យោងតាមមេគយខេត្តបន្ទាយមានជ័យបានឲ្យដឹងថា មេគយនៅច្រកអន្តរជាតិប៉ោយប៉ែត ជាកន្លែងដែលមានការតវ៉ាជាច្រើននាពេលថ្មីៗនេះដោយកម្មករអូសរទេះ ដែលតវ៉ាអំពីការទារថ្លៃស្រេចតែចិត្តចំពោះការដឹកជញ្ជូនទំនិញឆ្លងព្រំដែននោះ នឹងត្រូវជំនួសនៅថ្ងៃពុធ។
សេចក្តីសម្រេចជំនួសលោក ឈួន ហៃ ដោយលោក ហ៊ុយ សុជាតិ ដែលពីមុនជាមេគយនៅច្រកអន្តរជាតិបាវិតក្នុងខេត្តស្វាយរៀង ធ្វើឡើងប្រហែលពីរខែក្រោយពីកម្លាំងរាជអាវុធហត្ថបានបាញ់ព្រមានក្នុងពេលមានការតវ៉ា ដែលបានបិទផ្លូវជាតិលេខ៥ នៅជិតច្រកប៉ោយប៉ែត។
នៅពេលមានការប៉ះទង្គិចគ្នាជាមួយកម្លាំងរាជអាវុធហត្ថកាលពីថ្ងៃទី២៥ខែឧសភា ម៉ៅ ស៊ុន អាយុ៣២ឆ្នាំ ជាកម្មករអូសរទេះ បានទទួលរងការវាយដំយ៉ាងខ្លាំងនិងត្រូវចូលព្យាបាលនៅមន្ទីរពេទ្យ។ ពាក្យចចាមអារ៉ាមមិនពិតអំពីការស្លាប់រូបគាត់បានបណ្តាលឲ្យក្រុមអ្នកតវ៉ាវាយប្រហារការិយាល័យគយច្រកប៉ោយប៉ែតជាការសងសឹក ដោយគប់ដុំថ្មរំលងខ្លោងទ្វារមុនពេលធ្វើឲ្យខូចខាតដល់ការិយាល័យ។
ក៏ប៉ុន្តែ លោក ថោង សុខាំភូ មេគយខេត្តបន្ទាយមានជ័យ បាននិយាយកាលពីថ្ងៃអង្គារថា ការតវ៉ាប្រឆាំងអាជ្ញាធរនៅច្រកអន្តរជាតិប៉ោយប៉ែតមិនទាក់ទងនឹងការដកលោក ហៃ ដែលនឹងក្លាយជាអនុប្រធានគយនៅច្រកភ្នំដិនក្នុងខេត្តតាកែវនោះទេ។
លោកបាននិយាយថា “ការផ្ទេរមន្ត្រីគយរបស់យើងនៅទូទាំងប្រទេសរាល់បីឆ្នាំម្តងគឺជាកិច្ចការធម្មតាទេ។ មិនពាក់ព័ន្ធនឹងការខូចខាតដែលបង្កឡើងដោយសារតែការតវ៉ាកាលពីពីរខែមុននោះទេ”។
លោក ហៃ មិនអាចទាក់ទងសុំការអត្ថាធិប្បាយបានទេ។
មួយសប្តាហ៍បន្ទាប់ពីឧប្បត្តិហេតុកាលពីខែឧសភា អាជ្ញាធរបានជួបជាមួយប៉ូលិសនិងកងរាជអាវុធហត្ថដើម្បីធ្វើរបាយការណ៍បញ្ជូនទៅតុលាការខេត្តបន្ទាយមានជ័យ ដែលនៅកំពុងស៊ើបអង្កេតឧប្បត្តិហេតុនេះនៅឡើយ។
កាលពីថ្ងៃច័ន្ទ តុលាការបានសាកសួរ លោក ស៊ុន ជាអ្នកតវ៉ាដែលបានរងរបួស និងភរិយារបស់គាត់ ឈ្មោះ រ៉ាន ស្រីមុំ ដែលក៏មានវត្តមាននៅពេលតវ៉ានោះដែរ។
អ្នកស្រី ស្រីមុំ បាននិយាយថា អ្នកស្រីនិងប្តីរបស់គាត់ត្រូវបានគេសាកសួរអស់រយៈពេលប្រហែលបួនម៉ោងក្នុងបន្ទប់ដោយឡែកពីគ្នា ហើយអ្នកទាំងពីរបានទទួលរងការគំរាមចាប់ដាក់ពន្ធនាគារ ប្រសិនបើពួកគេមិនប្រាប់ ថានរណាបានញុះញង់ឲ្យវាយប្រហារការិយាល័យគយ។
អ្នកស្រីបាននិយាយថា “តុលាការបានសួរសំណួរជាច្រើន ប៉ុន្តែសំណួរទាំងនោះដដែលៗ៖ នរណានៅពីក្រោយការតវ៉ាហិង្សានេះ? តុលាការចង់ឲ្យខ្ញុំបន្ទោសនរណាម្នាក់”៕និត