លោកនាយករដ្ឋមន្ត្រី ហ៊ុន សែន បានចេញសេចក្ដីសម្រេចមួយកាលពីថ្ងៃព្រហស្បតិ៍ បង្កើតគណៈកម្មការពិសេសមួយដើម្បីពិនិត្យផ្ទៀងផ្ទាត់ផែនទីដែលប្រទេសកម្ពុជាខ្ចីពី អង្គការសហប្រជាជាតិ ក្នុងបំណងពិនិត្យផែនទីទាំងនោះធៀបនឹងផែនទីដែលកំពុងប្រើដោយ “ភាគីពាក់ព័ន្ធ”។
សេចក្ដីសម្រេចនេះធ្វើឡើងចំពេលមានយុទ្ធនាការរបស់គណបក្សសង្គ្រោះជាតិ ដែលបញ្ចេញឲ្យដឹងការទន្ទ្រានដោយវៀតណាមចូលប្រទេសកម្ពុជា និងបានបន្តុះបង្អាប់កិច្ចការរបស់រដ្ឋាភិបាលជាមួយប្រទេសវៀតណាមក្នុងការកំណត់ព្រំដែនរួម។
លោក សម រង្ស៊ី មេដឹកនាំគណបក្សប្រឆាំងបានមានប្រសាសន៍ថា ការផ្ដន្ទាទោសសកម្មជនគណបក្សសង្គ្រោះជាតិ១១នាក់ភ្លាមៗពីបទកុបកម្មកាលពីខែមុន ជាការព្រមានមួយចំពោះគណបក្សនេះឲ្យបញ្ឈប់ដំណើរចុះត្រួតពិនិត្យរបស់ខ្លួននៅតាមតំបន់ព្រំដែនមានជម្លោះ។
ជាការឆ្លើយតបទៅនឹងសំណើសុំច្បាប់ដើមនៃផែនទីដែលគូសដោយបារាំង និងកំណត់ឲ្យប្រើប្រាស់ដោយរដ្ឋធម្មនុញ្ញ លោក បាន គីមូន អគ្គលេខាធិការអង្គការសហប្រជាជាតិ បានផ្ញើលិខិតមួយច្បាប់ជូនលោក ហ៊ុន សែន កាលពីថ្ងៃពុធ ដោយជូនដំណឹងលោក ហ៊ុន សែន ថា អង្គការសហប្រជាជាតិមិនមានផែនទីតាមសំណើទេ ប៉ុន្តែនឹងផ្ដល់ឲ្យប្រទេសកម្ពុជានូវផែនទីផ្សេងទៀត “ដែលអាចមានប្រយោជន៍ចំពោះរដ្ឋាភិបាលរបស់លោក”។
លោក បាន គីមូន បានសរសេរថា “ជាគោលការណ៍បណ្ណាល័យ ដាក ហាម៉ាស្កូហ្សូល របស់អង្គការសហប្រជាជាតិមិនអនុញ្ញាតឲ្យខ្ចីផែនទីដែលស្ថិតក្រោមការថែរក្សារបស់ខ្លួនទេ…ប៉ុន្តែមានការព្រមព្រៀងថា តាមមូលដ្ឋានលើកលែង បណ្ណាល័យនេះនឹងឲ្យរដ្ឋាភិបាលរបស់លោកខ្ចីផែនទីដូចបានរៀបរាប់ខាងលើសម្រាប់រយៈពេលមានកំណត់មួយ”។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានមានប្រសាសន៍កាលពីថ្ងៃសុក្រថា ផែនទីដែលឲ្យប្រទេសកម្ពុជាខ្ចីនោះ ដំបូងឡើយត្រូវបានតម្កល់ទុកនៅអង្គការសហប្រជាជាតិ ដោយសម្ដេច នរោត្តម សីហនុ នៅពេលនោះ ជាផ្នែកមួយនៃការតវ៉ាចំពោះការទម្លាក់គ្រាប់បែកអាមេរិក និងការរំលោភទឹកដីកម្ពុជាដោយវៀតណាមខាងត្បូង។
លោក ស៊ីផាន បានមានប្រសាសន៍ថា “អ្វីដែលលោកនាយករដ្ឋមន្ត្រីបានស្នើពីអង្គការសហប្រជាជាតិ គឺជាផែនទីមួយដែលបង្ហាញរាជាណាចក្រកម្ពុជាជាផ្លូវការ។ អ្វីដែលយើងបានដឹងគឺថា អង្គការសហប្រជាជាតិបានផ្ដល់ឲ្យយើងនូវផែនទីមួយដែលដាក់ក្នុងការតវ៉ារបស់ព្រះរាជាណាចក្រទី១ប្រឆាំងនឹងការទម្លាក់គ្រាប់បែកដោយអាមេរិក និងការលុកលុយដោយវៀតណាម”។
លោក ផៃ ស៊ីផាន បានបដិសេធមិននិយាយថា ផែនទីនោះត្រូវបានដាក់តម្កល់ដំបូងនៅអង្គការសហប្រជាជាតិនៅពេលណាទេ។ ក្នុងឆ្នាំ១៩៦៤ ប្រទេសកម្ពុជាបានដាក់ការតវ៉ាមួយទៅអង្គការសហប្រជាជាតិចំពោះការរំលោភបំពានទឹកដី និងដែនអាកាសរបស់ខ្លួនពីសំណាក់អាមេរិក និងវៀតណាមខាងត្បូងក្នុងសង្គ្រាមឥណ្ឌូចិនលើកទី២។
ក្នុងលិខិតថ្លែងអំណរគុណអង្គការសហប្រជាជាតិចំពោះការផ្ដល់ផែនទីនេះ លោក ហ៊ុន សែន បានមានប្រសាសន៍ថា វានឹងមានប្រយោជន៍ “ក្នុងការបញ្ចៀស និងបញ្ចប់នូវការញុះញង់បង្កើតស្មារតីជាតិនិយមជ្រុល”។
ក្នុងសេចក្ដីសម្រេចដែលចេញកាលពីថ្ងៃព្រហស្បតិ៍ លោក ហ៊ុន សែន បានមានប្រសាសន៍ថា គណៈកម្មការដែលបង្កើតឡើងដើម្បីសិក្សាអំពីផែនទីរបស់អង្គការសហប្រជាជាតិនឹងត្រូវដឹកនាំដោយលោក ហោ ណាំហុង រដ្ឋមន្ត្រីក្រសួងការបរទេស និងមានសមាសភាពសមាជិក១០រូបផ្សេងទៀតក្នុងនោះមានលោក វ៉ា គឹមហុង រដ្ឋមន្ត្រីទទួលបន្ទុកកិច្ចការព្រំដែន និងតំណាងមកពីក្រសួងពាក់ព័ន្ធ។
ប្រការ៣នៃសេចក្ដីសម្រេចនេះនិយាយថា “គណៈកម្មការនេះត្រូវចាត់ចែង សម្របសម្រួលការទទួល ប្រគល់ និងការពិនិត្យផ្ទៀងផ្ទាត់ផែនទី ដោយមានការចូលរួមពីគ្រប់ភាគីពាក់ព័ន្ធ ជាអាទិតំណាងមកពីគណបក្សដែលមានអាសនៈនៅក្នុងព្រឹទ្ធសភា និងរដ្ឋសភា តំណាងរាជបណ្ឌិតសភាកម្ពុជា និងអ្នកជំនាញការផែនទីជាតិ និងអន្តរជាតិ”។
កាលពីថ្ងៃព្រហស្បតិ៍ រដ្ឋាភិបាលក៏បានផ្ដល់ផែនទីព្រំដែនរបស់ខ្លួនផ្ទាល់ទៅលោក សុខ ទូច អ្នកវិភាគនយោបាយដ៏លេចធ្លោ និងជាប្រធានវិទ្យាស្ថានទំនាក់ទំនងអន្តរជាតិនៅរាជបណ្ឌិតសភានៃកម្ពុជា ដែលកំពុងដឹកនាំការស្រាវជ្រាវព្រំដែនសម្រាប់រដ្ឋាភិបាល។
លោក សុខ ទូច បានមានប្រសាសន៍កាលពីម្សិលមិញថា លោកបានស្នើឲ្យបង្កើតក្រុមស្រាវជ្រាវព្រំដែនមួយនៅរាជបណ្ឌិត្យសភា ក្នុងកិច្ចប្រឹងប្រែងមួយមិនឲ្យបញ្ហានេះពាក់ព័ន្ធនឹងនយោបាយ ដែលជាយូរមកហើយ ជាសាទុក្ខមួយក្នុងចំណោមសាទុក្ខដ៏សំខាន់របស់គណបក្សប្រឆាំងចំពោះរដ្ឋាភិបាល។ លោកបានមានប្រសាសន៍ថា លោក សម រង្ស៊ី បានយល់ព្រមប្រគល់ផែនទីរបស់គណបក្សប្រឆាំងឲ្យលោកនៅថ្ងៃច័ន្ទ។
លោក សុខ ទូច បានមានប្រសាសន៍ថា “បញ្ហាសំខាន់គឺថា មានមតិផ្សេងគ្នាជាច្រើនពីអង្គការក្រៅរដ្ឋាភិបាល គណបក្សសង្គ្រោះជាតិ និងគណបក្សប្រជាជនកម្ពុជាអំពីបញ្ហាព្រំដែន ហើយរឿងនេះកំពុងបង្កើតការប្រេះឆាក្នុងសង្គមកម្ពុជា”។
លោកបានមានប្រសាសន៍ថា “ហេតុនេះហើយក្រុមរបស់យើងកំពុងធ្វើការស្រាវជ្រាវ ដើម្បីបង្កើតលទ្ធផលរកឃើញជាលាយលក្ខណ៍អក្សរដែលផ្អែកលើគតិយុត្តិ”។ លោកបានបន្ថែមថា លោកក៏បានប្រមូលផែនទីជាច្រើនពីអង្គការសហប្រជាជាតិ បណ្ណាល័យនានានៅទីក្រុងបា៉រីស និងបណ្ណាល័យសភាអាមេរិក។
លោកបានមានប្រសាសន៍ថា “យើងសង្ឃឹមថា អ្នកនយោបាយនឹងឈប់ប្រើអាយុជីវិតប្រទេសជាតិសម្រាប់ចំណេញនយោបាយ ពីព្រោះពួកគេគួរធ្វើការដើម្បីអភិវឌ្ឍប្រទេស កុំប្រើបញ្ហាព្រំដែនដើម្បីប្រយោជន៍ផ្ទាល់ខ្លួន និងគណបក្ស”។
លោក អ៊ុំ សំអាន តំណាងរាស្ត្រគណបក្សប្រឆាំងមួយរូបដែលដឹកនាំយុទ្ធនាការព្រំដែនរបស់គណបក្សសង្គ្រោះជាតិ ដែលរួមមានការធ្វើដំណើររបស់អ្នកគាំទ្រប្រហែល២.៥០០នាក់ទៅតំបន់ព្រំដែនមានជម្លោះក្នុងខេត្តស្វាយរៀងកាលពីខែមុន បានមានប្រសាសន៍ថា គណៈកម្មការព្រំដែនដែលមានសុទ្ធតែមន្ត្រីរដ្ឋាភិបាលគឺមិនអាចទទួលយកបានទេ។
លោកបានមានប្រសាសន៍ថា “យើងចង់ឲ្យរដ្ឋាភិបាលបង្កើតគណៈកម្មការមួយដែលមានតំណាងនានាមកពីគណបក្សសង្គ្រោះជាតិ អង្គការក្រៅរដ្ឋាភិបាល និងជាពិសេសអ្នកជំនាញការព្រំដែនអង្គការសហប្រជាជាតិ ដើម្បីពិនិត្យផ្ទៀងផ្ទាត់ផែនទី ដូចផែនទីត្រូវបានបញ្ជូនដោយអង្គការសហប្រជាជាតិ”។
លោក សំអាន បានបន្ថែមថា លោកមិនជឿថា លទ្ធផលនៃការស្រាវជ្រាវនេះដែលត្រូវធ្វើឡើងដោយរាជបណ្ឌិត្យសភា ជាស្ថាប័នរដ្ឋ នឹងមានឯករាជ្យពិតប្រាកដទេ។
លោកបានមានប្រសាសន៍ថា “ក្រុមស្រាវជ្រាវរាជបណ្ឌិត្យសភាដែលដឹកនាំដោយបណ្ឌិត សុខ ទូច គឺប្រសើរជាងគណៈកម្មការព្រំដែន [របស់រដ្ឋាភិបាល] ដែលដឹកនាំដោយលោក វ៉ា គឹមហុង។ ប៉ុន្តែខ្ញុំជឿថា នឹងមានការលម្អៀងទៅរករដ្ឋាភិបាល”៕ និត (រាយការណ៍បន្ថែមដោយ Colin Meyn)