នគរបាលខេត្តរតនគិរីបានស្វែងរក និងព្យាយាមចាប់ខ្លួនអ្នកស្វែងរកសិទ្ធិជ្រកកោនជនជាតិដើមភាគតិចម៉ុងតាញ៉ាមួយក្រុមមានគ្នា៩នាក់ ដែលកំពុងលាក់ខ្លួនក្នុងព្រៃនៃស្រុកលំផាត់កាលពីម្សិលមិញ បន្ទាប់ពីជាជនជាតិដើមភាគតិចម៉ុងតាញ៉ាប្រាំពីរនាក់ទៀតបានឆ្លងចូលក្នុងខេត្តនេះកាលពីថ្ងៃច័ន្ទ។
លោក សយ ថៃ អធិការនគរបាលស្រុកលំផាត់បានមានប្រសាសន៍ថា មន្ត្រីរបស់លោកកំពុងស្វែងរកមនុស្សមួយក្រុមមានគ្នាប្រាំបួននាក់នេះយ៉ាងសកម្ម បន្ទាប់ពីពួកគេបានគេចខ្លួន។ លោកបានមានប្រសាសន៍ថា ”ខ្ញុំបានដឹកនាំកម្លាំងស្វែងរកជនទាំងនេះនៅក្នុងព្រៃ” ហើយលោកបានបដិសេធមិនធ្វើអត្ថាធិប្បាយបន្ថែមទេ។
អ្នកភូមិជនជាតិដើមភាគតិចចារ៉ាយម្នាក់ដែលសុំមិនបញ្ចេញឈ្មោះ ដោយបារម្ភពីការរករឿងបាននិយាយថា នគរបាលមកដល់ភូមិជ្រៃក្នុងឃុំសេដា ស្ថិតក្នុងស្រុកនេះនៅម៉ោងប្រហែល១សៀល។
គាត់បាននិយាយថា ខ្ញុំបានឃើញនគរបាល១៣នាក់ និងរថយន្តបីគ្រឿងមកដល់ភូមិនេះ។ បន្ទាប់មកពួកគេបានដើរចូលក្នុងព្រៃ ហើយព្យាយាមចាប់ជនជាតិដើមភាគតិចម៉ុងតាញ៉ាទាំងប្រាំបួននាក់ ដែលបានរត់គេចខ្លួន”។
អ្នកភូមិជនជាតិដើមភាគតិចចារ៉ាយម្នាក់ទៀត ដែលបានជួយអ្នកស្វែករកសិទ្ធិជ្រកកោនចាប់តាំងពីពួកគាត់មកដល់ដំបូងក្នុងខេត្តនេះកាលពីចុងឆ្នាំមុននោះ បាននិយាយថា គាត់និងអ្នកភូមិដទៃទៀតបានស្វែងរកមនុស្សប្រាំនាក់ក្នុងចំណោមពួកគាត់ទាំង៩នាក់។ គាត់បាននិយាយថា គាត់មិនប្រាកដពីជោគវាសនារបស់មនុស្សបួននាក់ផ្សេងទៀតនោះឡើយ។
គាត់បាននិយាយថា “យើងទើបតែទទួលបានព័ត៌មានពីក្រុមអ្នកភូមិថា នគរបាលបានចាប់ខ្លួនមនុស្សបួននាក់ ហើយយើងមិនដឹងថា គេបញ្ជូនពួកគាត់ទៅទីណានោះឡើយ”។
មន្ត្រីស្រុក និងមន្ត្រីខេត្តមួយចំនួនបានបដិសេធមិនធ្វើអត្ថាធិប្បាយ ឬលើកឡើងថា ពួកគេមិនដឹងថា តើជនទាំងបួននាក់នេះត្រូវបានចាប់ខ្លួនឬយ៉ាងណានោះឡើយ។
យោងតាមលោក ឆាយ ធី អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តនេះបានឲ្យដឹងថា ជនជាតិដើមភាគតិចម៉ុងតាញ៉ាប្រាំពីរនាក់ទៀត ដែលជាក្រុមជនជាតិដើមភាគតិចមកពីតំបន់ខ្ពង់រាបភាគកណ្ដាលប្រទេសវៀតណាមនោះ បានមកដល់ស្រុកអូរយ៉ាដាវក្នុងខេត្តនេះកាលពីថ្ងៃច័ន្ទ។
ការមកដល់ថ្មីរបស់ក្រុមនេះបានធ្វើឲ្យចំនួនជនជាតិដើមភាគតិចម៉ុងតាញ៉ាសរុបឡើងដល់៤៥នាក់ហើយ ដែលលោកលើកឡើងថា ពួកគេបានរត់គេចខ្លួនពីការធ្វើទុក្ខបុកម្នេញផ្នែកសាសនា និងនយោបាយក្នុងប្រទេសវៀតណាម។
បេសកកម្មរបស់អង្គការសហប្រជាជាតិដើម្បីជួបជនជាតិដើមភាគតិចម៉ុងតាញ៉ាទាំងនេះកាលពីសប្ដាហ៍មុន បានបញ្ចប់បន្ទាប់ពីអាជ្ញាធរមូលដ្ឋានមិនអនុញ្ញាតឲ្យអង្គការសហប្រជាជាតិធ្វើដំណើរក្នុងខេត្តនេះបើគ្មានការអនុញ្ញាតពីអភិបាលខេត្ត និងក្រសួងមហាផ្ទៃ។
លោកស្រី វ៉ាន ហៀលី តំណាងប្រចាំប្រទេសនៃការិយាល័យឧត្ដមស្នងការសហប្រជាជាតិទទួលបន្ទុកសិទ្ធិមនុស្សបានមានប្រសាសន៍កាលពីម្សិលមិញថា ការពិតគឺថា បេសកកម្មនេះត្រូវបានរារាំងមិនឲ្យព្យាយាមជួយអ្នកស្វែងរកសិទ្ធិជ្រកកោនទាំងនេះឲ្យពួកគាត់ដាក់ពាក្យសុំសិទ្ធិជាជនភៀសខ្លួន ឆ្លុះបញ្ចាំងឲ្យឃើញពីចរិតនៃអភិបាលកិច្ចរបស់ប្រទេសកម្ពុជាសព្វថ្ងៃនេះ។
បន្ថែមទៅនឹងជនជាតិដើមភាគតិចម៉ុងតាញ៉ាក្នុងខេត្តរតនគិរី នាយកដ្ឋានជនភៀសខ្លួនក្រសួងមហាផ្ទៃ កំពុងពិនិត្យមនុស្ស១៣នាក់ទៀត ដើម្បីកំណត់ថា តើពួកគេមានគុណសម្បត្តិគ្រប់គ្រាន់ក្នុងការទទួលបានឋានៈជាជនភៀសខ្លួនឬយ៉ាងណានោះ។
មនុស្សប្រាំពីរនាក់ទៀតកំពុងរង់ចាំនៅក្នុងរាជធានី ដើម្បីឲ្យនាយកដ្ឋានជនភៀសខ្លួនអនុញ្ញាតឲ្យពួកគាត់ចុះឈ្មោះសម្រាប់ដំណើរការស្វែងរកសិទ្ធិជ្រកកោន។
លោកស្រី លី បានមានប្រសាសន៍ថា មនុស្សបីនាក់ទៀតបានមកដល់រាជធានីភ្នំពេញកាលពីថ្ងៃទី១២ ខែកុម្ភៈ។ លោកស្រីបានមានប្រសាសន៍ថា “ក្រុមនេះមិនត្រូវបានអនុញ្ញាតឲ្យចុះឈ្មោះទេ”។
លោក កែម សារិន ប្រធាននាយកដ្ឋានជនភៀសខ្លួន និងលោក ខៀវ សុភ័គ អ្នកនាំពាក្យក្រសួងមហាផ្ទៃបានបដិសេធមិនធ្វើអត្ថាធិប្បាយឡើយ៕ សារុន (រាយការណ៍បន្ថែមដោយ Chris Mueller)