កាលពីម្សិលមិញ សមាជិកសហជីពសេរីកម្មករបីនាក់បានដាក់ពាក្យបណ្ដឹងប្តឹងសមាជិកសហជីពជាគូបដិបក្ខ ដែលតាមចោទថា បានយកដំបងឫស្សី និងធាងចេកវាយពួកគេអំឡុងការប៉ះទង្គិចគ្នានៅខាងក្រៅរោងចក្រកាត់ដេរ SH International ក្នុងរាជធានីភ្នំពេញកាលពីព្រឹកថ្ងៃពុធ។
ជនរងគ្រោះបាននិយាយថា ពួកគាត់ត្រូវវាយដំដោយសមាជិកសហព័ន្ធសហជីពស្មារតីកម្មករខ្មែរបួននាក់ រួមទាំងលោក មុំ សៀក ជាប្រធានផងដែរ។
យោងតាមនគរបាលបានឲ្យដឹងថា ការប៉ះទង្គិចគ្នានេះបានកើតឡើងនៅពេលសមាជិកសហព័ន្ធសហជីពស្មារតីកម្មករខ្មែរដែលតវ៉ានឹងការបណ្ដេញកម្មករ៤០០នាក់កាលពីពេលថ្មីៗនោះ បានរាំងផ្លូវសមាជិកសហជីពសេរីកម្មករដែលចង់ចូលទៅក្នុងរោងចក្រដើម្បីធ្វើការ។
យោងតាមអ្នកស្រី អ៊ុំ ឌីណា បុគ្គលិកទំនាក់ទំនងសាធារណៈរបស់សហជីពសេរីកម្មករបានឲ្យដឹងថា ជនរងគ្រោះទាំងបីនាក់នោះឈ្មោះ កែវ សៀងហៃ ឡាយ សុខា និង ស្រី ពៅ បានដាក់ពាក្យបណ្ដឹងនៅពេលនគរបាលខណ្ឌពោធិ៍សែនជ័យបានមកសួរសុខទុក្ខពួកគាត់នៅមន្ទីរពេទ្យកាល់ម៉ែត កន្លែងដែលពួកគាត់សម្រាកព្យាបាល។
អ្នកស្រីបានមានប្រសាសន៍ថា លោក សៀង ៃហ បានរងការវាយដំធ្ងន់ធ្ងរ ដោយត្រូវដងខ្លួន និងក្បាលយ៉ាងខ្លាំង។ អ្នកស្រីបានមានប្រសាសន៍ថា អ្នកស្រី សុខា និងអ្នកស្រី ស្រី ពៅ រងរបួសដោយមានស្នាមជាំធ្ងន់ធ្ងរ។
អ្នកស្រីបានមានប្រសាសន៍ថា “ពួកគេបានទាមទារប្រាក់សំណងក្នុងម្នាក់ៗពី៣.០០០ដុល្លារដល់១០.០០០ដុល្លារ”។
អ្នកស្រី នឹម សុផារី ប្រពន្ធរបស់លោក សៀង ហៃ បាននិយាយថា អ្នកស្រីបានឃើញការវាយដំនោះ ហើយអ្នកស្រីបាននៅក្បែរប្ដីរបស់អ្នកស្រីនៅមន្ទីរពេទ្យកាល់ម៉ែតតាំងពីពេលនោះមក។ អ្នកស្រីបាននិយាយថា គាត់ក្អួតហើយក្អួតទៀតកាលពីថ្ងៃពុធ ហើយនៅមានបញ្ហាពិបាកបត់ជើងតូចនៅឡើយ។
អ្នកស្រីបាននិយាយថា “នគរបាលបានសុំឲ្យខ្ញុំដាក់ពាក្យបណ្ដឹង ហើយខ្ញុំបានចោទប្រកាន់មនុស្សមួយក្រុមមកពីសហព័ន្ធសហជីពស្មារតីកម្មករខ្មែរនោះ ពីបទយកដំបងឫស្សី និងធាងចេកវាយប្ដីរបស់ខ្ញុំ”។
លោក ជា សុវណ្ណ អធិការរងនគរបាលខណ្ឌបានអះអាងថា មន្ត្រីរបស់លោកបានទៅសួរសុខទុក្ខជនរងគ្រោះ ហើយបានទទួលយកពាក្យបណ្ដឹងរបស់ពួកគាត់។ លោកបានបន្ថែមថា សមាជិកសហព័ន្ធសហជីពស្មារតីកម្មករខ្មែរក៏បានដាក់ពាក្យបណ្ដឹងជុំវិញការប៉ះទង្គិចគ្នានេះដែរ។
លោកបានមានប្រសាសន៍ថា “ឥឡូវនេះ យើងកំពុងរៀបចំឯកសារ និងសាក្សី ហើយនឹងបញ្ជូនករណីនេះទៅតុលាការនៅពេលឆាប់ៗនេះ។
លោក មុំ សៀក ប្រធានសហព័ន្ធសហជីពស្មារតីកម្មករខ្មែរបានមានប្រសាសន៍ថា លោកមិនមានវត្តមានអំឡុងការប៉ះទង្គិចគ្នានោះទេ។ លោកបានមានប្រសាសន៍ថា “គ្មានហេតុផលណាដែលខ្ញុំត្រូវបង់ប្រាក់សំណងដល់អ្នកទាំងនោះឡើយ ពីព្រោះខ្ញុំមិនបានប្រព្រឹត្តបទឧក្រិដ្ឋនោះឡើយ។ ពួកគេចោទប្រកាន់ខ្ញុំដោយគ្មានភ័ស្តុតាង”។
លោកបានបញ្ជាក់ថា មនុស្សបីនាក់ទៀតដែលជនរងគ្រោះទាំងនោះបានដាក់ពាក្យបណ្ដឹងប្តឹងជាសមាជិកសហជីពរបស់លោកនោះ បានមានប្រសាសន៍ថា លោកមិនដឹងថា តើពួកគេមានកំហុសឬយ៉ាងណានោះឡើយ ពីព្រោះលោកមិនបានឃើញការប៉ះទង្គិចគ្នាឡើយ៕ សារុន