ស្ថាប័នទេសន្តរប្រវេសន៍អន្តររដ្ឋាភិបាលមួយបានលើកឡើងកាលពីម្សិលមិញថា ពលរដ្ឋខ្មែរយ៉ាងហោចណាស់៥៨នាក់ បានស្ថិតក្នុងចំណោមអ្នកនេសាទទាសករជាង៣០០នាក់ ដែលត្រូវបានជួយសង្គ្រោះកាលពីពេលថ្មីៗនេះចេញពីកោះដាច់ស្រយាលមួយនៅក្នុងខេត្តម៉ាលូគូ (Maluku) ប្រទេសឥណ្ឌូណេស៊ី។
រដ្ឋាភិបាលឥណ្ឌូណេស៊ីបានជួយសង្គ្រោះអ្នកនេសាទទាំងនេះចេញពីភូមិកោះបេនជីណា (Benjina) កាលពីថ្ងៃសុក្រ ក្រោយពីការស៊ើបអង្កេតរយៈពេលរាប់ឆ្នាំដោយទីភ្នាក់ងារសារព័ត៌មាន AP ដែលបានលាតត្រដាងថា ពលករទេសន្តរប្រវេសន៍មកពីប្រទេសភូមា ឡាវ និងកម្ពុជា បានជាប់នៅលើកោះនេះ បន្ទាប់ពីត្រូវគេបង្ខំឲ្យធ្វើការនៅលើទូកនេសាទថៃដែលនេសាទក្នុងដែនសមុទ្រឥណ្ឌូណេស៊ី។
ទីភ្នាក់ងារសារព័ត៌មាន AP បានចុះផ្សាយថា អ្នកនេសាទទាសករដែលបានរងការរំលោភបំពានធ្ងន់ធ្ងរនៅលើទូកនេសាទទាំងនេះ រួមទាំងការវាយនឹងកន្ទុយត្រីបបែលផងនោះ ត្រូវបានគេទម្លាក់ចោលនៅលើកោះនេះដោយសារតែពួកគេមិនព្រមធ្វើការ និងដោយសារតែរដ្ឋាភិបាលឥណ្ឌូណេស៊ីផ្អាកសកម្មភាពនេសាទរបស់ជនបរទេសដើម្បីព្យាយាមបង្ក្រាបប្រតិបត្តិការខុសច្បាប់។
នៅលើកោះនេះ បុរសមួយចំនួនក្នុងចំណោមនេះត្រូវគេចាក់សោក្នុងទ្រុងរបស់ក្រុមហ៊ុនពូសាកា បេនជីណា រីហ្សស (Pusaka Benjina Resources) ជាក្រុមហ៊ុននេសាទចុះបញ្ជីតែមួយគត់នៅលើកោះបេនជីណា ចំណែកឯអ្នកខ្លះទៀតបានសម្ងំលាក់ខ្លួននៅក្នុងព្រៃដើម្បីរត់គេចពីអ្នកតាមចាប់ទាសករ។
យោងតាមតួលេខដែលរដ្ឋាភិបាលឥណ្ឌូណេស៊ីផ្ដល់ឲ្យអង្គការអន្តរជាតិដើម្បីទេសន្តរប្រវេសន៍ (IOM) បានបង្ហាញថា អ្នកនេសាទ៥៨នាក់ក្នុងចំណោមអ្នកនេសាទ៣១៩នាក់ ដែលត្រូវបានសង្គ្រោះចេញពីកោះបេនជីណា ហើយនាំទៅកាន់ទូអាល (Tual) ជាទីក្រុងកោះនៅភាគខាងជើង គឺជាពលរដ្ឋខ្មែរ។
លោក ចូ ឡូវរី (Joe Lowry) អ្នកនាំពាក្យ IOM បានមានប្រសាសន៍កាលពីម្សិលមិញថា ” និយាយពីពលរដ្ឋកម្ពុជា តាមសេចក្ដីរាយការណ៍ថា មានចំនួន៥៨នាក់កំពុងស្នាក់នៅក្នុងមណ្ឌលមួយរបស់រដ្ឋាភិបាលនៅទូអាល។ យើងកំពុងព្យាយាមចូលទៅឲ្យដល់អ្នកដែលនៅទីនោះឲ្យបានឆាប់តាមដែលអាចធ្វើទៅបាន។ យើងមានបញ្ហាលំបាកខ្លះខាងដឹកជញ្ជូន គ្មានយន្តហោះ ប៉ុន្តែយើងគួរតែមានអ្នកនៅលើដីនៅថ្ងៃស្អែក។ ពេលនោះ យើងនឹងអាចផ្ដល់ព័ត៌មានដែលមានការបញ្ជាក់ត្រឹមត្រូវបានហើយ”។
លោកបានមានប្រសាសន៍ទៀតថា បុគ្គលិកពីរបីនាក់មកពីការិយាល័យ IOM ប្រចាំប្រទេសឥណ្ឌូណេស៊ី បានទៅដល់ទីក្រុងទូអាលហើយ ហើយតាមការរំពឹងទុកថា លោក ស្ទីវ ហាមីលថុន (Steve Hamilton) អនុប្រធានបេសកកម្មរបស់ការិយាល័យនេះ នឹងទៅដល់នៅថ្ងៃនេះ។
លោកបានបន្តថា ” នៅពេលមន្ត្រីជាន់ខ្ពស់របស់យើងទៅដល់ទីក្រុងទូអាល ដែលប្រហែលជានៅថ្ងៃស្អែក យើងនឹងអាចបញ្ជាក់ពីចំនួន [៥៨ នាក់] នេះបាន ហើយយើងនឹងឲ្យអ្នកដឹងថាមានគម្រោងអ្វីខ្លះសម្រាប់ការការបញ្ជូនពួកគេទៅវិញ”។
ការស៊ើបអង្កេតរបស់ទីភ្នាក់ងារសារព័ត៌មាន AP បានបង្ហាញថា អ្នកនេសាទជិត១.០០០នាក់ប្រហែលជាជាប់នៅលើកោះបេនជីណា ជាកន្លែងប្រើមនុស្សឲ្យធ្វើការទាំងបង្ខិតបង្ខំ ដើម្បីចូលនេសាទក្នុងដែនសមុទ្រឥណ្ឌូណេស៊ី ដើម្បីដឹកផលនេសាទត្រឡប់ទៅកាន់ប្រទេសថៃវិញ
ជាកន្លែងដែលត្រីទាំងនេះត្រូវបាននាំចេញទៅកាន់សហរដ្ឋអាមេរិក អឺរ៉ុប និងកន្លែងផ្សេងៗទៀតនៅអាស៊ី។
លោក ប្រេដ ឌីកសុន (Brett Dickson) ប្រធានគម្រោងរបស់ IOM នៅក្នុងរាជធានីភ្នំពេញ បានមានប្រសាសន៍ថា តាមការរំពឹងទុកថា អ្នកបកប្រែភាសាជនជាតិកម្ពុជា ម្នាក់មកពីការិយាល័យរបស់លោក ក៏នឹងទៅដល់ទីក្រុងទូអាលនៅថ្ងៃនេះដែរ ដើម្បីជួយបញ្ជូនពលរដ្ឋកម្ពុជាទាំងនេះត្រឡប់មកវិញ។
លោកបានមានប្រសាសន៍ទៀតថា ” វាពិតជាច្រើនណាស់បើនិយាយពីចំនួន។ ខ្ញុំគិតថា ទំនងជាមាន [ពលរដ្ឋកម្ពុជា] ជាច្រើនទៀតដែលនៅទីនោះ [លើកោះបេនជីណា]”។
ជារៀងរាល់ឆ្នាំ មានពលករទេសន្តរប្រវេសន៍កម្ពុជា រាប់ពាន់នាក់ទៅស្វែងរកការងារធ្វើក្នុងប្រទេសថៃ ហើយភាគច្រើនក្នុងចំណោមអ្នកទាំងនោះបានចូលប្រទេសនេះដោយគ្មានឯកសារត្រឹមត្រូវ បន្ទាប់ពីបង់លុយឲ្យមេខ្យល់ជួយនាំពួកគេឆ្លងដែនចូលទៅក្នុងប្រទេសថៃ ដោយសន្យាផ្តល់ការងារដែលមានប្រាក់ខែខ្ពស់។នៅពេលពួកគេទៅដោយគ្មានឯកសារត្រឹមត្រូវ វាធ្វើឲ្យពួកគេងាយរងគ្រោះដោយសារការបង្ខំឲ្យធ្វើការដូចជានៅលើទូកនេសាទថៃ ជាដើម”។
លេខារបស់លោក ខាន់ ផារិទ្ធ ឯកអគ្គរដ្ឋទូតកម្ពុជា ប្រចាំប្រទេសឥណ្ឌូណេស៊ី ដែលបានប្រាប់ឈ្មោះត្រឹម លីយ៉ា (Lia) បានលើកឡើងថា ក្រុមមួយមកពីស្ថានទូតកម្ពុជា ប្រចាំនៅទីក្រុងហ្សាការតា ក៏ត្រូវបានបញ្ជូនទៅដែរដើម្បីស្វែងយល់បន្ថែមទៀតថា តើមាន
ពលរដ្ឋរបស់ខ្លួនបន្ថែមទៀតជាប់លើកោះបេនជីណា នៅឡើយ ឬយ៉ាងណា។ លោកស្រីបានមានប្រសាសន៍ថា ស្ថានទូតមិនអាចធ្វើអត្ថាធិប្បាយបន្ថែមទៀតបានទេ ពីព្រោះស្ថានទូតមិនទាន់បានវាយតម្លៃពីស្ថានភាពនេះទាំងស្រុងនៅឡើយ។
ចំណែកឯលោក កុយ គួង អ្នកនាំពាក្យក្រសួងការបរទេសកម្ពុជាមិនអាចទាក់ទងសុំការបំភ្លឺបានទេទាក់ទិនបញ្ហានេះ៕ សុខុម