កាលពី ម្សិលមិញសាលាដំបូងរាជធានីភ្នំពេញបានកាត់ទោសឧកញ៉ា សុខ រ៉ាថន ឲ្យជាប់ពន្ធនាគាររយៈពេល១ឆ្នាំ ពីបទឆបោកប្រាក់ចំនួន២,៥លាន ដុល្លារពីកូនស្រីរបស់មន្ត្រីយោធាជាន់ខ្ពស់បំផុតមួយរូបនៅ កម្ពុជាតាមរយៈកិច្ចព្រមព្រៀងទិញលក់អចលនទ្រព្យក្លែងក្លាយ។
ទោះ ជាយ៉ាងណា ភរិយារបស់ឧកញា៉រូបនេះដែលបានឡើងសវនាការទទួលការជំនុំជម្រះជាមួយ នឹងរូបគាត់ បានដើរចេញមកវិញដោយមានសេរីភាព បន្ទាប់ពីបទចោទប្រកាន់ប្រឆាំងរូបគាត់ត្រូវបានដកចេញ។
លោក សុខ រ៉ាថន អាយុ៤១ឆ្នាំ ប្រធានក្រុមហ៊ុន Ranimex International Import Export បាន ជាប់ឃុំជាបណ្ដោះអាសន្ននៅពន្ធនាគារប៉េហ្ស៊ី ដែលមានសន្តិសុខយាមកាមធូររលុងបំផុតចាប់តាំងពីគាត់ និងអ្នកស្រី ផាន់ ដាវី អាយុ៣៤ឆ្នាំ ដែលត្រូវជាភរិយារបស់គាត់ត្រូវបានចោទប្រកាន់ពីបទឆបោកកាលពីខែ មិថុនា ឆ្នាំ២០១៤មក ប៉ុន្តែភរិយារបស់គាត់ត្រូវបានដោះលែងឲ្យនៅក្រៅឃុំនៅពេលនោះ។
ដើម ចោទឈ្មោះ មាស សុភារី អាយុ៣៥ឆ្នាំ ដែលត្រូវជាកូនស្រីរបស់លោក មាស សុភា អគ្គមេបញ្ជាការរងនៃកងយោធពលខេមរភូមិន្ទ បានចោទប្រកាន់ប្ដីប្រពន្ធទាំងពីរនាក់នេះពីបទស៊ីដាច់ប្រាក់ ចំនួន២,៥លានដុល្លារ ដែលគាត់បានបង់ទិញវីឡាមួយ និងដីមួយឡូតិ៍នៅខាងក្រោយព្រះបរមរាជវាំង ព្រមទាំងការបង់ពន្ធចំនួន៥១.០០០ដុល្លារផងដែរ។
កាលពី ម្សិលមិញ ចៅក្រមជំនុំជម្រះ វ៉េង ហួត បានកាត់ទោសលោក សុខ រ៉ាថន ឲ្យជាប់ពន្ធនាគាររយៈពេល១ឆ្នាំ និងបង្គាប់ឲ្យគាត់បង់ពិន័យចំនួន២លានរៀល (ប្រហែល៥០០ដុល្លារ) និងសំណងជំងឺចិត្តចំនួន១០០.០០០ដុល្លារឲ្យទៅដើមចោទ។
លោកមិន បានពន្យល់ពីមូលហេតុដែលបទចោទប្រកាន់ប្រឆាំងអ្នកស្រី ផាន់ ដាវី ដែលធ្វើការជាមួយប្ដីរបស់គាត់ ត្រូវបានដកចេញភ្លាមៗនោះទេ។ លោកបានមានប្រសាសន៍សំដៅដល់ប្រតិចារឹករបស់តុលាការដែលអ្នកយក ព័ត៌មានមិនអាចរកបានយ៉ាងដូច្នេះថា “មានហេតុផលជាច្រើន ប៉ុន្តែខ្ញុំមិនហ៊ានធ្វើអត្ថាធិប្បាយទេ។ សូមពិនិត្យមើលឯកសារទៅ”។
លោក ហុង ចាន់សុខា មេធាវីតំណាងចុងចោទបានបដិសេធមិនធ្វើអត្ថាធិប្បាយទេជុំវិញសាលក្រមនេះ។
លោក ហាក់ សៀកលី មេធាវីតំណាងឲ្យលោកស្រី មាស សុភារី បានមានប្រសាសន៍ថា កូនក្ដីរបស់លោកកំពុងពិចារណាដាក់ពាក្យបណ្ដឹងរដ្ឋប្បវេណី បន្ទាប់ពីទទួលបានតែ១០០.០០០ដុល្លារនៃប្រាក់២,៥លានដុល្លារដែលកូនក្ដីរបស់លោកបានបាត់បង់ដោយសារការឆបោករបស់ពីរនាក់ប្ដីប្រពន្ធនេះ។
មេធាវី រូបនេះក៏មិនបានបកស្រាយអំពីមូលហេតុនៃការរួចផុតពីការចោទ ប្រកាន់របស់លោកស្រី ផាន់ ដាវី ដែរ។ លោកបានលើកឡើងថា “តាមខ្ញុំយល់ [តុលាការ] មិនគួរដកការចោទប្រកាន់ប្រឆាំងរូបគាត់ទេ ពីព្រោះពួកគេធ្វើការទាំងប្ដីទាំងប្រពន្ធ ហើយចែកលុយគ្នា”៕ សុខុម