35 C
Phnom Penh

និស្សិត​​ដែល​បុក​​​ហើយ​រត់​​និយាយ​ថា ខ្លួន​បុក​របង​របស់​ឯក​អគ្គរដ្ឋទូត​​ដើម្បី​ឲ្យ​សន្តិសុខ​ជួយ​

ដោយ ឌឹ ខេមបូឌា ដេលី

បទវិភាគ

តាន់​ សុវណ្ណរ៉ា​ ត្រូវ​ប៉ូលិស​បណ្តើរ​ចូលបន្ទាប់​តុលាការ​ក្រុង​កាលពីម្សិលមិញ  ដើម្បី​សាកសួរ​ពីបទ​បើករថយន្ត​បុក​រត់​ កាលពីម្សល​មិញ​។ រូបថតៈ ស៊ីវ ចាន់ណា​/The Cambodia Daily
តាន់​ សុវណ្ណរ៉ា​ ត្រូវ​ប៉ូលិស​បណ្តើរ​ចូលបន្ទាប់​តុលាការ​ក្រុង​កាលពីម្សិលមិញ ដើម្បី​សាកសួរ​ពីបទ​បើករថយន្ត​បុក​រត់​ កាលពីម្សល​មិញ​។ រូបថតៈ ស៊ីវ ចាន់ណា​/The Cambodia Daily

និស្សិត​ម្នាក់​​ដែល​ត្រូវ​បាន​ចាប់​ខ្លួន​ក្នុងរាជធានី​ភ្នំពេញ​កាលពី​ថ្ងៃ​អង្គារ ជុំវិញ​ហេតុការណ៍​​​បុក​ហើយ​រត់​ពេល​ស្រវឹង​ បាន​ឲ្យ​ដឹង​កាលពី​ម្សិលមិញ​ថា ខ្លួន​សម្រេច​បើក​រថយន្ត​បុក​របង​និវេសនដ្ឋាន​របស់​ឯក​អគ្គរដ្ឋទូត​​​អាមេរិក​ ព្រោះ​ខ្លួន​សង្ឃឹម​ថា សន្តិសុខ​ស្ថានទូត​​នឹង​អាច​ការ​ពារ​ខ្លួន​ពី​ក្រុម​មនុស្ស​ដែល​​កំពុង​ដេញ​តាម​។

តាន់​ សុវណ្ណារ៉ា អាយុ​២១​ឆ្នាំ បាន​បង្ក​ឲ្យ​មាន​ការ​ខូច​ខាត​មួយ​ចំនួន​កាលពី​យប់​ថ្ងៃ​អង្គារ ដោយ​​​​ចាប់​ផ្ដើម​​​ចេញពី​​​ចំណុច​​​​​​ភាគ​ខាង​ត្បូង​​ផ្សារ​​​បឹង​កេងកង​​​ ហើយ​បាន​បញ្ចប់​នៅ​ពេល​និស្សិត​រូប​នេះ​បើក​រថយន្ត​បុក​របង​​និវេសនដ្ឋាន​របស់​លោក​ វីលៀម ថូដ ឯកអគ្គរដ្ឋទូត​អាមេរិក​នៅ​តាម​បណ្ដោយ​មហាវិថី​ព្រះនរោត្តម។

ពេល​រង់ចាំ​ការ​សាកសួរ​នៅ​​​សាលា​ដំបូង​រាជធានី​ភ្នំពេញ សុវណ្ណារ៉ា បាន​លើក​ឡើង​ថា ខ្លួន​ព្យាយាម​សុំទោស​អ្នក​បើក​រថយន្ត​ដែល​ខ្លួន​បាន​បុក​នៅ​ក្បែរ​ផ្សារ​ដែរ ប៉ុន្តែ​ថា ស្ថាន​ភាព​​បាន​​​ប្រែក្លាយ​ទៅ​ជា​ធ្ងន់ធ្ងរ​ភ្លាមៗ។

សុវណ្ណារ៉ា បាន​និយាយ​ថា “​ខ្ញុំ​និយាយ​សុំទោស​ជាមួយ​មិត្ត​ភក្ដិ​ពីរ​នាក់​ទៀត ប៉ុន្តែ​អ្នក​បើក​បរ​រថយន្ត​មិនព្រម​ទទួល​យក​ការ​សុំទោស​​ទេ ហើយ​បាន​ស្រែក​ថា ខ្ញុំ​ជា​ចោរ​។ ភ្លាមៗ​នោះ​មនុស្សម្នា​បាន​ចាប់​ផ្ដើម​មក​ចោមរោម​​ជុំវិញ​ ហើយ​ពួកគេ​បាន​គប់​ដុំថ្ម​ដាក់​ខ្ញុំ និង​ឡាន​របស់​ខ្ញុំ”។

សុវណ្ណារ៉ា​​​ បាន​​លើក​ឡើង​ទៀត​ថា នៅ​ពេល​គេ​ចាប់​ផ្ដើម​គប់​ដុំថ្ម ខ្លួន​ខ្លាច​មាន​គ្រោះ​ថ្នាក់​ដល់​ជីវិត ហើយ​ក៏​សម្រេច​គេច​ខ្លួន​តែ​ម្ដង។ និស្សិត​រូប​នេះ​​និយាយ​បន្ថែម​ថា “​ខ្ញុំ​​​ប្រហែលជា​​​​ស្លាប់​បាត់​​​ទៅ​ហើយ​​ប្រសិន​បើ​នៅ​តែ​នៅ​ទីនោះ”។

សុវណ្ណា​រ៉ា បាន​ឲ្យ​ដឹង​បន្ថែម​​​​ថា ពេល​​​ក្រុម​អ្នក​រត់​ម៉ូតូឌុប​ដែល​ពោរពេញ​ដោយ​កំហឹង​នៅ​តែ​បន្ត​ដេញ​តាម​ ខ្លួន​បាន​បុក​ចូល​​និវេសនដ្ឋាន​​​របស់​ឯក​អគ្គរដ្ឋទូត​អាមេរិក ដោយ​សង្ឃឹម​ថា សន្តិសុខ​ពីរ​នាក់​ដែល​យាម​នៅ​ទីនោះ​អាច​ជួយ​ការ​ពារ​ខ្លួន​។

និស្សិត​រូប​នេះ​បាន​និយាយ​ថា “​ខ្ញុំ​មាន​ការ​សោក​ស្ដាយ​ខ្លាំង​ណាស់​ដែល​ធ្វើ​ដូច្នេះ​ដាក់​ស្ថានទូត​ ប៉ុន្តែ​​ខ្ញុំ​គ្មាន​បំណង​បុក​របង​​នេះ​ទេ”។

លោក ទីន វ៉ាន់ស៊ី នាយការិយាល័យ​នគរ​បាល​ចរាចរណ៍​ផ្លូវ​គោល​រាជធានី​ បាន​លើក​ឡើង​ថា សុវណ្ណារ៉ា នឹង​ត្រូវ​សាកសួរ​នៅ​សាលា​ដំបូង​រាជធានី​ម្ដង​ទៀត​នៅ​ថ្ងៃ​នេះ​៕ ស៊ុយឈាង​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស