កាលពីម្សិលមិញ លោកនាយករដ្ឋមន្ត្រី ហ៊ុន សែន បានចូលរួមរំលែកទុក្ខចំពោះការទទួលមរណភាពរបស់លោក លី ក្វាន់យូ អតីតនាយករដ្ឋមន្ត្រីសិង្ហបុរី ដែលបានទទួលមរណភាពពេលទៀបភ្លឺឈានចូលថ្ងៃច័ន្ទ ក្នុងអាយុ៩១ឆ្នាំ។
ពេលថ្លែងនៅក្នុងពិធីសម្ពោធសណ្ឋាគារសុខាភ្នំពេញ លោក ហ៊ុន សែន បានរំឭកឡើងវិញពីឥទ្ធិពលរបស់លោក លី ក្វាន់យូ លើទិដ្ឋភាពនយោបាយនៃតំបន់អាស៊ីអាគ្នេយ៍។
លោក ហ៊ុន សែន បានមានប្រសាសន៍ថា “តាងនាមឲ្យរដ្ឋាភិបាលកម្ពុជា និងពលរដ្ឋខ្មែរ ខ្ញុំសូមចូលរួមរំលែកទុក្ខជាមួយលោកនាយករដ្ឋមន្ត្រី លី ស៊ានឡុង និងពលរដ្ឋសិង្ហបុរីទាំងមូលចំពោះការបាត់បង់លោក លី ក្វាន់យូ ដែលជាស្ថាបនិកប្រទេសសិង្ហបុរី”។
លោកនាយករដ្ឋមន្ត្រីបានមានប្រសាសន៍បន្ថែមទៀតថា “លោកមិនមែនគ្រាន់តែជាស្ថាបនិកប្រទេសសិង្ហបុរីប៉ុណ្ណោះទេ ប៉ុន្តែថែមទាំងជាសហស្ថាបនិកអាស៊ានទៀតផង”។
ពេលខ្លះទំនាក់ទំនងរបស់លោក ហ៊ុន សែន ជាមួយលោក លី ក្វាន់យូ មានភាពតានតឹង ដោយប្រទេសសិង្ហបុរី និងអាស៊ានគាំទ្រចលនាប្រដាប់អាវុធប្រឆាំងរដ្ឋាភិបាលក្រុងភ្នំពេញអំឡុងទសវត្សរ៍ឆ្នាំ១៩៨០។
យោងតាមសារទូរលេខសម្ងាត់បញ្ចេញដោយគេហទំព័រទម្លាយអាថ៌កំបាំងវីគីលីក (WikiLeaks) បានឲ្យដឹងថា កាលពីឆ្នាំ២០០៧ លោក លី ក្វាន់យូ បានថ្លែងប្រាប់ក្រុមអ្នកកាទូតសហរដ្ឋអាមេរិកថា កម្ពុជាមិនគួរទទួលបានការអនុញ្ញាតឲ្យចូលជាសមាជិកអាស៊ាននៅទសវត្សរ៍ឆ្នាំ១៩៩០ឡើយ ពីព្រោះប្រព័ន្ធនយោបាយប្រមូលផ្តុំតែទៅលើលោកនាយករដ្ឋមន្ត្រី ហ៊ុន សែន ខ្លាំងពេក”។
អំឡុងសុន្ទរកថារបស់លោកកាលពីម្សិលមិញ លោក ហ៊ុន សែន ក៏បានលើកឡើងដែរថា ការធ្វើជានាយករដ្ឋមន្ត្រីមិនមែនជាការងាយស្រួលទេ។ លោកបានមានប្រសាសន៍ថា ”តំណែងេនះមិនងាយស្រួលទេ វាពិបាកណាស់”។ លោកបានគូសបញ្ជាក់ថា លោក លន់ នល់ និង ប៉ុល ពត សុទ្ធតែជាមេដឹកនាំមិនល្អ។
លោក ហ៊ុន សែន បានលើកឡើងបន្ថែមទៀតថា លោករវល់ណាស់ក្នុងឋានៈជានាយករដ្ឋមន្ត្រី សូម្បីរកពេលទទួលការអញ្ជើញពីលោក សុខ គង់ ម្ចាស់សណ្ឋាគារសុខាដើម្បីទទួលទានអាហារនៅសណ្ឋាគារនេះ និងគយគន់ទេសភាពក៏គ្មានដែរ។
លោកបានមានប្រសាសន៍ថា “ក៏ប៉ុន្តែ ខ្ញុំមិនទាន់មានពេលទេ។ រកតែពេលស៊ីបាយនៅផ្ទះឲ្យចូលមាត់ហ្នឹង វាមិនស្រួលផង។ យូរៗបានម្តងអញ្ចឹងទៅ ប៉ុន្តែ អាការងារយូរៗម្តងេនះវាទាមទារឲ្យមានការដកចេញនូវឯកសារអាថ្ងៃសៅរ៍ និងថ្ងៃអាទិត្យ អត់ឲ្យដាក់”៕ស៊ុយឈាង និង សុខុម