នគរបាលមួយរូបបានលើកឡើងកាលពីម្សិលមិញថា មនុស្សចំនួន១៧នាក់ដែលត្រូវបានចាប់ខ្លួននៅក្នុងរាជធានីភ្នំពេញកាលពីចុងសប្ដាហ៍កន្លងទៅនេះ អំឡុងពេលប្រឡងតេស្តសមត្ថភាពភាសាកូរ៉េ អាចនឹងប្រឈមការជាប់ពន្ធនាគាររយៈពេល៦ខែ បន្ទាប់ពីត្រូវបានចោទប្រកាន់ពីបទបន្លំខ្លួនជាបេក្ខជនប្រឡងដែលសង្ឃឹមចង់ទៅធ្វើការនៅប្រទេសកូរ៉េខាងត្បូង។
បេក្ខជនប្រឡងទាំងនេះត្រូវបានចាប់ខ្លួនកាលពីថ្ងៃសៅរ៍ និងថ្ងៃអាទិត្យ ខណៈកំពុងប្រឡងតេស្តសមត្ថភាពភាសាកូរ៉េ (Topik) ប្រចាំឆ្នាំ ដែលត្រូវបានរៀបចំឡើងនៅអនុវិទ្យាល័យ និងវិទ្យាល័យចំនួនប្រាំពីរកន្លែងនៅទូទាំងរាជធានីភ្នំពេញ។
លោក សុខ ខេមរិន្ទ ប្រធាននាយកដ្ឋានព្រហ្មទណ្ឌនៃក្រសួងមហាផ្ទៃ បានមានប្រសាសន៍ថា ពេលនេះបេក្ខជនទាំង១៧នាក់នេះត្រូវបានចោទប្រកាន់ហើយ។ លោកបានលើកឡើងបន្តថា “តាមដែលខ្ញុំដឹង ដោយសារតែរហូតមកទល់ពេលនេះខ្ញុំមិនទាន់ទទួលបានឯកសារណាមួយនៅឡើយពាក់ព័ន្ធនឹងសេចក្ដីសម្រេចរបស់តុលាការ គឺថា ពួកគេត្រូវបានចោទប្រកាន់ពីបទប្រើប្រាស់អត្តសញ្ញាណខុសពីអត្តសញ្ញាណផ្លូវការក្នុងកិច្ចការសាធារណៈ”។
ទោះជាយ៉ាងណា មន្ត្រីតុលាការមិនអាចទាក់ទងសុំការបំភ្លឺបានទេជុំវិញបញ្ហានេះ។
យោងតាមលោក សុខ ខេមរិន្ទ បានឲ្យដឹងថា បទចោទប្រកាន់នេះត្រូវមានទោសជាប់ពន្ធនាគារចន្លោះពី៦ខែទៅ១ឆ្នាំ និងពិន័យជាប្រាក់ចន្លោះពី១០០.០០០រៀលទៅ១.០០០.០០០រៀល។
លោក ហេង សួរ អ្នកនាំពាក្យក្រសួងការងារដែលជាអ្នករៀបចំការប្រឡងតេស្តសមត្ថភាពភាសាកូរ៉េនេះ បានមានប្រសាសន៍កាលពីម្សិលមិញថា អ្នកបន្លំខ្លួនទាំងនេះគឺជាសិស្ស និងគ្រូមកពីតាមមជ្ឈមណ្ឌលបង្រៀនភាសាកូរ៉េក្នុងស្រុក ហើយពួកគេទទួលបានថ្លៃឈ្នួលប្រឡងជំនួសគេចន្លោះពី១.០០០ដុល្លារទៅ១.៥០០ដុល្លារ។
លោកបានលើកឡើងទៀតថា “ពួកគេស្លៀកពាក់ដូចៗគ្នា និងកាត់សក់ម៉ូតដូចៗគ្នា។ អនុរក្សជនជាតិកូរ៉េមានការសង្ស័យចំពោះពួកគេ [លួចចម្លង] ហើយបានហៅពួកគេទៅសាកសួរ។ ទីបំផុតពួកគេបានសារភាពថា ពួកគេទៅប្រឡងជំនួសគេ”។
លោកស្រី គីម ហ៊ីវ៉ុន (Kim Hyewon) លេខាទី២នៅស្ថានទូតកូរ៉េខាងត្បូងក្នុងរាជធានីភ្នំពេញ បានមានប្រសាសន៍ថា ប្រជាពលរដ្ឋកម្ពុជាចំនួន៣៨.៣៦២នាក់បានចូលរួមប្រឡងតេស្តសមត្ថភាពភាសាកូរ៉េកាលពីចុងសប្ដាហ៍កន្លងទៅនេះ ហើយថា ប្រទេសកូរ៉េខាងត្បូងជ្រើសរើសយកបេក្ខជនចំនួន៥.៧០០នាក់។
លោកស្រីបានមានប្រសាសន៍បន្ថែមថា ការលួចចម្លងគ្មានអ្វីគួរឲ្យភ្ញាក់ផ្អើលទេ ដោយសារតែចំនួនសិស្សច្រើនដែលចូលប្រឡងតែម្ដងក្នុង១ឆ្នាំនៅកម្ពុជា ប៉ុន្តែបានលើកឡើងថា វាពិបាកនឹងចៀសផុតណាស់។ “ការធ្វើតេស្តនេះត្រូវបានអនុវត្តយ៉ាងតឹងរ៉ឹងបំផុត”៕ សុខុម (រាយការណ៍បន្ថែមដោយ Chris Mueller)