អ្នកនាំពាក្យក្រសួងយុត្តិធម៌បានលើកឡើងកាលពីម្សិលមិញថា ឧត្តមក្រុមប្រឹក្សានៃអង្គចៅក្រមដែលមើលការខុសត្រូវលើមន្ត្រីតុលាការទូទាំងប្រទេស នឹងដាក់ទោសចៅក្រមណាដែលត្រូវបានរកឃើញថាធ្វើសេចក្តីសម្រេចតាមអំពើចិត្ត ក្រោយពីរដ្ឋមន្ត្រីក្រសួងយុត្តិធម៌បានថ្លែងសុន្ទកថាជុំវិញបញ្ហានេះកាលពីដើមសប្តាហ៍នេះ។
លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ បានមានប្រសាន៍អំឡុងកិច្ចប្រជុំបិទទ្វារមួយរវាងមន្ត្រីតុលាការ និងមន្ត្រីនគរបាលនៅក្នុងរាជធានីភ្នំពេញកាលពីថ្ងៃអង្គារថា ចៅក្រមមួយចំនួនបានធ្វើសេចក្តីសម្រេចទៅតាមអារម្មណ៍របស់ខ្លួននៅក្នុងសំណុំរឿងដែលខ្លួនទទួលដោះស្រាយ។
លោកបានពន្យល់ពីមូលហេតុដែលការសម្រេចទោសមានភាពខុសគ្នាខ្លាំងនៅក្នុងសំណុំរឿងចាប់រំលោភស្រដៀងគ្នាដែលត្រូវជាប់ពន្ធនាគារចន្លោះពីពីរឆ្នាំដល់២០ឆ្នាំសម្រាប់បទល្មើសនេះ។
លោកបានលើកឡើងបន្តថា “វាប្រហែលជាមកពីតុលាការ ហើយខ្ញុំមិនដឹងច្បាស់ថាមូលហេតុអ្វីទេ។ ប្រហែលជាអាស្រ័យលើចៅក្រម ឬតុលាការ ថ្ងៃខ្លះបើគាត់សប្បាយចិត្ត គាត់កាត់បន្ថយទោស ឬបើចៅក្រមឃើញស្ត្រីម្នាក់ ហើយមានអារម្មណ៍អាណិតអាសូរ រីឯជនល្មើសដែលមានមុខឌឺ ពួកគាត់ធ្វើសេចក្តីសម្រេចតាមចិត្តចង់។ នេះជាបញ្ហាដែលយើងចាំបាច់ត្រូវដោះស្រាយរួមគ្នា”។
លោក ជិន ម៉ាលីន អ្នកនាំពាក្យក្រសួងយុត្តិធម៌បានមានប្រសាសន៍កាលពីម្សិលមិញថា រដ្ឋមន្ត្រីក្រសួងយុត្តិធម៌បានបញ្ជាក់ហើយថា សេចក្តីសម្រេចបែបនេះនឹងមិនត្រូវអត់ឱនឲ្យទៀតឡើយ ហើយចៅក្រមដែលបន្តធ្វើសេចក្តីសម្រេចតាមអំពើចិត្ត នឹងត្រូវទទួលទោស។
លោកបានលើកឡើងទៀតថា ”សម្រាប់ចៅក្រុម និងព្រះរាជអាជ្ញាដែល [ធ្វើសេចក្តីសម្រេច] ទៅតាមអារម្មណ៍របស់ខ្លួន ឬមិនអនុវត្តតាមច្បាប់ ឬមិនចេញសាលក្រមឲ្យបានត្រឹមត្រូវ នឹងត្រូវមានទោស ហើយពួកគាត់នឹងប្រឈមបទចោទប្រកាន់ព្រហ្មទណ្ឌ។ ឧត្តមក្រុមប្រឹក្សានៃអង្គចៅក្រមនឹងពិនិត្យមើលការអនុវត្តច្បាប់នេះ”។
លោក សំ ប្រជាមានិត អគ្គលេខាធិការនៃឧត្តមក្រុមប្រឹក្សានៃអង្គចៅក្រម បានមានប្រសាសន៍ថា ស្ថាប័ននេះនៅតែមានការប្រុងប្រយ័ត្នក្នុងការឃ្លាំមើលតុលាការក្នុងប្រទេសកម្ពុជា។ ទោះជាយ៉ាងណា លោកបានបដិសេធមិនលើកឡើងថា តើចៅក្រម ឬព្រះរាជអាជ្ញារូបណាដែលត្រូវបានផ្តន្ទាទោសពីបទធ្វើសេចក្តីសម្រេចតាមអំពើចិត្តនៅឆ្នាំនេះឡើយ។
លោកបានបញ្ជាក់ថា “ក្រុមប្រឹក្សាវិន័យនឹងពិនិត្យមើល ហើយប្រសិនបើគ្មានពាក្យបណ្តឹង នឹងគ្មានការផ្តន្ទាទោសសម្រាប់ចៅក្រមឡើយ”៕ សុខុម