យោងតាមសេចក្ដីសម្រេចចេញកាលពីថ្ងៃសុក្រ ដោយអគ្គលេខាធិការរដ្ឋសភាបានឲ្យដឹងថា លោក អ៊ុំ សំអាន តំណាងរាស្ត្រគណបក្សប្រឆាំងត្រូវបានហាមមិនឲ្យចូលធ្វើការក្នុងរដ្ឋសភាក្នុងវេលា១៥ពេលប្រជុំជាបន្តបន្ទាប់ ហើយនិងត្រូវកាត់ប្រាក់ខែជាការដាក់ទណ្ឌកម្ម ព្រោះតែការអធិប្បាយរិះគន់ដែលលោកបានបង្ហោះតាមទំព័រហ្វេសប៊ុកកាលពីដើមខែនេះ។
សេចក្ដីសម្រេចបាននិយាយថា លោក អ៊ុំ សំអាន ដែលការបង្ហោះរបស់លោកកាលពីថ្ងៃទី១៥ ខែកក្កដា បានអះអាងថា លោក ហេង សំរិន ប្រធានរដ្ឋសភាគណបក្សប្រជាជនកម្ពុជាមិនបានបញ្ជូនលិខិតមួយច្បាប់ទៅលោកនាយករដ្ឋមន្ត្រី ហ៊ុន សែន នោះ ក៏នឹងត្រូវរងការអាម៉ាស់តាមរយៈកំណត់ហេតុបន្ទោសដែលបិទនៅតាមការិយាល័យឃុំក្នុងមណ្ឌលខេត្តសៀមរាបរបស់លោកដែរ។
សេចក្ដីសម្រេចមានខ្លឹមសារថា “ឯកឧត្ដម អ៊ុំ សំអាន តំណាងរាស្ត្រមណ្ឌលខេត្តសៀមរាប ត្រូវទទួលការបន្ទោស និងទណ្ឌកម្មខាងវិន័យស្របតាមការកំណត់ប្រការ៨១នៃបទបញ្ជាផ្ទៃក្នុងនៃរដ្ឋសភាដូចតទៅ៖ ក-កាត់ប្រាក់បំណាច់ប្រចាំខែហាសិបភាគរយក្នុងរយៈពេល២ខែ។ ខ-ប្រកាសផ្សាយជាសាធារណៈ នូវសម្រង់កំណត់ហេតុបន្ទោស ព្រមទាំងយកទៅបោះពុម្ពហើយបិទនៅគ្រប់ឃុំក្នុងមណ្ឌលខេត្តសៀមរាប។ គ-ហាមមិនឲ្យចូលធ្វើការក្នុងរដ្ឋសភា ក្នុងវេលា១៥ពេលប្រជុំជាបន្តបន្ទាប់”។
លោក ហេង សំរិន បានបដិសេធមិនចារលើលិខិតថ្ងៃទី៦ ខែកក្កដា របស់លោក អ៊ុំ សំអាន និងតំណាងរាស្ត្រគណបក្សសង្គ្រោះជាតិ១១រូបផ្សេងទៀត ដែលអំពាវនាវសុំឲ្យរដ្ឋាភិបាលផ្អាកការកំណត់ព្រំដែនកម្ពុជាជាមួយវៀតណាមរហូតដល់ឆ្នាំ២០១៨ និងស្នើសុំឲ្យរដ្ឋាភិបាលពន្យល់អំពីការដោះដូរដីនៅតាមបណ្ដោយព្រំដែនវៀតណាម។
ឆ្លើយតបទៅនឹងការបង្ហោះហ្វេសប៊ុករបស់លោក អ៊ុំ សំអាន ដែលកើតឡើងបន្ទាប់នោះ លោក ឈាង វុន អ្នកនាំពាក្យរដ្ឋសភាបាននិយាយកាលពីសប្ដាហ៍មុនថា សេចក្ដីសម្រេចនេះត្រូវបានធ្វើឡើង ត្បិតអីលិខិតនោះមានន័យស្មើនឹងការទាមទារជាជាងការលើកសំណួរ។
ក៏ប៉ុន្តែលោក អ៊ុំ សំអាន បានទទូចបញ្ជាក់ថា សិទ្ធិតាមរដ្ឋធម្មនុញ្ញរបស់លោកក្នុងនាមជាតំណាងរាស្ត្រដាក់សំណួរទៅរដ្ឋាភិបាលត្រូវបានរំលោភបំពាន ហើយថា លិខិតនោះមិនត្រូវបានបញ្ជូនបន្តទៅលោក ហ៊ុន សែន ទេ ដោយសារតែបញ្ហាប្រធានបទរសើបខាងនយោបាយ។
យោងតាមលោក អេង ឆៃអា៊ង តំណាងរាស្ត្រមួយរូបក្នុងចំណោមប្រាំមួយរូបរបស់គណបក្សសង្គ្រោះជាតិក្នុងគណៈកម្មាធិការនេះបានឲ្យដឹងថា សេចក្ដីសម្រេចកាលពីថ្ងៃសុក្រដាក់ទណ្ឌកម្មតំណាងរាស្ត្រគណបក្សសង្គ្រោះជាតិ បានធ្វើឡើងអំឡុងកិច្ចប្រជុំនៃគណៈកម្មាធិការអចិន្ត្រៃយ៍រដ្ឋសភាដែលមានសមាជិក១៣រូប។
លោក អេង ឆៃអ៊ាង បានមានប្រសាសន៍ថា ”សេចក្ដីសម្រេចដាក់ទណ្ឌកម្មលោក អ៊ុំ សំអាន ត្រូវបានស្នើឡើងតាមរយៈលិខិតមួយដែលយល់ព្រមដោយតំណាងរាស្ត្រគណបក្សកាន់អំណាច៥០រូប និងយល់ព្រមដោយតំណាងរាស្ត្រគណបក្សប្រជាជនកម្ពុជាប្រាំពីររូបក្នុងគណៈកម្មាធិការអចិន្ត្រៃយ៍នេះ។
លោកបានមានប្រសាសន៍អំពីសមាជិកគណបក្សសង្គ្រោះជាតិថា “និយាយឲ្យខ្លីទៅ យើងមិនបានបោះឆ្នោតគាំទ្រទេ”។
លោក អ៊ុំ សំអាន បានមានប្រសាសន៍កាលពីថ្ងៃសុក្រថា ការដាក់ទណ្ឌកម្មនេះវាធ្ងន់ជ្រុលពេក ហើយថា លោកនឹងព្យាយាមជួបជាមួយលោក ហេង សំរិន ដើម្បី “បញ្ចប់រឿងនេះ”។
លោកបានមានប្រសាសន៍ថា “តាមពិត យើងចង់ស្វែងរកការសម្របសម្រួលនយោបាយមួយជាមួយសម្ដេច ហេង សំរិន ដើម្បីបញ្ចប់រឿងនេះ។ ពីព្រោះខ្ញុំគិតថា យើងមិនគួរឈ្លោះប្រកែកគ្នាក្នុងចំណោមខ្មែរនិងខ្មែរទេ ប៉ុន្តែយើងចាំបាច់ត្រូវផ្ដោតលើបញ្ហាព្រំដែន នៅទិសខាងជើង ខាងលិច និងខាងកើត”។
លោក អ៊ុំ សំអាន រួមជាមួយតំណាងរាស្ត្រគណបក្សសង្គ្រោះជាតិលោក រៀល ខេមរិន្ទ្រ បានដឹកនាំយុទ្ធនាការមួយនាពេលថ្មីៗនេះ ដើម្បីលើកឡើងនូវការទន្ទ្រានព្រំដែនដោយវៀតណាម ដែលបានបង្កឲ្យមានបញ្ហាទំនាក់ទំនងជាសាធារណៈជាមួយរដ្ឋាភិបាលគណបក្សប្រជាជនកម្ពុជា។
ក្នុងពេលប៉ុន្មានសប្ដាហ៍ថ្មីៗនេះ ក្រសួងការបរទេសបានផ្ញើកំណត់ទូតមួយចំនួនទៅប្រទេសវៀតណាម ដោយបានស្នើសុំឲ្យវៀតណាមដកថយចេញពីទឹកដីដែលស្ថិតនៅក្នុងប្រទេសកម្ពុជា ឬកំពុងមានជម្លោះនៅឡើយ។
លោក ហ៊ុន សែន បានទទួលស្គាល់ដែលពុំធ្លាប់មានពីមុនមកថា បង្គោលមួយចំនួនតាមបណ្ដោយព្រំដែនជាមួយប្រទេសវៀតណាម អាចត្រូវបានបោះនៅខាងក្នុងទឹកដីកម្ពុជា ដោយលោកបានសន្យាថា “ទាមទារឲ្យមានការកែតម្រូវ” ក្នុងករណីបែបនេះ។
នៅពេលសួរកាលពីថ្ងៃសុក្រអំពីការដាក់ទណ្ឌកម្មដែលសម្រេចចំពោះលោក អ៊ុំ សំអាន លោក ឈាង វុន អ្នកនាំពាក្យរដ្ឋសភា និងជាតំណាងរាស្ត្រគណបក្សប្រជាជនកម្ពុជា បានមានប្រសាសន៍ថា លោកមិនចង់ពិភាក្សាអំពីបញ្ហានេះទេ។
អ្នកនាំពាក្យរូបនេះបាននិយាយថា “កុំឲ្យខ្ញុំនិយាយ។ ខ្ញុំមិនចង់និយាយទេ យល់ទេ? ស្នើសុំកុំឲ្យរញ៉េរញ៉ៃ។ ទុកឲ្យគេជួយសម្រួលស្ថានការណ៍”៕ មានិត