លោក កែវ ភិរម្យ សមាជិកសភាគណបក្សប្រឆាំងបានបួសជាព្រះសង្ឃនៅវត្តគល់ទទឹង ក្នុងរាជធានីភ្នំពេញកាលពីម្សិលមិញហើយលោកមានគម្រោងប្រើប្រាស់ពេលសម្រាកបច្ចុប្បន្នរយៈពេលមួយខែរបស់សភាដោយចូលរួមសិក្សាស្វែងយល់ពីព្រះពុទ្ធសាសនា នេះបើយោងតាមសមាជិកសភាមួួយរូបដែលបានចូលរួមពិធីនោះ។
លោក សុន ឆ័យ សមាជិកសភាគណបក្សប្រឆាំងបានមានប្រសាសន៍ថា លោក ភិរម្យ ដែលមានសញ្ជាតិនូវែលសេឡង់ ត្រូវបានបោះឆ្នោតជ្រើសរើសជាសមាជិកសភាគណបក្សសង្គ្រោះជាតិមណ្ឌលខេត្តក្រចេះក្នុងការបោះឆ្នោតជាតិឆ្នាំ២០១៣ ប៉ុន្តែ លោកចង់សិក្សារៀនសូត្រក្នុងនាមជាព្រះសង្ឃជាយូរមកហើយ។
លោក សុន ឆ័យ បានថ្លែងថា “គាត់ចាប់អារម្មណ៍ជាខ្លាំងក្នុងការបួសជាព្រះសង្ឃ ប៉ុន្តែ រយៈពេលមួយខែតែប៉ុណ្ណោះអំឡុងពេលរដ្ឋសភាឈប់សម្រាក”។
សមាជិកសភារូបនេះបានឲ្យដឹងថា ពិធីតូចមួយធ្វើឡើងនៅវត្តមួយក្នុងរាជធានីភ្នំពេញដែលមានព្រំប្រទល់ជាប់ក្រុងតាខ្មៅខេត្តកណ្តាល មានការចូលរួមពីមិត្តភក្តិជិតស្និទ្ធ និងក្រុមគ្រួសាររបស់លោក ភិរម្យ តែប៉ុណ្ណោះ។
លោក សុន ឆ័យ បានបន្ថែមថា “ជួនកាលអ្នកនយោបាយប្រើប្រាស់ព្រះពុទ្ធសាសនាហើយបានបួសដើម្បីទាក់ទាញចំណាប់អារម្មណ៍ ពីសាធារណជន ប៉ុន្តែ គាត់ហ្មត់ចត់ណាស់។គាត់មិនមែនជាមនុស្សបែបនោះទេ។ អ្វីៗទាំងអស់គឺនិយាយអំពីការស្វែងរកភាពស្ងប់ស្ងាត់ក្នុងខ្លួន ដើម្បីគាត់អាចជម្រះមន្ទិលសៅហ្មងទាំងឡាយទាំងពួងចេញពីចិត្តរបស់គាត់”។
ប៉ុន្តែ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានមានប្រសាសន៍ថា លោក ភិរម្យ បានបោះបង់ការទទួលខុសត្រូវរបស់ខ្លួនក្នុងនាមជាសមាជិកសភាមួយរូប។
លោក ស៊ីផាន បានលើកឡើងថា ”សមាជិកសភាតំណាងគណបក្សសង្គ្រោះជាតិតែងតែបោះបង់ការទទួលខុសត្រូវរបស់ខ្លួន។ ភារកិច្ចរបស់សមាជិកសភាគឺត្រូវចុះទៅសួរសុខទុក្ខម្ចាស់ឆ្នោតរបស់ខ្លួន ហើយស្តាប់យោបល់របស់ពួកគាត់ ប៉ុន្តែ ពួកគេបានបោះបង់ការងារនោះ ហើយមកបួសជាព្រះសង្ឃនៅពេលសម្រាកទៅវិញ”។
លោកបានបន្ថែមថា “គាត់នៅតែបើកប្រាក់ខែពីរដ្ឋសភាដដែលនៅខែនេះ ហើយគេរំពឹងថា គាត់នឹងបម្រើម្ចាស់ឆ្នោតរបស់ខ្លួនក្នុងនាមជាសមាជិកសភាដ៏សកម្មមួយរូប”។
គេមិនអាចទាក់ទងលោក ភិរម្យ ដើម្បីសុំការអត្ថាធិប្បាយបានទេ។
ទោះជាយ៉ាងណា ព្រះតេជគុណ ប៊ុត ប៊ុនទិញ ប្រធានបណ្តាញព្រះសង្ឃឯករាជ្យដើម្បី យុត្តិធម៌សង្គមបានមានសង្ឃដីកាថា ព្រះអង្គយល់ស្របនឹងគម្រោងរបស់លោក ភិរម្យ។
ព្រះតេជគុណមានសង្ឃដីកាថា “វាមិនទាស់ខុសអ្វីទេ។ ប្រសិនបើគាត់បួសជាព្រះសង្ឃ គាត់នឹងមានវប្បធម៌ល្អនៅក្នុងចិត្តក្នុងការតាក់តែងច្បាប់ប្រកបដោយផ្លែផ្កា”។
ព្រះអង្គបានបន្ថែមថា “អ្នកដែលស្ថិតក្នុងតួនាទីខ្ពស់ដូចជាសមាជិកសភាជាដើមគួរមើលឲ្យបានគ្រប់ជ្រុងជ្រោយដើម្បីស្វែងយល់ពីតម្រូវការសង្គម ហើយកម្ពុជាជាប្រទេសកាន់ព្រះពុទ្ធសាសនា។ ប្រសិនបើគាត់ចង់បង្កើតច្បាប់សម្រាប់ពុទ្ធសាសនិក វាជាការល្អបំផុតក្នុងការស្ថិតនៅក្នុងវត្តអារាម”៕សារុន