ក្រុមមន្ត្រីបាននិយាយកាលពីម្សិលមិញថា ជនជាតិវៀតណាមបីនាក់ត្រូវបានចាប់ខ្លួនក្នុងខេត្តក្រចេះ កាលពីយប់ថ្ងៃសៅរ៍ បន្ទាប់ពីមនុស្សនៅលើរថយន្តតាមចោទថា បានបាញ់ទៅលើអាជ្ញាធរនៅប៉ុស្តិ៍ត្រួត ពិនិត្យមួយ មុនពេលគេចខ្លួនឆ្លងព្រំដែនទៅប្រទេសវៀតណាម។
ប្រព័ន្ធផ្សព្វផ្សាយក្នុងស្រុកបានរាយការណ៍ថា រថយន្ត១៨គ្រឿងដឹកឈើប្រណីតបានបើកកាត់ប៉ុស្តិ៍ត្រួតពិនិត្យព្រំដែនត្រពាំងគ្រញូង ក្នុងស្រុកស្នួល ហើយអ្នករួមដំណើរបានបាញ់ទៅលើក្រុមអាជ្ញាធរ ខណៈដែលពួកគេបានឆ្លងកាត់។
លោក អុល ឆាយ មេបញ្ជាការកងរាជអាវុធហត្ថស្រុកស្នួលដែលបដិសេធមិនប្រាប់ឈ្មោះបុរសទាំងនោះបានមានប្រសាសន៍ថា “យើងបានចាប់ខ្លួនជនសង្ស័យបីនាក់ជាជនជាតិ វៀតណាម ដែលជាប់ពាក់ព័ន្ធក្នុងករណីនេះ។ លោកបានបន្ថែមថា “ពួកគេត្រូវបានឃុំខ្លួននៅទីបញ្ជាការដ្ឋានរបស់យើងដើម្បីធ្វើការសាកសួរ”។
លោក អុល ឆាយ បានមានប្រសាសន៍ថា បុរសទាំងបីនាក់ ដែលមានអាយុ ខ្ទង់៣០ឆ្នាំនោះត្រូវបានចាប់ខ្លួននៅម៉ោងប្រហែល៧ និង៣០នាទីយប់ហើយថា រថយន្តរបស់ពួកគេដែលដឹកឈើកកោះនិងឈើសុក្រមជាឈើប្រភេទលេខ១ ចំនួន១៩ម៉ែត្រគូបផងនោះត្រូវបានយកទៅរក្សាទុកនៅការិយាល័យគយនៅច្រកព្រំដែនអន្តរជាតិត្រពាំងស្រែក្បែរនោះ។
នៅពេលត្រូវបានស្នើសុំឲ្យបញ្ជាក់ពីរបាយការណ៍រថយន្ត១៧គ្រឿងដែលគេចខ្លួន ក្រោមការបាញ់ជាច្រើនគ្រាប់នោះ លោក អុល ឆាយ មិនផ្តល់ព័ត៌មានលម្អិតឡើយ។
ដោយបង្វែរសំណួរបន្ថែមទៅមន្ត្រីកងរាជអាវុធហត្ថថ្នាក់ជាតិ និងមន្ត្រីគយ ដែលលោកលើកឡើងថា កំពុងដោះស្រាយករណីនេះ លោកបានមានប្រសាសន៍ថា “យើងឃាត់បានរថយន្តតែមួយគ្រឿងប៉ុណ្ណោះ ពីព្រោះរថយន្តផ្សេងទៀតទៅបាត់អស់” ។
ឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍ថា ករណីនេះកំពុងត្រូវបាន ដោះស្រាយដោយមន្ត្រីរបស់លោក ហើយបានបដិសេធ ថាមិនមានការបាញ់ទេ។
លោកបានមានប្រសាសន៍ថា “វា មិនពិតទេ។ ខ្ញុំមិនប្រាកដពីព័ត៌មានជាក់លាក់ទេ ខ្ញុំគ្រាន់តែដឹងថា ពួកគេជាអ្នកជួញដូរឈើពីក្នុងប្រទេសចេញក្រៅប្រទេសប៉ុណ្ណោះ”។
អ្នកនាំពាក្យរូបនេះ បានផ្តល់របាយការណ៍កងរាជអាវុធហត្ថដោយលើកឡើងថា មន្ត្រីគយប្រាំនាក់ មន្ត្រីកងរាជអាវុធហត្ថលើផ្ទៃប្រទេស១០នាក់ និងមន្ត្រីកងរាជអាវុធហត្ថស្រុកស្នួលបួននាក់ប្រចាំការនៅ ច្រកព្រំដែនត្រពាំងគ្រញូង រង់ចាំរថយន្តទាំងនោះ។
ប្រតិបត្តិការនេះដឹកនាំដោយលោក ហាក់ វ័រ ប្រធានក្រុមគយចល័ត របស់ក្រសួងហិរញ្ញវត្ថុ ។ គេមិនអាចទាក់ទងលោក ហាក់ វ័រ បានទេ។
លោក វូ ឡេហា មន្ត្រីកុងស៊ុលនៅស្ថានទូតវៀតណាម ក្នុងរាជធានីភ្នំពេញបានមានប្រសាសន៍ថា លោកមិនដឹងពីការចាប់ខ្លួននេះទេ។ លោកបានមានប្រសាសន៍ថា “ខ្ញុំមិនបានទទួលព័ត៌មាននោះទេ”។
លោក សុឹម ហ៊ុន មេឃុំ ២ធ្នូ កន្លែងដែលច្រកព្រំដែនត្រពាំងគ្រញូងស្ថិតនៅនោះបានមានប្រសាសន៍ថា លោកបានឮស្នូរកាំភ្លើង កាលពីយប់ថ្ងៃសៅរ៍។
លោកបានមានប្រសាសន៍ថា “យើងមិនត្រូវបានហៅឲ្យទៅចូលរួមប្រតិបត្តិការនោះទេ ប៉ុន្តែ ខ្ញុំបានឮកងរាជអាវុធហត្ថបាញ់តដៃជាមួយអ្នកកាប់ឈើខុសច្បាប់ជាច្រើនគ្រាប់”។
លោកបានបន្ថែមថា បន្ទាប់មកលោកបានទៅកាន់ប៉ុស្តិ៍ត្រួតពិនិត្យនោះភ្លាម។ ខ្ញុំមិនប្រាកដថា តើមានការរងរបួសណាមួយឬយ៉ាងណានោះឡើយ ពីព្រោះពួកគេគេចខ្លួនពីកន្លែងកើតហេតុយ៉ាងលឿន។
លោក កែវ វ៉ាត នាយប៉ុស្តិ៍នគរបាលត្រពាំងគ្រញូងដែលគ្របដណ្តប់ឃុំ ២ធ្នូ និងឃុំឃ្សឹម ក៏បានមានប្រសាសន៍ផងដែរថា មានការផ្ទុះអាវុធកាលពីយប់ថ្ងៃសៅរ៍ បានចុះទៅកន្លែងកើតហេតុ ហើយបានរកឃើញសម្បកគ្រាប់នៅថ្ងៃបន្ទាប់។
លោកបានមានប្រសាសន៍ថា “យើង បានធ្វើការងាររបស់យើងដើម្បីរកឲ្យឃើញថា អ្វីពិត និងអ្វីមិនពិត។ មានការបាញ់បោះ”៕ សារុន (រាយការណ៍បន្ថែមដោយ Matt Blomberg)