អ្នកនាំពាក្យក្រសួងរៀបចំដែនដីម្នាក់បានមានប្រសាសន៍កាលពីម្សិលមិញថា អគ្គនាយកដ្ឋានលំនៅដ្ឋានដែលត្រូវបានបង្កើតកាលពីពេលថ្មីៗរបស់ក្រសួងរៀបចំដែនដី នគរូបនីយកម្មនិងសំណង់ បានចាប់ផ្តើមព្រាងផែនការដែលអនុញ្ញាតឲ្យរដ្ឋាភិបាលសាងសង់លំនៅដ្ឋានដល់គ្រួសារមានប្រាក់ចំណូលទាប ដែលមិនអាចរកប្រាក់សង់លំនៅដ្ឋានបាន។
លោក សេង ឡូត អ្នកនាំពាក្យបានមានប្រសាសន៍ថា “យើងនឹងលក់លំនៅដ្ឋានក្នុងតម្លៃទាបដល់គ្រួសារក្រីក្រ បើមិនដូច្នោះទេ យើងនឹងផ្តល់ជូនពួកគាត់ដោយឥតគិតថ្លៃតែម្តង អាស្រ័យលើស្ថានភាពរបស់ប្រជាពលរដ្ឋ”។
លោក ម៉េង ឡូត បានមានប្រសាសន៍ថា នាយកដ្ឋានលំនៅដ្ឋានដែលត្រូវបានបង្កើតឡើងកាលពីខែធ្នូ កំពុងស្ថិតក្នុងដំណាក់កាលដំបូងនៅឡើយដើម្បីកំណត់ពីផែនការរបស់ខ្លួន ហើយមិនទាន់សម្រេចថា តើនឹងសាងសង់លំនៅដ្ឋាននៅកន្លែងណា ឬចំណាយប្រាក់អស់ប៉ុន្មាននោះឡើយ។
លោកបានមានប្រសាសន៍ថា “យើងមិនទាន់កំណត់តម្លៃជាក់លាក់នៅឡើយទេសម្រាប់លំនៅដ្ឋានទាំងនោះ ពីព្រោះឥឡូវនេះយើងកំពុងធ្វើការសិក្សា និងប្រមូលទិន្នន័យដើម្បីស្វែងយល់ថា តើមានប្រជាពលរដ្ឋប៉ុន្មានត្រូវការលំនៅដ្ឋាន ហើយតម្លៃប៉ុន្មានដែលអាចទទួលយកបាននោះ”។
លោក ម៉េង ឡូត បានមានប្រសាសន៍បន្ថែមថា ក្រសួងក៏មិនទាន់កំណត់ថា តើប្រាក់សម្រាប់សាងសង់លំនៅដ្ឋានទាំងនេះនឹងបានមកពីថវិកាជាតិ ឬកម្ចីធនាគារនោះឡើយ។
លោក សៀ ភារម្យ នាយកប្រតិបត្តិក្រុមការងារពិសេសសិទ្ធិលំនៅដ្ឋានបានមានប្រសាសន៍ថា លោកស្វាគមន៍ផែនការនេះ ប៉ុន្តែបានសង្កត់ធ្ងន់ថា ការសង់លំនៅដ្ឋានរបស់រដ្ឋាភិបាល ជាពិសេសនៅក្នុងរាជធានីភ្នំពេញនោះ ចាំបាច់ត្រូវបានតម្លៃទាបជាងតម្លៃទីផ្សារដែលអ្នកគ្រួសារក្រីក្រអាចទទួលយកបាន។
លោកបានមានប្រសាសន៍ថា “យើងដឹងរួចទៅហើយថា ទីផ្សារលំនៅដ្ឋាននៅក្នុងក្រុងគឺអាចរកទិញបានសម្រាប់គ្រួសារមានចំណូលមធ្យមតែប៉ុណ្ណោះ។ ប៉ុន្តែប្រសិនបើរដ្ឋាភិបាលសង់លំនៅដ្ឋាន ហើយលក់ឲ្យពួកគាត់ក្នុងតម្លៃតិចជាង ៣០.០០០ដុល្លារនោះ ខ្ញុំគិតថា នេះគឺជាគោលនយោបាយល្អ”៕ សារុន