ការជំទាស់ទៅនឹងសំណៅថ្មីបំផុតនៃសេចក្ដីព្រាងច្បាប់ ដែលសំដៅដាក់កម្រិតលើអង្គការមិនមែនរដ្ឋាភិបាលរាប់រយនៅក្នុងប្រទេសបន្តរង់ចាំការបោះឆ្នោត ដោយក្រុមអង្គការសិទ្ធិមនុស្សអន្តរជាតិចំនួន១០ ជំរុញឲ្យរដ្ឋាភិបាលពិចារណានូវអ្វីដែលគេហៅថា “សេចក្តីព្រាងច្បាប់មានគុណវិបត្តិធ្ងន់ធ្ងរ”។
អង្គការមិនមែនរដ្ឋាភិបាលទាំងនេះបានត្អូញត្អែរជាច្រើនឆ្នាំមកហើយថា បទប្បញ្ញត្តិមិនច្បាស់លាស់នៃសេចក្ដីព្រាងច្បាប់នេះនឹងផ្ដល់អំណាចដល់រដ្ឋាភិបាលក្នុងការបិទអង្គការនានា ដែលរិះគន់គណបក្សប្រជាជនកម្ពុជាកាន់អំណាច។ ពួកគេបានលើកឡើងថា សេចក្ដីព្រាងច្បាប់ថ្មីដែលបានទៅដល់រដ្ឋសភាកាលពីដើមខែនេះ គឺកាន់តែធ្ងន់ធ្ងរទៅទៀត។ អង្គការសិទ្ធិមនុស្សមួយចំនួន រួមមានអង្គការឃ្លាំមើលសិទ្ធិមនុស្ស និងអង្គការលើកលែងទោសអន្តរជាតិបានលើកឡើងនៅក្នុងលិខិតមួយ ដែលពួកគេមានគម្រោងផ្ញើជូនលោក ហេង សំរិន ប្រធានរដ្ឋសភានៅថ្ងៃនេះថា “សេចក្ដីព្រាងច្បាប់នេះមានគុណវិបត្តិធ្ងន់ធ្ងរដែលរដ្ឋសភាគួរដកចេញជាបន្ទាន់”។
អង្គការទាំងនេះបានលើកឡើងថា ប្រសិនបើច្បាប់នេះត្រូវបានអនុម័ត “រដ្ឋាភិបាលនឹងរំលោភបំពានសិទ្ធិចំពោះសេរីភាពក្នុងការជួបជុំគ្នា…និងសិទ្ធិចូលរួមយ៉ាងសកម្មក្នុងនយោបាយ សេដ្ឋកិច្ច សង្គម និងវប្បធម៌របស់ជាតិ ជាសិទ្ធិដែលត្រូវបានធានាក្នុងមាត្រា៣៥នៃរដ្ឋធម្មនុញ្ញ”។
សេចក្ដីព្រាងច្បាប់នេះនឹងតម្រូវឲ្យអង្គការមិនមែនរដ្ឋាភិបាល និងសមាគមទាំងអស់ចុះឈ្មោះជាមួយរដ្ឋាភិបាលដើម្បីធ្វើប្រតិបត្តិការ ដាក់ជូនសកម្មភាពទៀងទាត់ និងរបាយកាណ៍ហិរញ្ញវត្ថុ និងនៅជាអព្យាក្រឹតផ្នែកនយោបាយ។ សេចក្ដីព្រាងច្បាប់នេះក៏ផ្ដល់អំណាចដល់រដ្ឋាភិបាលក្នុងការបិទ ឬបដិសេធការចុះឈ្មោះ ដែលអង្គការទាំងនេះជឿថា វាធ្វើឲ្យប៉ះពាល់ដល់សន្តិសុខ និងប្រពៃណីទំនៀមទម្លាប់របស់ប្រទេសកម្ពុជាផងដែរ។
អង្គការមិនមែនរដ្ឋាភិបាលលើកឡើងថា បទប្បញ្ញត្តិទាំងនេះដាក់កម្រិតយ៉ាងខ្លាំង និងមិនច្បាស់លាស់ ដោយផ្ដល់អំណាចថ្មីដល់រដ្ឋាភិបាលក្នុងការបិទអង្គការមួយចំនួនផ្អែកលើហេតុផលនយោបាយ។ រដ្ឋាភិបាលបានលើកឡើងថា ច្បាប់នេះមិនមែនដាក់បន្ទុកធ្ងន់ធ្ងរទៅលើអង្គការមិនមែនរដ្ឋាភិបាលឡើយ ហើយនឹងជួយទប់ស្កាត់ក្រុមភេរវជនមិនឲ្យបញ្ជូនលុយចូលក្នុងប្រទេស។
រដ្ឋសភាលើកឡើងថា ខ្លួននឹងរៀបចំវេទិកាសាធារណៈយ៉ាងតិចមួយលើកជាមួយអង្គការមិនមែនរដ្ឋាភិបាល ដើម្បីពិភាក្សាអំពីសេចក្ដីព្រាងច្បាប់ថ្មីនេះមុនពេលការបោះឆ្នោត ប៉ុន្តែក្រុមអ្នករិះគន់ រួមមានគណបក្សសង្គ្រោះជាតិផងនោះលើកឡើងថា នេះមិនទាន់គ្រប់គ្រាន់ទេ។
លោក រូភើត អាបុត (Rupert Abbot) ប្រធានផ្នែកស្រាវជ្រាវប្រចាំតំបន់របស់អង្គការលើកលែងទោសអន្តរជាតិបានមានប្រសាសន៍នៅក្នុងសេចក្ដីថ្លែងការណ៍មួយអមដោយលិខិតផ្ញើជូនលោក ហេង សំរិន ផងដែរថា “សេចក្ដីព្រាងច្បាប់នេះគឺជាការព្យាយាមច្បាស់ក្រឡែតរបស់អាជ្ញាធរក្នុងការដាក់កម្រិត និងគ្រប់គ្រងអង្គការសង្គមស៊ីវិលក្នុងប្រទេសកម្ពុជា”។
លោកបានមានប្រសាសន៍ថា “ច្បាប់នេះនិយាយអំពីអភិបាលកិច្ចតិចជាងនិយាយអំពីការគ្រប់គ្រងនិងការចាប់ពិរុទ្ធ”៕ សារុន