អង្គភាពប្រឆាំងអំពើពុករលួយ (ACU) របស់រដ្ឋាភិបាលបានចេញផ្សាយការចោទប្រកាន់អនាមិកទៅលើមន្ត្រី នគរបាលប្រាំរូបក្នុងរាជធានីភ្នំពេញដែលតាមចោទថា បានទទួលសំណូកដើម្បីពន្លឿនការចេញអត្តសញ្ញាណប័ណ្ណ និងសៀវភៅគ្រួសារ។
ទោះជាយ៉ាងណាគ្មានមន្ត្រីណាម្នាក់ក្នុងចំណោមមន្ត្រីទាំងប្រាំរូបនោះត្រូវបានចាប់ខ្លួនទេ បើទោះណាជាមន្ត្រី ACU ម្នាក់កាលពីម្សិលមិញបានលើកឡើងថា ពួកគេមានកំហុសក៏ដោយ។
សេចក្តីប្រកាសកាលពីថ្ងៃទី១១ ខែមិថុនាចុះផ្សាយក្នុងគេហទំព័ររបស់ ACU បានលើកឡើងថា មិន សុភាត ប្រធានការិយាល័យស្ថិតិ និងអត្តសញ្ញាណកម្មនគរបាលរាជធានី និងកូនចៅរបស់លោកបួនរូបទៀតត្រូវបានចោទ ប្រកាន់ពីបទយកថ្លៃ៥០ដុល្លារសម្រាប់អត្តសញ្ញាណប័ណ្ណដែលមានតម្លៃ ប្រហែល២,៥០ដុល្លារ ដើម្បីកាត់បន្ថយពេលវេលារង់ចាំរយៈពេលពីប្រាំមួយខែមកត្រឹមតែមួយខែ។
យោងតាមសេចក្តីប្រកាសនោះបានឲ្យដឹងថា អ្នកចោទប្រកាន់អនាមិកទាំងនោះក៏បានអះអាងផងដែរថា មន្ត្រីទាំងនេះបានយកប្រាក់១០ដុល្លារសម្រាប់សៀវភៅគ្រួសារ ដែលគួរតែឥតគិតថ្លៃដើម្បីកាត់បន្ថយពេលវេលារង់ចាំពីមួយឆ្នាំ មកមួយខែ។
សេចក្តីថ្លែងប្រកាសដដែលនេះរួមមានការបដិសេធពីមន្ត្រីទាំងប្រាំនាក់ ដែលពួកគេអះអាងថា ពួកគេគ្មានកំហុសឡើយ។
នៅពេលត្រូវបានទាក់ទងកាលពីម្សិលមិញ លោក ជា សំអាន ប្រធាននាយកដ្ឋានបចេ្ចកវិទ្យា និងកោសល្យវិច័យរបស់ ACU បានមានប្រសាសន៍ថា អង្គភាពបានចុះផ្សាយសេចក្តីប្រកាសនេះដើម្បី ឲ្យសាធារណជនដឹងថា មន្ត្រីទាំងនេះគឺជាឧក្រិដ្ឋជន។
លោកបានមានប្រសាសន៍ថា ” ACU បានចុះផ្សាយសេចក្តីប្រកាសនេះដើម្បីជម្រាបជូនសាធារណជនអំពីសកម្មភាពខុសច្បាប់របស់មន្ត្រីនគរបាលទាំងនេះ”។
លោក សំអាន បានបដិសេធមិនពន្យល់ពីមូលហេតុដែលពួកគេមិនត្រូវបានចាប់ខ្លួននោះ ទេ ហើយបានបដិសេធមិនឆ្លើយសំណួរបន្ថែមឡើយ។
លោក តុប សំ ដែលជាប្រធានក្រុមប្រឹក្សាប្រឆាំងអំពើពុករលួយដែលឃ្លាំមើល ACU បានបដិសេធមិនធ្វើអត្ថាធិប្បាយអំពីការចោទ ប្រកាន់ទាំងនេះទេ។
លោកបានមានប្រសាសន៍ថា “ខ្ញុំមិនធ្វើការនៅ ACU ទេ ដូច្នេះទៅសួរ ACUទៅ”។ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយមិនអាចទាក់ទងបានទេ។
លោក សុភាត ដែលជាប្រធានការិយាល័យស្ថិតិនគរបាលរាជធានីបានទទួលស្គាល់ថា កូនចៅរបស់លោកមួយចំនួនបានទទួលសំណូកចំពោះការពន្លឿនសេវាកម្មមែន ប៉ុន្តែ បានអះអាងថា លោកមិនដឹងថា ពួកគេជានរណាទេ ហើយលោកមិនជាប់ពាក់ព័ន្ធឡើយ។
លោកបានមានប្រសាសន៍ថា “ខ្ញុំមិនបានប្រាប់ប្រជាពលរដ្ឋឲ្យបង់ប្រាក់៥០ដុល្លារដើម្បីទទួលបានអត្តសញ្ញាណប័ណ្ណក្នុងរយៈពេលមួយខែឡើយ។ ខ្ញុំមិនបដិសេធការយកប្រាក់បន្ថែមឡើយ ពីព្រោះ មនុស្សខ្លះឃុបឃិតជាមួយមន្ត្រីមួយចំនួនដើម្បីធ្វើអត្តសញ្ញាណប័ណ្ណ ហើយពួកគេលាក់ព័ត៌មាននេះមិនឲ្យខ្ញុំដឹង”។
លោក សុភាត បានមានប្រសាសន៍ថា លោកសង្ស័យថា អ្នកចោទប្រកាន់នោះបានប្រឌិតការចោទប្រកាន់មកលើលោកដោយសង្ឃឹមថា នឹងទទួលបានការងាររបស់លោក ប៉ុន្តែ លោកបានបន្ថែមថា លោកមិនខ្លាចការចាប់ខ្លួនឡើយ។
លោកបានមានប្រសាសន៍ថា “ខ្ញុំមិនបារម្ភពីការចាប់ខ្លួនទេ ពីព្រោះខ្ញុំមិនបានធ្វើរឿងដូចនេះឡើយ”។
នៅក្នុងករណីដាច់ដោយឡែកមួយទៀត ACU បានចុះផ្សាយសេចក្តីប្រកាសកាលពីថ្ងៃទី១១ ខែមិថុនាមួយទៀតនៅក្នុងគេហទំព័ររបស់ខ្លួនដោយលើកឡើងពីការចោទប្រកាន់អនាមិកទៅលើលោក ធួន សិរី ក្រឡាបញ្ជីសាលាដំបូងខេត្តបន្ទាយមានជ័យដោយអះអាងថា គាត់បានសុំប្រាក់១.៥០០ដុល្លារពីគ្រួសារអ្នកជួញដូរគ្រឿងញៀនដែលត្រូវបានកាត់ឲ្យជាប់ទោស ដើម្បីកាត់បន្ថយរយៈពេលជាប់ទោស។
យោងតាមសេចក្តីជូនដំណឹងនោះបានឲ្យដឹងថា លោក សិរី បានបដិសេធការចោទប្រកាន់នេះ។ គេមិនទាន់ច្បាស់ថា តើគាត់ត្រូវបានចាប់ខ្លួន ឬដាក់ទោសទណ្ឌ ឬយ៉ាងណានោះឡើយ ហើយទាំងលោក សិរី និងប្រធានតុលាការមិនអាចទាក់ទងសំុអត្ថាធិប្បាយបានទេ”៕សារុន