30 C
Phnom Penh

គ្រួសារ​ទាហាន​និង​អតីត​យុទ្ធជន​​ស្នើសុំអន្តរាគមន៍ពាក់ព័ន្ធវិវាទដីធ្លី​ ជាមួយ​​ក្រសួង​ការពារ​ជាតិ

ដោយ ឌឹ ខេមបូឌា ដេលី

បទវិភាគ

តំណាង​អ្នកភូមិ​២៩គ្រួសារដែល​​​បាន​ជាប់ពាក់ព័ន្ធក្នុង​វិវាទដីធ្លី​ជាមួយ​​ក្រសួង​ការ​ពារ​ជាតិ​​នៅក្នុង​រាជធានី​ភ្នំពេញ​បាន​ទៅ​កាន់រដ្ឋសភា​កាលពី​ម្សិលមិញ​ ស្វែងរក​ការ​ឆ្លើយ​តប​ចំពោះ​ញត្តិ​ដែលពួកគាត់​បាន​ដាក់​កាលពី​ខែមុន​​​ស្នើសុំ​​អន្តរាគមន៍។

តំណាងគ្រួសារដែលមានជម្លោះដីធ្លីជាមួយក្រសួងការពារជាតិប្រមូលផ្តុំគ្នានៅខាងក្រៅសភាក្នុងក្រុងភ្នំពេញកាលពីម្សិលមិញ។ រូបថតៈ ស៊ីវ ចាន់ណា
តំណាងគ្រួសារដែលមានជម្លោះដីធ្លីជាមួយក្រសួងការពារជាតិប្រមូលផ្តុំគ្នានៅខាងក្រៅសភាក្នុងក្រុងភ្នំពេញកាលពីម្សិលមិញ។ រូបថតៈ ស៊ីវ ចាន់ណា

​​អ្នក​តំណាង​បាននិយាយ​ថា វិវាទរវាង​ទាហាន​និង​អតីតយុទ្ធជន​៤៨គ្រួសារ​និង​​ក្រសួង​ការ​ពារ​ជាតិ​បាន​ចាប់ផ្តើម​កាលពី​ដើម​ឆ្នាំនេះ​បន្ទាប់ពី​​ក្រសួង​​បាន​លក់​ឃ្លាំងមួយ​​​នៅក្នុង​ខណ្ឌសែន​សុខ និង​ដី​ទំហំ​៤ហិកតា​ដែលគ្រួសារ​ទាំងនេះ​បាន​រស់នៅ​ចាប់តាំងពី​​ទស​វត្សរ៍ឆ្នាំ​១៩៨០ ទៅ​ឲ្យ​ក្រុមហ៊ុន​ចិន។

លោក ញឹុក ហ៊ុម អាយុ​៦៧ឆ្នាំ​ជា​អ្នក​តំណាងម្នាក់បាននិយាយថា រហូត​មក​ទល់ពេល​នេះ ​អ្នកភូមិ​១៩គ្រួសារ​​បាន​ទទួលយក​​សំណង​​ពី​ក្រសួង មាន​​ទឹកប្រាក់​២.០០០ដុល្លារ​ និង​ផ្ទះ​មួយ​ខ្នង​ក្នុង​មួយ​គ្រួសារ​នៅក្នុង​​ស្រុក​ឧដុង្គ ខេត្ត​កំពង់ស្ពឺ។

លោក ហ៊ុម ដែលលើកឡើង​ថា លោក​បានរស់នៅ​លើ​ដីនេះ​ចាប់តាំង​ពី​ឆ្នាំ​១៩៨០ នៅ​ពេល​​លោកបានកាន់​កាប់​កន្លែង​នេះ ដែលគេ​ស្គាល់​​ថា ជា​ឃ្លាំង​​K-៨នោះ​បាននិយាយ​ថា ពួកគាត់​​​១៩គ្រួសារ​​មិន​ពេញ​ចិត្ត​​នឹង​ការ​ផ្តល់សំណង​នេះទេ ប៉ុន្តែក្នុង​នាមជា​បុគ្គលិកក្រសួង​ ពួក​គាត់​គិត​ថា ត្រូវទទួល​យក។

លោក​បាននិយាយ​ថា “​ពួកគាត់​​ជា​បុគ្គលិក ហើយ​ពួកគាត់​មិនមាន​ជម្រើស​ទេ ពីព្រោះ​ចៅ​ហ្វាយ​របស់ខ្លួន​បានដាក់​សម្ពាធ​លើ​ខ្លួន​”។

លោក​បាននិយាយ​ថា អ្នកភូមិ​២៩គ្រួសារ​ទៀត​​បានទាមទារ​​ប្រាក់សំណង​ ៣០.០០០​ដុល្លារ​ក្នុង​មួយ​គ្រួសារ​។

អ្នកស្រី អឹុម សុផាន អាយុ​៤០ឆ្នាំ​ជា​តំណាង​ម្នាក់ទៀត​​បាននិយាយ​ថា ​ពួកគាត់​បានដាក់​ញត្តិ​ទៅ​រដ្ឋសភា​ប្រហែល​មួយ​ខែមក​ហើយ ហើយ​បាន​ត្រឡប់មក​កាលពីម្សិលមិញ​នោះ​ដើម្បី​ពិនិត្យ​ស្ថាន​ភាព​នេះ។

អ្នកស្រីបាននិយាយ​ថា មន្ត្រី​រដ្ឋបាល​ម្នាក់​​ដែលមិន​ប្រាប់ឈ្មោះនោះ​ បាន​​ផ្តល់​លិខិត​ថត​ចម្លង​មួយ​ច្បាប់ដល់​អ្នកដាក់ញត្តិ​ទាំងនេះដែល​បាន​ពី​គណៈកម្មការ​សិទ្ធិ​​មនុស្ស​រដ្ឋសភា ដើម្បី​ផ្ញើ​ជូន​លោក ទៀ បាញ់ រដ្ឋមន្ត្រីក្រសួង​ការ​ពារ​ជាតិ​អំពី​វិវាទនេះ។

លិខិត​ដែលចុះ​ហត្ថលេខាដោយលោក អេង ឆៃអ៊ាង សមាជិក​សភា​គណបក្ស​សង្គ្រោះ​ជាតិ ជាប្រធាន​គណៈកម្មការ​នេះ​​កាលពី​ថ្ងៃទី​៨ ខែមេសា និង​លោក ហេង សំរិន​ប្រធាន​រដ្ឋសភា​កាលពី​ថ្ងៃ​ទី​​២០ ខែមេសា សុំឲ្យ​រដ្ឋមន្ត្រីក្រសួង​ការ​ពារ​ជាតិដោះស្រាយ​​វិវាទនេះ​ ឬ​ផ្តល់​សំណង​សមរម្យ​ដល់គ្រួសារ​ទាំងនេះ។

យោង​តាម​លិខិត​នេះ​បានឲ្យ​ដឹង​ថា គណៈកម្មការ​សិទ្ធិមនុស្ស​​បានចុះទៅ​មើល​កន្លែង​​ដែល​មាន​វិវាទនោះកាលពី​ថ្ងៃទី​២០ ខែមីនាដើម្បី​ជួប​ជាមួយអ្នក​ដែលមាន​វិវាទ និង​សើុប​អង្កេត​​ករណីនេះ​។

នៅពេល​ត្រូវ​បានទាក់ទង​កាលពី​ម្សិលមិញ លោក អេង ឆៃអ៊ាង បាន​អះ​អាង​ថា លោក​បាន​ផ្ញើ​​លិខិត​នេះ​ទៅ​ឧត្តម​សេនីយ៍​ ទៀ បាញ់ ហើយ​កាលពី​ដើមសប្តាហ៍នេះ ហើយ​បាន​លើក​ឡើង​ថា លោក​ជឿថា គ្រួសារ​ទាំងនេះ​​ត្រូវ​ទទួលបាន​សំណង​បន្ថែម​។

លោក​បាននិយាយ​ថា “ក្រសួង​ការ​ពារ​ជាតិ​​គួរ​រក​ដំណោះស្រាយ​​សម្រាប់គ្រួសារ​ទាំងនេះ​ពីព្រោះ​ពួកគាត់​បាន​រស់នៅ​​ទីនោះ​យូរ​មក​ហើយ”។

ទោះ​យ៉ាងណា ឧត្តម​សេនីយ៍ ទៀ បាញ់ ​បានមាន​ប្រសាសន៍ថា លោក​មិន​ដឹង​ពី​វិវាទ​នេះទេ។លោក​បានបន្ថែមថា “ខ្ញុំ​​មិន​ទាន់​ទទួល​បាន​លិខិត​ពី​រដ្ឋសភានៅឡើយ​ទេ ហើយ​ខ្ញុំ​មិន​ដឹង​​ថា វិវាទដីធ្លីនេះ​បាន​កើត​ឡើង​ឡើយ…​ប៉ុន្តែ​​ខ្ញុំគិត​ថា ព័ត៌មាន​នេះ​មិន​ពិត​ឡើយ”៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស