៊ីម្នាក់ដែលជួលដោយពាណិជ្ជកររុស្ស៊ី ឈ្មោះ នីកូឡាយ ដូរ៉ូសេនកូ អាយុ៥៤ឆ្នាំ។
កូនប្រុសរបស់លោក ដូរ៉ូសេនកូ ឈ្មោះ អូស្តាប ដូរ៉ូសេនកូ អាយុ៣៦ឆ្នាំ បានបដិសេធកាលពីថ្ងៃអាទិត្យថា បុរសនោះមិនមែនធ្វើការឲ្យគ្រួសាររបស់លោកទេ និងបាននិយាយថា ទាំងរូបគាត់ ទាំងឪពុករបស់គាត់មិនបានជាប់ពាក់ព័ន្ធក្នុងការវាយប្រហារនោះឡើយ។
លោក រ៉ូសេនហ្វេល ដែលធ្វើជាលេខាព័ត៌មានឲ្យម្ចាស់ក្រុមហ៊ុនអភិវឌ្ឍន៍គឺលោក សេរហ្គេ ប៉ូឡុនស្គី អាយុ៤២ឆ្នាំដែរនោះ បានឲ្យដឹងតាមរយៈអីុម៉េលកាលពីថ្ងៃអាទិត្យថា ការវាយប្រហារនោះបានធ្វើឡើងដោយពួកបុរសដែលអះអាងថា ជាពួកម៉ាហ្វីយ៉ាដែលបានចាប់ផ្តើម “បាញ់និងចាក់ដោយមិនរើសមុខ”។
លោកស្នងការរង ផល្លី បាននិយាយថា បុរសទាំងពីរដែលត្រូវបានចាប់ខ្លួនកាលពីថ្ងៃសៅរ៍ គឺ អាឡិកសានដ្រ គីសេឡិវ អាយុ២៩ឆ្នាំ និង អាឡិកសេ ប៊ឺឡាកូវ អាយុ៣០ ត្រូវតុលាការក្រុងព្រះសីហនុចោទកាលពីល្ងាចថ្ងៃច័ន្ទ ពីបទប្រើអំពើហិង្សាដោយចេតនាមានស្ថានទម្ងន់ទោស និងត្រូវបញ្ជូនទៅពន្ធនាគារខេត្ត៕ មានិត