លោកអភិបាលក្រុងភ្នំពេញ និងអ្នកនាំពាក្យរដ្ឋាភិបាល បាននិយាយកាលពីម្សិលមិញថា ជនបរទេសដែលចូលរួមធ្វើការតវ៉ាប្រឆាំងរដ្ឋាភិបាល ឥឡូវនេះនឹងត្រូវចាប់ខ្លួន និងនិរទេសចេញ ដែលជាការប្រឹងប្រែងថ្មីបំផុតរបស់គណបក្សប្រជាជនកម្ពុជា ដើម្បីទប់ស្កាត់ឥទ្ធិពលពីខាងក្រៅក្នុងកិច្ចការនយោបាយរបស់ប្រទេសកម្ពុជា។
ពេលចុះទៅពិនិត្យមជ្ឈមណ្ឌលបណ្តុះបណ្តាលវិជ្ជាជីវៈពោធិ៍សែនជ័យ លោក បា៉សុជាតិវង្ស អភិបាលរាជធានីភ្នំពេញបានការពារសេចក្តីសម្រេចរបស់រដ្ឋាភិបាលក្នុងការជំរុញច្បាប់ស្តីពីការរៀបចំ និងប្រព្រឹត្តទៅរបស់សមាគម និងអង្គការមិនមែនរដ្ឋាភិបាល ដែលត្រូវបានអនុម័តដោយតំណាងរាស្ត្រគណបក្សប្រជាជនកម្ពុជាកាលពីថ្ងៃច័ន្ទ ។
លោក ប៉ា សុជាតិវង្ស បានមានប្រសាសន៍ថា មូលហេតុមួយក្នុងចំណោមមូលហេតុដែលអង្គការមិនមែនរដ្ឋាភិបាលជាច្រើនប្រឆាំងនឹងច្បាប់នេះ គឺពីព្រោះក្រុមដែលបានមូលនិធិពីបរទេស ពាក់ព័ន្ធក្នុងសកម្មភាពនយោបាយក្រៅពីគោលដៅដែលលើកឡើងរបស់ពួកគេ ដោយលោកបានបន្ថែមថា រដ្ឋាភិបាលនឹងលែងអត់ឱនដល់ការពាក់ព័ន្ធរបស់ជនបរទេសក្នុងការតវ៉ាទៀតឡើយ។
លោកអភិបាលក្រុងបានមានប្រសាសន៍ថា ”យើងមើលសកម្មភាពរបស់ពួកបរទេសវាដូចជាមានពាក់ព័ន្ធជាមួយនឹងបញ្ហាច្រើនយ៉ាង”។ លោកបានមានប្រសាសន៍សំដៅលើការតវ៉ានាពេលថ្មីៗនេះប្រឆាំងច្បាប់អង្គការមិនមែនរដ្ឋាភិបាលថា “មើលរឿងអីពួកបរទេសមកលើកបដាក្នុងស្រុកខ្មែរ ‘No’ អីគេដែរបរទេសនេះ?”។
លោកបានមានប្រសាសន៍ថា “ឥឡូវខ្ញុំអត់ឲ្យរួចខ្លួនទេ ពីមុនៗមក យើងតែងតែយោគយល់។
ឥឡូវនេះ យើងរំលេចចេញហើយ ត្រូវចាប់បញ្ជូនទៅស្រុក ចាប់បញ្ជូនទៅ ហើយផ្សាយចេញហ្មង… ពីព្រោះគេមករំលោភអធិបតេយ្យភាពយើង”។
លោក សុខ ផល ប្រធានអគ្គនាយកដ្ឋានអន្តោប្រវេសន៍ក្រសួងមហាផ្ទៃ បានមានប្រសាសន៍ថា លោក “មិនបានដឹងអំពីបញ្ហានេះនៅឡើយ” នៅពេលគេសួរអំពីការអត្ថាធិប្បាយរបស់លោក ប៉ា សុជាតិវង្ស ។
លោក ម៉ៅ តារា អគ្គនាយកនៃនាយកដ្ឋានលិខិតឆ្លងដែនរបស់ក្រសួងនេះ បានបដិសេធមិនធ្វើអត្ថាធិប្បាយឡើយ។
ក៏ប៉ុន្តែ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានបញ្ជាក់ថា ឥឡូវនេះជនបរទេសត្រូវគេហាមមិនឲ្យចូលរួមក្នុងបាតុកម្មប្រឆាំងរដ្ឋាភិបាលទេ។
លោក ផៃ ស៊ីផាន បានមានប្រសាសន៍ថា “ជនបរទេសមិនមានសិទ្ធិតវ៉ាប្រឆាំងរដ្ឋាភិបាលឡើយ។ ប្រសិនបើអ្នកឯងរំលោភនីតិរដ្ឋ អ្នកឯងនឹងត្រូវប្រឈមនឹងច្បាប់”។
លោកបានបន្ថែមថា ជនបរទេសដែលមានទុក្ខលំបាកដើម្បីប្រឆាំងរដ្ឋាភិបាល គួរធ្វើតាមរយៈតុលាការ។
លោកមានប្រសាសន៍ទៀតថា “បើអ្នកមិនចូលចិត្តរឿងអ្វីមួយ ទៅតុលាការដើម្បីការពារប្រយោជន៍របស់អ្នក។ នេះគឺជារដ្ឋអធិបតេយ្យ យើងនឹងគោរពអ្នក ប្រសិនបើអ្នកមិនរំលោភបំពានទេនោះ”។
លោក ផៃ សីុផាន បានសួរអ្នកកាសែតបរទេសម្នាក់ថា “តើអ្នកមានសិទ្ធិបោះឆ្នោតទេ? អ្នកមិនមានសិទ្ធិដូចគ្នាទេ។ ពលរដ្ឋកម្ពុជាមានសិទ្ធិ អធិបតេយ្យភាពផ្ទាល់ខ្លួនរបស់យើង និងច្បាប់ផ្ទាល់របស់យើង”។
លោក ផៃ ស៊ីផាន បានមានប្រសាសន៍ថា ជនបរទេសដែលចូលរួមក្នុងការតវ៉ា នឹងរំលោភច្បាប់អន្តោប្រវេសន៍របស់កម្ពុជា។ នៅពេលសួរថា បទប្បញ្ញត្តិអ្វីដែលរារាំងសកម្មភាពបែបនេះ លោក ផៃ ស៊ីផាន បាននិយាយថា លោក “មិនមែនជាមេធាវីទេ”។
លោកបានមានប្រសាសន៍ថា “ខ្ញុំមិនដឹងទេ ខ្ញុំមិនធ្វើការនៅនាយកដ្ឋានទិដ្ឋាការទេ។ វាស្រេចតែការបកស្រាយច្បាប់របស់អ្នក”។
មេធាវីសិទ្ធិមនុស្សដ៏លេចធ្លោម្នាក់ គឺលោក សុក សំអឿន បានមានប្រសាសន៍ថា លោកមិនបានដឹងអំពីច្បាប់ណាមួយដែលដាក់កំហិតជនបរទេសមិនឲ្យតវ៉ាប្រឆាំងរដ្ឋាភិបាលនោះទេ។
លោកបានមានប្រសាសន៍ថា “ខ្ញុំមិនឃើញខណាមួយនៃច្បាប់ដែលចែងថា ជនបរទេសចូលរួមធ្វើបាតុកម្ម ត្រូវនិរទេសចេញ ឬក៏អ្វីមួយដូចនោះទេ”។
លោក អ៊ូ វីរៈ អ្នកវិភាគនយោបាយបានមានប្រសាសន៍ថា ការរឹតត្បិតថ្មីបំផុតរបស់រដ្ឋាភិបាលកើតមានឡើងនៅពេលដែលគណបក្សប្រជាជនកម្ពុជាជំរុញតាមរយៈច្បាប់មួយដែលក្រុមអ្នករិះគន់បាននិយាយថា អាចត្រូវប្រើដើម្បីបង្ក្រាបការរិះគន់ពីសំណាក់អង្គការមិនមែនរដ្ឋាភិបាល បង្ហាញជំងឺភ័យខ្លាចរបស់ខ្លួនទៅលើឥទ្ធិពលបរទេសក្នុងប្រទេសនេះ។
លោក អ៊ូ វីរៈ បានមានប្រសាសន៍ថា “វាជាផ្នែកមួយនៃហេតុផលដូចគ្នា ដូចច្បាប់NGO ហើយនោះជាជំងឺភ័យខ្លាចនៃស្ថានការណ៍ប្រែប្រួលដែលគាំទ្រដោយរដ្ឋាភិបាលបស្ចិមប្រទេសនិងអង្គការអន្តរជាតិ ហើយរដ្ឋាភិបាលមើលបញ្ហានេះឃើញចេញពីទស្សននោះ”។
លោកបានមានប្រសាសន៍ថា “ដូច្នេះ បើមែននោះ ពួកគេនឹងចាត់ទុកការចូលរួមរបស់ជនបរទេសក្នុងការតវ៉ា ថាជាការជួយនាំមកនូវការផ្លាស់ប្តូររបប”។
បើទោះជាជនបរទេសមិនស្ថិតនៅជួរមុខនៃការតវ៉ា ដែលកើតឡើងក្រោយការបោះឆ្នោតជាតិខែកក្កដាឆ្នាំ២០១៣ដ៏មានជម្លោះក៏ដោយ ក៏ជាញឹកញាប់បុគ្គលិកសិទ្ធិមនុស្សបរទេសស្ថិតក្នុងចំណោមអ្នកតវ៉ា ក្នុងនាមជាអ្នកសង្កេតការណ៍ ឬ ជាអ្នកចូលរួមដែរ។
លោក ចូអែល ប្រេស្តុន ជាពលរដ្ឋអូស្ត្រាលីដែលធ្វើការជាមួយមជ្ឈមណ្ឌលអប់រំច្បាប់សម្រាប់សហគមន៍ បានគាំទ្រកម្មករកាត់ដេរនៅពេលដែលសហជីពមានសកម្មភាពកាន់តែខ្លាំងឡើងនៅចុងឆ្នាំ២០១៣ ហើយបានធ្វើកូដកម្មទូទាំងប្រទេសដើម្បីទាមទារប្រាក់ខែអប្បបរមាខ្ពស់ជាងមុន។
លោក ប្រេស្តុន បាននិយាយកាលពីម្សិលមិញថា លោកនឹងបន្តចូលរួមជាមួយសហជីពទៀត ប្រសិនបើពួកគេសម្រេចចិត្តចេញតវ៉ាតាមផ្លូវ។
លោកបាននិយាយថា “ខ្ញុំនឹងមានវត្តមាននៅទីនោះ ដើម្បីគាំទ្រសហជីព និងគាំទ្រអតិថិជនរបស់ខ្ញុំនៅពេលពួកគេត្រូវការខ្ញុំជួយ មិនចំពោះថា នរណានិយាយអ្វីនោះទេ”។
លោកបានបន្ថែមថា “រឿងសំខាន់បំផុតគឺថា ពលរដ្ឋកម្ពុជាអាចប្រើសេរីភាពនៃការជួបជុំគ្នា និងបន្តជំរុញនូវអ្វីដែលពួកគេចង់បានឲ្យកើតឡើង។ ហើយយើងនឹងបន្តគាំទ្រពួកគេ៕និត