លោក អាំង មាលតី ប្រធានតុលាការក្រុងភ្នំពេញត្រូវបានផ្លាស់ប្តូរជំនួសដោយអនុប្រធានរបស់លោក គឺលោក តាំង ស៊ុនឡាយ នៅក្នុងពិធីផ្ទេរតំណែងមួយដែលប្រារព្ធឡើងនៅឯតុលាការក្រុងភ្នំពេញកាលពីរសៀលថ្ងៃនេះ។
ការដកតំណែងលោក អាំង មាលតីចេញពីតុលាការក្រុងភ្នំពេញ បានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានរិះគន់ធ្ងន់ៗទៅលើចំណាត់ការរបស់តុលាការក្រុងភ្នំពេញដែលបានដោះលែងឲ្យនៅក្រៅឃំុឪពុកម្តាយរបស់ជនរត់គេចខ្លួន ថោង សារ៉ាត់ ដែលត្រូវប៉ូលិសតាមចាប់ខ្លួនពីបទផ្តើមគំនិតបាញ់សម្លាប់ឧកញ៉ា អឹុង ម៉េងជឺ កាលពីខែវិច្ឆិកា។
លោក គឹម សន្តិភាព អ្នកនាំពាក្យក្រសួងយុត្តិធម៌បានមានប្រសាសន៍ក្រោយពីពិធីផ្ទេរតំណែងនោះថា ឧត្តមក្រុមប្រឹក្សានៃអង្គចៅក្រម កំពុងធ្វើកិច្ចការនេះ។ លោក សន្តិភាព បានមានប្រសាសន៍ថា “យើងកំពុងធ្វើអធិការកិច្ចបន្តទៀត”។
លោក អាំង មាលតី ត្រូវបានផ្ទេរភារកិច្ចទៅធ្វើការនៅឯក្រសួងយុត្តិធម៌។ លោក មាលតី ក៏ជាអតីតប្រធានតុលាការខេត្ត បន្ទាយ មានជ័យ មុននឹងលោកត្រូវផ្លាស់ប្តូរមកទីក្រុងភ្នំពេញកាលពីខែមេសា ឆ្នាំ ២០១៤។ហើយលោកក៏ធ្លាប់ធ្វើជាប្រធានតុលាការខេត្តសៀម រាប ផងដែរ។
កាលពីម្សិលមិញ លោក ហ៊ុន សែន បានមានប្រសាសន៍ថា ល្បឿននៃការដោះលែងលោក ថោង ចំរើន ជាឪពុករបស់ថោង សារ៉ាត់ និងម្តាយរបស់គាត់គឺអ្នកស្រី កែវ សាវី ឲ្យនៅក្រៅឃំុ កាលពីថ្ងៃទី៧ខែកុម្ភៈ គឺគួរឲ្យមានការសង្ស័យ។ ពួកគេបានជាប់ពន្ធនាគារពីបទកាន់កាប់អាវុធខុសច្បាប់កាលពីថ្ងៃទី៧ខែធ្នូ បន្ទាប់ពីប៉ូលិសបានឆែកឆេរគេហដ្ឋានក្នុងក្រុងភ្នំពេញរបស់ពួកគេហើយបានរកឃើញអាវុធនិងគ្រាប់កាំភ្លើងជាច្រើន។