កាលពីម្សិលមិញ លោក សម រង្ស៊ី ប្រធានគណបក្សប្រឆាំងបានធ្វើមាតុភូមិនិវត្តពីដំណើរទស្សនកិច្ចយ៉ាងយូរនៅបរទេស ដោយមានប្រសាសន៍ថា លោកព្រមទទួលយកការបបួលរបស់លោកនាយករដ្ឋមន្ត្រី ហ៊ុន សែន ស្បថដាក់ជីវិតថា ការបោះឆ្នោតជ្រើសតាំងតំណាងរាស្ត្រនាខែកក្កដា ឆ្នាំ២០១៣ ពិតជាត្រូវគណបក្សប្រជាជនកម្ពុជា “លួចបន្លំ” ប្រាកដមែន។ លោកបានបញ្ជាក់បន្ថែមថា ការរាប់សន្លឹកឆ្នោតជាប្រព័ន្ធឡើងវិញមានប្រយោជន៍ជាងការស្បថ។
នៅក្នុងសុន្ទរកថាមួយកាលពីថ្ងៃច័ន្ទ លោក ហ៊ុន សែន បានបបួលលោក សម រង្ស៊ី ស្បថជាមួយលោកនៅព្រះអង្គដងកើ ក្នុងរាជធានីភ្នំពេញថា សូមឲ្យលោក សម រង្ស៊ី “ងាប់ត្រូវគ្រាប់ រន្ទះបាញ់ និងស្អីទាំងអស់” ប្រសិនបើការអះអាងរបស់គណបក្សសង្គ្រោះជាតិថាការបោះឆ្នោតឆ្នាំ២០១៣ត្រូវបានលួចបន្លំ មិនមែនជាការពិត។
ថ្លែងនៅឯអាកាសយានដ្ឋានអន្តរជាតិភ្នំពេញ ពេលវិលត្រឡប់ពីដំណើរទស្សនកិច្ចរយៈពេល១ខែ ដើម្បីជួបជុំជាមួយបងប្អូនជនរួមជាតិខ្មែរដែលរស់នៅអឺរ៉ុប កាណាដា និងសហរដ្ឋអាមេរិក លោក សម រង្ស៊ី បានមានប្រសាសន៍ថា លោកយល់ព្រមទទួលយកការបបួលស្បថរបស់លោក ហ៊ុន សែន។
ប្រធានគណបក្សប្រឆាំងរូបនេះបានថ្លែងទៅកាន់ក្រុមអ្នកយកព័ត៌មានថា ”រឿងស្បថជារឿងអបិយជំនឿ ប៉ុន្តែយើងត្រូវផ្ដោតអារម្មណ៍ទៅលើបច្ចេកទេស និងវិទ្យាសាស្ត្រ។ បើចង់បញ្ជាក់ថា ការបោះឆ្នោតកន្លងទៅមានភាពសុក្រឹត ឬយ៉ាងដូចម្ដេច គួរណាស់យើងរាប់សន្លឹកឆ្នោតឡើងវិញទៅ នោះយើងនឹងដឹងសខ្មៅភ្លាម។ រឿងស្បថមិនអីទេ ចង់ស្បថពេលណាក៏បានដែរ ប៉ុន្តែអ្វីដែលចាំបាច់យើងត្រូវធ្វើអ្វីតាមបច្ចេកទេសច្បាស់លាស់”។
លោក សុខ ឦសាន្ត អ្នកនាំពាក្យគណបក្សប្រជាជនកម្ពុជាបានមានប្រសាសន៍ថា ការកំណត់ពេលទៅស្បថនៅព្រះអង្គដងកើដែលស្ថិតនៅតាមបណ្ដោយមាត់ទន្លេ ខាងមុខព្រះបរមរាជវាំង គឺស្រេចតែទៅលើលោក ហ៊ុន សែន និងលោក សម រង្ស៊ី ប៉ុន្តែថា ការរាប់សន្លឹកឆ្នោតឡើងវិញគឺមិនអាចទៅរួចឡើយ។
លោកបានលើកឡើងសំដៅដល់ការបោះឆ្នោតអាណត្តិក្រោយយ៉ាងដូច្នេះថា “វាយឺតពេលហើយ។ បើចង់រាប់សន្លឹកឆ្នោតឡើងវិញ គួរតែមានការបោះឆ្នោតឡើងវិញ ហើយការបោះឆ្នោតឡើងវិញគឺអាចធ្វើទៅបាននៅឆ្នាំ២០១៨។ វាមិនអាចទៅរួចទេ ពីព្រោះយើងកំពុងតែបោះជំហានឆ្ពោះទៅមុខហើយ។ ការរាប់សន្លឹកឆ្នោតឡើងវិញ វាមានន័យថា ដើរចេញពីសភា ហើយធ្វើការតវ៉ានៅតាមផ្លូវឡើងវិញ”។
លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) បានមានប្រសាសន៍ថា ការបបួលស្បថរបស់លោក ហ៊ុន សែន ដែលរួមមានការស្បថដាក់ជីវិតរបស់លោក និងជីវិតសមាជិកគណបក្សប្រជាជនកម្ពុជាថា លទ្ធផលនៃការបោះឆ្នោតគឺស្របច្បាប់នោះ ជាវិធីដ៏ចម្លែកមិនធ្លាប់មានដើម្បីបញ្ជាក់ពីជ័យជម្នះរបស់គណបក្សកាន់អំណាច។
លោកបានមានប្រសាសន៍ទៀតថា ទម្រង់បោះឆ្នោតដែលមន្ត្រីការិយាល័យបោះឆ្នោតទូទាំងប្រទេសបានបំពេញនៅថ្ងៃទី២៨ ខែកក្កដា ឆ្នាំ២០១៣ និងត្រូវបានបញ្ជូនមករាជធានីភ្នំពេញសម្រាប់ការផ្ទៀងផ្ទាត់លទ្ធផលនោះ គួរតែបញ្ចេញជាសាធារណៈដើម្បីបង្ហាញថា តើលទ្ធផលផ្លូវការ ត្រឹមត្រូវឬយ៉ាងណា។
លោកបានលើកឡើងបន្តថា “ដើម្បីស្ដារការជឿទុកចិត្តរបស់ជាតិឡើងវិញ មិនមែនមកស្បថស្បែបែបនេះទេ វាជារឿងតម្លាភាព និងគណនេយ្យភាព។ តម្លាភាពដែលធ្វើឲ្យប្រជាពលរដ្ឋទុកចិត្តលើលទ្ធផលបោះឆ្នោត។ នៅក្នុងច្បាប់បោះឆ្នោតទូទាំងពិភពលោក គ្មានការស្បថស្បែឡើយពាក់ព័ន្ធនឹងលទ្ធផលបោះឆ្នោត។ នៅក្នុងប្រទេសមួយចំនួនគេអាចបញ្ជាក់លទ្ធផលនេះបានតាមរយៈគេហទំព័ររបស់គណៈកម្មាធិការរៀបចំការបោះឆ្នោត ប៉ុន្តែនៅទីនេះគេបញ្ចេញតែបន្តិចបន្តួចប៉ុណ្ណោះនៅពេលលទ្ធផលប្រកៀកប្រកិតគ្នាខ្លាំង។ យើងមិនអាចធ្វើឲ្យប្រជាពលរដ្ឋមានការជឿជាក់បានទេ ពេលយើងបិទព័ត៌មានហើយមកនិយាយថា ហ៊ានស្បថជុំវិញលទ្ធផលបែបនេះ”។
លោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជា ដែលមានសម្ពន្ធភាពជាមួយគណបក្សប្រឆាំងបានលើកឡើងថា លោកយល់ស្របនឹងជំហររបស់លោក គល់ បញ្ញា ហើយលោកបានស្ម័គ្រចិត្តទៅស្បថជំនួសលោក សម រង្ស៊ី ប្រសិនបើប្រធានគណបក្សសង្គ្រោះជាតិរូបនេះមិនទៅ។
លោកបានលើកឡើងសំដៅដល់កញ្ចប់ដែលផ្ទុកលទ្ធផលបោះឆ្នោតថា “បន្ទាប់ពីការបោះឆ្នោត គណបក្សសង្គ្រោះជាតិបានចោទប្រកាន់គណបក្សប្រជាជនកម្ពុជាថា លួចបន្លំសន្លឹកឆ្នោត ហើយបានស្នើឲ្យគណៈកម្មាធិការជាតិរៀបចំការបោះឆ្នោតបើកកញ្ចប់សុវត្ថិភាពនៅទូទាំងប្រទេស ប៉ុន្តែគណបក្សប្រជាជនកម្ពុជាតាមរយៈ គ.ជ.ប. មិនបានបើកវាទេ។ ខ្ញុំជាអ្នកកាន់ព្រះពុទ្ធសាសនា ហើយដូចអស់លោកបានដឹងស្រាប់ហើយថា ប្រជាពលរដ្ឋខ្មែរដែលជាអ្នកគោរពព្រះពុទ្ធសាសនាជឿថា ដូនតារបស់យើង ជាពិសេសបុព្វបុរស និងអារក្សអ្នកតាពិតជាពូកែស័ក្ដិសិទ្ធិមែននៅទីនេះ ហើយនឹងសម្លាប់ ឬកម្ទេចអ្នកដែលបំផ្លាញជាតិរបស់យើងរបស់យើង”។
នៅពេលសួរថា តើលោកគិតថា លោក ហ៊ុន សែន អាចនឹងស្លាប់ប្រាកដមែនឬយ៉ាងណា ប្រសិនបើលោកហ៊ានស្បថដាក់ជីវិតលោក និងជីវិតរបស់សមាជិកគណបក្សប្រជាជនកម្ពុជានោះ លោក ម៉ៅ ពិសេស បានឆ្លើយថា លោកជឿថាអាចទៅរួច។
លោកបានឆ្លើយសំដៅដល់ប្រធានគណបក្សប្រជាជនកម្ពុជាដែលបានទទួលមរណភាពប៉ុន្មានម៉ោងបន្ទាប់ពីសុន្ទរកថារបស់លោក ហ៊ុន សែន កាលពីថ្ងៃច័ន្ទថា “ហេតុអ្វីមិនអាច? ពេលនេះ ជា ស៊ីម ទៅបាត់ហើយ”។
ការវិលត្រឡប់របស់លោក សម រង្ស៊ី មកកាន់ប្រទេសកម្ពុជាវិញកាលពីម្សិលមិញ បង្ហាញពីការបញ្ចប់ដំណើរទស្សនកិច្ចនៅបរទេសដើម្បីបញ្ចុះបញ្ចូលបងប្អូនជនរួមជាតិខ្មែរឲ្យយល់ពីតម្លៃនៃ “វប្បធម៌សន្ទនា” ថ្មីរបស់លោកជាមួយលោក ហ៊ុន សែន ដែលមានបំណងជំរុញឲ្យបរិយាកាសនយោបាយនៅក្នុងប្រទេសកម្ពុជាមានភាពប្រសើរឡើងក្រោយពីប្រជែងគ្នាយ៉ាងជូរចត់អស់រយៈពេលជាច្រើនឆ្នាំ។
លោកបានមានប្រសាសន៍នៅឯអាកាសយានដ្ឋានអន្តរជាតិភ្នំពេញថា “ភាគច្រើនពួកគាត់បានយល់ និងគាំទ្រវា ប៉ុន្តែមួយចំនួនតូចមិនទាន់យល់ច្បាស់ ហើយកំពុងតាមដាន។ ហើយខ្ញុំជឿថា ពេលវេលាកន្លងទៅ អ្នកដែលមិនទាន់យល់ ច្បាស់ជាយល់ ជាពិសេសយល់អំពីទឹកចិត្តពិតប្រាកដរបស់ខ្ញុំ និងបំណងពិតប្រាកដរបស់ខ្ញុំ”៕ សុខុម