28 C
Phnom Penh

សហភាព​អឺរ៉ុប​សន្យា​ផ្តល់មូលនិធិប្រហែល​១១លានដុល្លារ ​​សម្រាប់​កំណែ​ទម្រង់​ការ​ចុះ​ឈ្មោះ​បោះឆ្នោត

ដោយ ឌឹ ខេមបូឌា ដេលី

បទវិភាគ

សមាជិក​គណៈកម្មាធិការ​ជាតិ​រៀបចំការ​បោះឆ្នោត​ (ស្តាំ) ជួបជាមួយគណៈប្រតិភូ​សហគមន៍​អឺរ៉ុប និង​ជប៉ុន​ នៅឯការិយាល័យ​ គ.ជ.ប. ក្នុង​​​​ក្រសួង​មហាផ្ទៃ​ នាក្រុង​ភ្នំពេញ កាលពី​ម្សិលមិញ។ ​​រូបថតៈ ស៊ីវ ចាន់​ណា​/The Cambodia Daily

លោក ហង្ស ពុទ្ធា អ្នក​នាំពាក្យ​គណៈកម្មាធិការ​ជាតិ​រៀបចំ​ការ​បោះ​ឆ្នោត​បានមាន​ប្រសា​សន៍​កាល​ពី​ម្សិល​មិញ​ថា សហភាព​អឺរ៉ុប​បាន​សន្យា​​ផ្ដល់​ប្រាក់​ជាង​១១​លាន​ដុល្លារ​ដល់​គណៈ​កម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប.) សម្រាប់​រយៈ​ពេល​៣​ឆ្នាំ​ក្រោយ​ ដើម្បី​ជួយ​ក្នុង​ការ​ចុះ​ឈ្មោះ​បោះ​ឆ្នោត​មុន​​ការ​បោះឆ្នោត​​ក្រុម​ប្រឹក្សា​ឃុំ-សង្កាត់​ឆ្នាំ​២០១៧ និង​ការ​បោះ​ឆ្នោត​ជាតិ​ឆ្នាំ​២០១៨។

ចាប់​តាំងពី​​ការ​បង្កើត​ គ.ជ.ប. ដែល​មាន​ពីរ​គណបក្ស​កាល​ពី​ថ្ងៃ​ទី​១៣ ខែ​មេសា​ ដែល​បាន​ជំនួស​ គ.ជ.ប.ចាស់​ដែល​ត្រូវ​បាន​ចោទ​ប្រកាន់​ចំពោះ​​ភាព​មិន​ប្រក្រតី​ដ៏រាល​ដាល​ជុំវិញ​ការ​បោះ​ឆ្នោត​ចាប់​តាំងពី​ត្រូវ​បាន​បង្កើត​ឡើង​កាលពី​ខែ​មករាឆ្នាំ​១៩៩៨ សហភាព​អឺរ៉ុប​ និង​​ប្រទេស​ជប៉ុន​​កំពុង​ពិភាក្សា​ជាមួយ​សមាជិក​គណៈកម្ម​ការ​របស់​ខ្លួន​អំពី​លទ្ធភាព​នៃ​ការ​ផ្ដល់​មូលនិធិ​នេះ​។

លោក ហង្ស ពុទ្ធា បាន​មាន​ប្រសាសន៍​ថា លោក ហ្សង់ ហ្វ្រង់ស័រ កូតាំង ​ឯក​អគ្គរដ្ឋទូត​សហភាព​អឺរ៉ុប​កាលពី​ម្សិលមិញ​បាន​ជួប​ប្រជុំជាមួយ​ គ.ជ.ប. ដែល​ធ្វើ​ជា​ប្រធាន​ដោយ​លោក ស៊ិក ប៊ុនហុក អតីត​សមាជិក​សភា​គណបក្ស​ប្រជាជន​កម្ពុជា ហើយ​បាន​ប្រកាស​ថា សភា​សហ​ភាព​អឺរ៉ុប​នឹង​ផ្ដល់​មូលនិធិ​ចំនួន​១០​លាន​អឺរ៉ូ​ (ប្រហែល​១១,៣​លាន​ដុល្លារ​) ដល់គ.ជ.ប.​នៅ​ចុង​ឆ្នា​ំ​នេះ។

លោក ហង្ស ពុទ្ធា អតីត​អ្នក​សង្កេត​ការណ៍​បោះ​ឆ្នោត​ដែល​ឥឡូវ​នេះ​ជា​សមាជិក​ គ.ជ.ប. បាន​មាន​ប្រសាសន៍​ថា “​សហភាព​អឺរ៉ុប​បាន​បង្ហាញ​ថា ខ្លួន​នឹង​ជួយ​ផ្ដល់​ថវិកា​១០​លាន​អឺរ៉ូ​មាន​ប្រសិទ្ធភាព​ចាប់​ពី​​ខែ​មករាឆ្នាំ​២០១៦ ដល់​ឆ្នាំ​២០១៩ សម្រាប់​រយៈ​ពេលនៃការ​បោះ​​ឆ្នោត​ឃុំ-សង្កាត់ និងការ​​បោះ​ឆ្នោត​ជាតិ​”។

លោក ហង្ស ពុទ្ធា បាន​មាន​ប្រសាសន៍​ថា សហភាព​អឺរ៉ុប​បាន​ផ្ដល់​មូលនិធិ​​ជា​ពិសេស​សម្រាប់​​ការ​​ចុះឈ្មោះអ្នក​​បោះ​ឆ្នោត​ថ្មី​តាម​ប្រព័ន្ធ​ឌីជីថល ដែល​នឹង​រួម​មាន​​ការ​ប្រមូល​ទិន្ន​ន័យ​ជីវមាត្រ​តាម​រយៈ​​ក្រយៅដៃនិង​រូប​ថតជាដើម​។

លោក​បាន​ពន្យល់​ថា “​ទឹក​ប្រាក់​១០​លាន​អឺរ៉ូ​នឹង​គ្របដណ្តប់​ការ​ស្រាវជ្រាវ ​ការ​បញ្ជូន​ក្រុម​អ្នក​សង្កេត​ការណ៍​បោះ​ឆ្នោត​ និង​​សម្ភារ​បោះ​ឆ្នោត​​សម្រាប់​ការ​ចុះ​ឈ្មោះ​បោះ​ឆ្នោត​ផង​ដែរ​ ដូច​ជា កុំព្យូទ័រ ម៉ាស៊ីន​ភ្លើង វិបខេម ការ​ស្គែន​ក្រយៅដៃ និង​ការ​ដំឡើង​ស៊ើវើ (server) ធំ​នៅ​មជ្ឈ​មណ្ឌល​​កុំព្យូទ័រ​នៅ​ភ្នំពេញ​របស់​ គ.ជ.ប.”។

លោក​បាន​បន្ថែម​ថា “​ជំនួយ​ហិរញ្ញវត្ថុ​នេះ​នឹង​ជួយ​ដល់​ការ​បោះ​ឆ្នោត​បាន​​ច្រើន​ក្នុង​​ប្រទេស​កម្ពុជា និង​ធ្វើ​ឲ្យ​អ្នក​បោះ​ឆ្នោត​កាន់​តែ​មាន​ទំនុក​ចិត្ត​​ក្នុង​ការ​បោះ​ឆ្នោត​នៅ​ឆ្នាំ​២០១៧ និង​ឆ្នាំ​២០១៨ ហើយ​នឹង​ជួយ​ឲ្យ​ប្រជាជន​ទទួល​បាន​ទំនុក​ចិត្ត​”។

លោក កូតាំង ជា​ឯកអគ្គរដ្ឋទូត​សហភាព​អឺរ៉ុប​បាន​លើក​ឡើង​នៅ​ក្នុង​អុីម៉េល​ថា កិច្ច​ប្រជុំ​កាល​ពី​ម្សិលមិញ​នេះ​ប្រកប​ដោយ​ “ផ្លែផ្កា” ហើយ​ថា សេចក្ដី​សម្រេច​ចុងក្រោយ​ស្ដីពី​ការ​ផ្ដល់​មូលនិធិ​នេះ​នឹង​ធ្វើ​ឡើង​នៅ​ក្នុង​រយៈ​ពេល​ប៉ុ​ន្មាន​ខែ​ខាង​មុខ​នេះ​។

លោក​បាន​មាន​ប្រសាសន៍​ថា “​សហភាព​អឺរ៉ុប​ បាន​ពន្យល់​ថា ទឹក​ប្រាក់​១០​លាន​អឺរ៉ូ​នេះ​សម្រាប់​គាំទ្រ​ដល់​ដំណើរ​ការ​បោះ​ឆ្នោត​ក្នុង​ប្រទេស​កម្ពុជា​។ សេចក្ដី​សម្រេច​ចុងក្រោយ​ស្ដីពី​ការ​ផ្ដល់​មូលនិធិ​នេះ​ត្រូវ​បាន​ចាត់​ចែង​ដោយ​សហភាព​អឺរ៉ុប​នៅ​ខែ​តុលា ឆ្នាំ​២០១៥ ជាមួយ​នឹង​ការ​ចាប់​ផ្ដើម​អនុវត្ត​នៅ​ខែ​មករា ឆ្នាំ​២០១៦​”៕ សារុន​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស