មេភូមិមួយរូបនៅក្នុងខេត្តកោះកុងកំពុងគំរាមបណ្តេញអង្គការការពារបរិស្ថានមួយចេញពីតំបន់របស់ខ្លួន ជុំវិញការចោទប្រកាន់ពីបទញុះញង់ ប្រសិនបើការតវ៉ាប្រឆាំងនឹងក្រុមហ៊ុនបូមខ្សាច់មួយមានភាពតានតឹងកាន់តែខ្លាំងឡើងនោះ។
កាលពីពីរបីសប្តាហ៍មុន អង្គការមាតាធម្មជាតិបានជួយអ្នកនេសាទនៅក្នុងស្រុកកោះកុងក្នុងការព្យាយាមបណ្តេញសាឡង់បូមខ្សាច់ដែលកំពុងបូមខ្សាច់នៅជុំវិញកោះកាពិ ចេញពីតំបន់របស់ខ្លួន។ អ្នកនេសាទបានចោទប្រកាន់អ្នកបូមខ្សាច់របស់ក្រុមហ៊ុន Rainbow International ថា បានបូមខ្សាច់ដោយខុសច្បាប់ហួសពីតំបន់គេអនុញ្ញាតឲ្យ និងកំពុងបំផ្លាញជម្រកត្រីពងដែលជាកន្លែងពួកគាត់ប្រកបរបរចិញ្ចឹមជីវិតនោះ។
ការបូមខ្សាច់ត្រូវបានផ្អាកចាប់តាំងពីអាជ្ញាធរខេត្តបានចេញបទបញ្ជាឲ្យក្រុមហ៊ុននេះផ្អាកប្រតិបត្តិការរបស់ខ្លួនកាលពីសប្តាហ៍មុនមក។
កាលពីម្សិលមិញ លោក ម្លិះ ឈាង មេភូមិកោះសាឡៅ នៅក្នុងឃុំកាពិ បានលើកឡើង ថា ថ្នាក់ក្រោមរបស់លោកបានរៀបចំដាក់ពាក្យបណ្តឹងដោយចោទប្រកាន់សកម្មជនរបស់អង្គការមាតាធម្មជាតិថាបានញុះញង់អ្នកនេសាទ។ ពាក្យបណ្តឹងនេះគឺស្នើឲ្យមានការបណ្តេញសកម្មជនរបស់អង្គការនេះចេញពីតំបន់នេះ ហើយលោក ម្លិះ ឈាង បានលើកឡើងថា លោកនឹងបញ្ជូនពាក្យបណ្តឹងនេះទៅកាន់អាជ្ញាធរឃុំ និងស្រុក ប្រសិនបើការតវ៉ារបស់អ្នកភូមិឈានទៅដល់ការផ្ទុះអំពើហិង្សានោះ។
លោកបានមានប្រសាសន៍ថា ” យើងគ្រាន់តែរៀបចំវាទុកជាមុនប៉ុណ្ណោះ ខ្លាចក្រែងមានអំពើហិង្សាកើតឡើង ព្រោះពួកគេ [សកម្មជន] បានមកទី នេះ ហើយបង្កភាពចលាចល។ ខ្ញុំនៅមិនទាន់បញ្ជូនលិខិតទៅ ព្រោះយើងកំពង់តាមដានស្ថានភាពនៅឡើយ ហើយអំពើហិង្សាក៏នៅមិនទាន់កើតមាននៅឡើយដែរ”។
លិខិតច្បាប់ចម្លងមួយច្បាប់ ដែលគេទទួលបានកាលពីម្សិលមិញ បានចោទប្រកាន់អង្គការមិនមែនរដ្ឋាភិបាលនេះថា បានញុះញង់អ្នកភូមិ បានរំលោភច្បាប់ដែលគេមិនបង្ហាញឲ្យដឹង និងរារាំងការអភិវឌ្ឍក្នុងមូលដ្ឋាន។ លោក ម្លិះ ឈាង បានលើកឡើងថា ក្រុមហ៊ុន Rainbow International បានចាប់ផ្តើមស្ថាបនាផ្លូវដីនៅក្នុងឃុំនេះ ។
លោក ស៊ុន ម៉ាឡា សហស្ថាបនិក អង្គការមាតាធម្មជាតិ ដែលបានចូលរួមជាមួយអ្នកនេសាទអំឡុងការតវ៉ាបានលើកឡើងថា លោកបានឃើញរូបថត ដែលអ្នកភូមិទទួលយកលិខិត អំឡុងការជួបប្រជុំមួយជាមួយមន្ត្រីមូលដ្ឋានកាលពីចុងសប្តាហ៍ ហើយថា លោកនឹងតស៊ូចំពោះការប៉ុនប៉ងណាមួយដែលមានបំណងបណ្តេញលោកចេញ។
លោកបានមានប្រសាសន៍ថា “យើងនឹងមិនចាកចេញឡើយ ព្រោះយើងមិនធ្វើអ្វីខុសទេ។ យើងមិនបានញុះញង់អ្នកភូមិឡើយ។ យើងគ្រាន់តែរួមដៃជាមួយអ្នកភូមិការពារធម្មជាតិ ដែលកំពុងត្រូវបានបំផ្លិចបំផ្លាញដោយការបូមខ្សាច់ប៉ុណ្ណោះ”។
អង្គការមាតាធម្មជាតិ ក៏ធ្លាប់ធ្វើឲ្យអាជ្ញាធរខឹងសម្បារផងដែរកាលពី ពេលមុន។
កាលពីខែកុម្ភៈ រដ្ឋាភិបាលបាននិរទេសសហស្ថាបនិកមួួយរូបផ្សេងទៀតរបស់អង្គការនេះ គឺលោក អាឡិច ហ្គនហ្សាឡេស ដេវីដសុន (Alex Gonzalez-Davidson) បន្ទាប់ពីបដិសេធមិនព្រមពន្យារទិដ្ឋាការឲ្យសហស្ថាបនិករូបនេះពាក់ព័ន្ធនឹងការបិទផ្លូវដោយខុសច្បាប់ ដែលអង្គការនេះបានបង្កើតឡើងនៅខេត្តកោះកុង ដើម្បីប្រឆាំងនឹងគម្រោងទំនប់វារីអគ្គិសនីនោះ។
អង្គការមិនមែនរដ្ឋាភិបាលនេះ បានចោទ ប្រកាន់រដ្ឋាភិបាលថាបានសងសឹកចំពោះសកម្មភាពរបស់ខ្លួនដែលកំពុងលើកកម្ពស់ការយល់ដឹងក្នុងចំណោមសហគមន៍មូលដ្ឋានឲ្យប្រឆាំងនឹងគម្រោងវារីអគ្គិសនីនេះ ៕ ស៊ុយឈាង