27 C
Phnom Penh

អតីត​​​ព្រះ​​​សង្ឃ​​​ថាខ្លួន​​​​​​ត្រូវ​​​គេ​​​ទម្លាក់​​​កំហុស​​​ដាក់​​​​​​ដោយ​​​សារ​​​តែភាព​​​សកម្មផ្នែក​​​នយោ​​​បាយ​​​​​

ដោយ ឌឹ ខេមបូឌា ដេលី

បទវិភាគ

តុលាការ​​​ក្រុង​​​ភ្នំ​​​ពេញ​​​កាល​​​ពី​​​ថ្ងៃ​​​ច័ន្ទ​​​​​​ បាន​​​ចោទ​​​ប្រកាន់​​​​​​អតីត​​​ព្រះ​​​សង្ឃ​​​ពីរ​​​នាក់​​​​​​ដែល​​​ត្រូវ​​​បាន​​​ចាប់​​​ខ្លួន​​​​​​ក្នុង​​​ខណ្ឌ​​​ពោធិ៍​​​សែន​​​ជ័យ​​​​​​ កាល​​​ពី​​​ថ្ងៃ​​​សៅរ៍​​​ ដោយ​​​សារ​​​មាន​​​គ្រឿង​​​ញៀន​​​ ឆាយា​​​​​​ក្លែង​​​ក្លាយ​​​​​​និង​​​​​​អាវុធ ប៉ុន្តែ​​​ អ្នក​​​ទាំង​​​ពីរ​​​អះអាង​​​ថា ខ្លួន​​​ត្រូវ​​​គេ​​​ទម្លាក់​​​កំហុស​​​ដាក់​​​​​​ជា​​​ការ​​​សង​​​សឹក​​​​​​ដោយសារ​​​តែ​​​ពួក​​​គេ​​​ធ្វើ​​​​​​សកម្ម​​​ភាព​​​​​​នយោបាយ។

cam-photo-monks-channa-800x533
អតីតព្រះ​​​សង្ឃ ជា វ៉ាន់​​​ដា (ឆ្វេង​​​) និង​​​ដាវ ទេព​​​ចាក​​​ចេញ​​​ពី​​​តុលាការ​​​ក្រុង​​​ភ្នំពេញ​​​កាល​​​ពី​​​ថ្ងៃ​​​ចន្ទ​​​ បន្ទាប់​​​ពី​​​​​​ត្រូវ​​​ចោទ​​​ប្រកាន់​​​ពី​​​បទ​​​មាន​​​គ្រឿង​​​ញៀន​​​ ឆាយា​​​ក្លែង​​​ក្លាយ​​​​​​​​​និង​​​ការ​​​គំរាម​​​សម្លាប់​​​។  រូបថត ស៊ីវ ចាន់ណា/ The Cambodia Daily​​​​​​​​​

យោង​​​តាម​​​មេធាវី​​​របស់​​​ពួកគេ​​​ អ្នកស្រី មុត ពិសិទ្ធ ឲ្យ​​​ដឹង​​​ថា តុលាការ​​​​​​បានចោទ​​​ប្រកាន់​​​ ដាវ ទេព អាយុ​​​២៨​​​ឆ្នាំ​​​និង​​​ ជា វ៉ាន់​​​ដា​​​ អាយុ​​​៣០​​​ឆ្នាំ​​​ពី​​​បទ​​​​​​មាន​​​គ្រឿង​​​ញៀន​​​និង​​​ឆាយា​​​ក្លែង​​​ក្លាយ​​​​​​និង​​​ការ​​​គំរាម​​​សម្លាប់​​​។

អ្នកស្រី​​​ ពិសិទ្ធ ជា​​​មេធាវី​​​​​​​​​នៅ​​​​​​អង្គ​​​ការ​​​សិទ្ធិ​​​មនុស្ស​​​ អាដ​​​ហុក បាន​​​ិយាយ​​​ថា ” កូន​​​ក្តី​​​​​​​​​ខ្ញុំ​​​​​​​​​បដិ​​​សេធ​​​ចោល​​​ការ​​​ចោទ​​​របស់​​​ប៉ូលិស​​​ចំពោះ​​​មុខ​​​ចៅ​​​ក្រម​​​​​​ស៊ើប ពី​​​ព្រោះ​​​ពួក​​​គាត់​​​មិន​​​បាន​​​ធ្វើ​​​​​​ដូច​​​​​​​​​តាម​​​ការ​​​ចោទ​​​ប្រកាន់​​​របស់​​​តុលាការទេ។ ពួក​​​គាត់​​​បាន​​​បដិសេធ​​​ថា របស់​​​ទាំង​​​អស់​​​​​​មិន​​​មែន​​​របស់​​​ពួកគាត់​​​​​​ទេ”។​​​​​​​​​​​​​​​

លោក ទេព​​​និង​​​លោក វ៉ាន់​​​ដា ត្រូវ​​​ប៉ូលិស​​​ចាប់​​​ខ្លួន​​​​​​កាល​​​ពី​​​ព្រឹក​​​ថ្ងៃ​​​សៅរ៍​​​​​​ក្នុង​​​វត្ត​​​អង្គ​​​តាមិញ សង្កាត់​​​ចោម​​​ចៅដែល​​​ប៉ូលិស​​​និយាយ​​​ថា​​​គេ​​​បាន​​​រក​​​ឃើញ​​​ម៉ា​​​ទឹក​​​កកមួយ​​​ចំនួន​​​តូច​​​ក្នុង​​​កុដិ រួម​​​ជាមួយ​​​ដាវ​​​មួយ​​​ កាំបិត​​​​​​មួយ​​​និង​​​ពូថៅ​​​មួយ។​​​ ពួកគេ​​​បាន​​​រក​​​ឃើញផងដែរ​​​​​​ខោស្លី​​​ប​​​ស្ត្រី​​​មួយ​​​គូ​​​និង​​​ឯកសារ​​​ក្លែង​​​ក្លាយ ដែល​​​ជា​​​ឯកសារ​​​តម្រូវ​​​ដោយ​​​ក្រសួង​​​ធម្មការ​​​និង​​​សាសនា​​​ពេល​​​ចូល​​​បួស។បុរស​​​ទាំង​​​ពីរ​​​ត្រូវ​​​ចាប់​​​ផ្សឹក​​​កាល​​​ពី​​​រសៀល​​​ថ្ងៃ​​​សៅរ៍។

អ្នក​​​ស្រី ពិសិទ្ធ បាន​​​និយាយ​​​ថា បទ​​​ចោទគំរាម​​​សម្លាប់​​​​​​កើត​​​ចេញ​​​មក​​​ពី​​​​​​ការ​​​ឈ្លោះ​​​ប្រកែក​​​គ្នា​​​​​​រវាង​​​​​​លោក ទេព​​​និង​​​ក្មេង​​​វត្ត​​​កាល​​​ពី​​​មួយ​​​សប្តាហ៍​​​មុន។កាល​​​ពី​​​ថ្ងៃ​​​អាទិត្យ​​​ ក្មេង​​​វត្ត​​​ម្នាក់​​​ឈ្មោះ ជួន រដ្ឋា អាយុ​​​២២​​​ឆ្នាំ​​​ បាន​​​និយាយ​​​ថា ប៉ូលិស​​​បាន​​​បញ្ចុះ​​​បញ្ចូល​​​​​​ខ្លួន​​​ឲ្យ​​​ផ្តិត​​​​​​មេដៃ​​​លើ​​​ពាក្យ​​​បណ្តឹង​​​​​​ប្រឆាំង​​​នឹង​​​លោក ទេព។​​​ លោក រដ្ឋា បាន​​​និយាយ​​​ថា ក្រោយ​​​មក​​​ខ្លួន​​​​​​ព្យាយាម​​​​​​ដក​​​ពាក្យ​​​បណ្តឹង​​​មក​​​វិញ ប៉ុន្តែ​​​ ប៉ូលិស​​​​​​មិន​​​យល់​​​ព្រម​​​ទេ។ លោក រដ្ឋា​​​ បាន​​​និយាយ​​​អំពី​​​ការ​​​ឈ្លោះ​​​ទាស់​​​ទែង​​​ជាមួយ​​​លោក ទេព​​​ថា “គ្រាន់​​​តែ​​​ជា​​​ការ​​​យល់​​​ច្រឡំ​​​ប៉ុណ្ណោះ​​​ហើយ​​​ក៏​​​ជា​​​រឿង​​​តូច​​​តាច​​​ដែរ”។

ដោយរង់​​​ចាំបទ​​​​​​ចោទ​​​​​​​​​នៅ​​​ខាង​​​ក្រៅ​​​​​​បន្ទប់​​​ចៅ​​​ក្រម​​​​​​នៅឯ​​​តុលាការ​​​ក្រុង​​​កាល​​​ពី​​​ថ្ងៃ​​​ចន្ទ លោក វ៉ាន់ដា បាន​​​និយាយ​​​ថា​​​រូប​​​គាត់​​​និង​​​លោក ទេព គ្មាន​​​កំហុស​​​ទេ។

លោក វ៉ាន់ដា បាន​​​និយាយ​​​ថា “ពួក​​​អាត្មា​​​​​​​​​មិន​​​បាន​​​ប្រព្រឹត្ត​​​អ៊ី​​​ចឹង​​​ទេ ព្រោះ​​​ពួក​​​​​​អាត្មា​​​ជា​​​សង្ឃ។ ប្រសិន​​​បើ​​​ពួក​​​អាត្មា​​​​​​ចង់​​​ប្រព្រឹត្ត​​​បែប​​​ហ្នឹង មាន​​​តែ​​​ជា​​​គ្រហស្ថ​​​ប៉ុណ្ណោះ​​​​​​ដែល​​​ធ្វើ​​​បែបហ្នឹង”។

លោក ទេព បាន​​​និយាយ​​​ថា រូប​​​គាត់​​​និង​​​លោក វ៉ាន់​​​ដា ទំនង​​​ជា​​​ត្រូវ​​​ទទួល​​​ទណ្ឌ​​​កម្ម​​​ដោយ​​​សារ​​​តែ​​​ភាព​​​សកម្ម​​​របស់​​​ខ្លួន ជា​​​ពិសេស​​​ពួកគេបាន​​​​​​ចូល​​​រួម​​​ក្នុង​​​បាតុកម្ម​​​​​​តាម​​​ព្រំ​​​ដែន​​​វៀត​​​ណាម​​​ក្នុង​​​រយៈ​​​ពេល​​​ប៉ុន្មាន​​​ខែ​​​កន្លង​​​មក​​​នេះ។

លោក ទេព បាន​​​និយាយ​​​ថា “ពួកអាត្មា​​​ធ្លាប់​​​​​​ទៅ​​​ព្រំដែន​​​​​​ជាមួយ​​​តំណាង​​​រាស្ត្រ​​​គណបក្ស​​​សង្គ្រោះ​​​ជាតិ​​​ រួម​​​មាន​​​ខេត្ត​​​ស្វាយ​​រៀង​​​ រតនគិរី និង​​​កណ្តាល​​​ ហើយ​​​ចូល​​​រួម​​​តវ៉ា​​​ប្រឆាំង​​​នឹង​​​អយុត្តិធម៌​​​សង្គមផ្សេងៗ​​​”។

លោក គង់ សម​​​សារ៉េត ព្រះរាជអាជ្ញារង​​​ទទួល​​​បន្ទុក​​​រឿង​​​ក្តី​​​នេះ​​​ បាន​​​និយាយ​​​ថា លោក​​​បាន​​​ចោទ​​​អ្នកទាំង​​​ពីរ​​​ជា​​​បឋម​​​រួច​​​ហើយ​​​​​​ក៏​​​បញ្ជូន​​​​​​សំណុំ​​​រឿង​​​ទៅ​​​លោក អ៊ី ថាវរៈ ចៅក្រម​​​​​​ស៊ើប​​​អង្កេត។​​​​​​​​​​​​​​​​​​​​​​​​​​​​​​​​​​​​​​​​​​

លោក សម​​​សារ៉េត បាន​​​និយាយ​​​ដោយ​​​មិន​​​អត្ថា​​​ធិប្បាយ​​​ថា “​​​​​​យើង​​​បាន​​​រក​​​ឃើញ​​​គ្រឿង​​​ញៀន​​​ កាំបិត​​​មួយ​​​និង​​​ពូថៅ​​​មួយ។ យើង​​​ចោទ​​​ប្រកាន់​​​ពួក​​​គេ​​​​​​ដោយ​​​ផ្អែក​​​​​​លើ​​​របាយការណ៍​​​​​​និង​​​ភ័ស្តុតាង​​​ប៉ូលិស”។​​​​​​​​​​​​

ចៅក្រម ថាវរៈ​​​មិន​​​អាច​​​ទាក់​​​​​​ទង​​​សុំ​​​ការ​​​ធ្វើ​​​អត្ថា​​​ធិប្បាយ​​​បាន​​​ទេ។​​​

លោក សឹង សែនករុណា មន្ត្រី​​​ស៊ើប​​​អង្កេត​​​ជាន់​​​ខ្ពស់​​​អង្គការ​​​សិទ្ធិ​​​មនុស្ស​​​ អាដហុក បាន​​​និយាយ​​​ថា ដោយ​​​សារ​​​តែ​​​ព្រះ​​​សង្ឃ​​​ទាំង​​​ពីរ​​​អង្គ​​​មិន​​​មាន​​​វត្ត​​​មាន​​​ទេ នៅ​​​ពេល​​​ដែល​​​ប៉ូលិស​​​ឆែក​​​ឆេរ​​​កុដិ ដូច្នេះ​​​ភ័ស្តុតា​​​ង​​​ទាំង​​​អស់​​​មិន​​​គួរយក​​​ជា​​​ការ​​​បាន​​​​​​នៅ​​​ក្នុង​​​តុលាការ​​​ទេ។​​​​​​​​​

លោក សែនករុណា បាន​​​និយាយ​​​ថា “ហេតុ​​​ដូច្នេះ យើង​​​សូម​​​​​​អំពាវ​​​​​​នាវ​​​សុំ​​​ឲ្យ​​​តុលាការ​​​ទម្លាក់​​​បទ​​​ចោទ​​​ទាំង​​​អស់​​​ហើយ​​​ដោះ​​​លែង​​​ពួកគេ”៕រើន​​​ (រាយការណ៍​​​បន្ថែម​​​ដោយ អ៊ូច សូនី)

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស