ឈ្មួញគ្រឿងញៀនម្នាក់ដែលជាប់ពាក់ព័ន្ធនឹងរឿងអាស្រូវពុករលួយដ៏លេចធ្លោមួយនៅពេលដែលរឿងកើតឡើង ដែលថារថយន្ត SUV របស់ខ្លួនត្រូវបានជូនជារង្វាន់ដល់កូនប្រុសរបស់លោក អាំង មាលតី អតីតប្រធានតុលាការក្រុងភ្នំពេញនោះ ត្រូវបានផ្ដន្ទាទោសឲ្យជាប់ពន្ធនាគារកាលពីថ្ងៃសុក្រ ប៉ុន្តែតុលាការបានបញ្ជាឲ្យគេប្រគល់ឡាននោះឲ្យគាត់វិញ។
រថយន្តម៉ាក Audi SUV របស់លោក ថាវ ថាវី ត្រូវបានគេរឹបអូសនៅពេលដែលគាត់ត្រូវបានគេចាប់ខ្លួនដំបូងកាលពីខែវិច្ឆិកា ពីបទជាប់ពាក់ព័ន្ធនៅក្នុងការជួញដូរគ្រឿងញៀន។ គាត់ត្រូវបានចាប់ខ្លួនជាថ្មីក្នុងខែកុម្ភៈ ពីបទរំលោភលើលក្ខខណ្ឌនៅក្រៅឃុំ។
បន្ទាប់ពីលោក មាលតី ត្រូវបានបណ្ដេញចេញពីតុលាការក្រុងភ្នំពេញ ក្នុងពេលដែលមានការចោទប្រកាន់ថា មានអំពើពុករលួយធ្ងន់ធ្ងរកាលពីខែកុម្ភៈ នគរបាលជាតិបានចេញសេចក្ដីថ្លែងការណ៍មួយដោយអះអាងថា រថយន្តរបស់លោក ថាវី ត្រូវបានប្រគល់ជូនកូនប្រុសអតីតប្រធានតុលាការនេះជាអធិការងខណ្ឌ៧មករា។
ដោយប្រកាសសាលក្រមក្នុងករណីជួញដូរគ្រឿងញៀនកាលពីថ្ងៃសុក្រ ចៅក្រមជំនុំជម្រះលោក សេង លាង បានផ្ដន្ទាទោសលោក ថាវី ឲ្យជាប់ពន្ធនាគារ២ឆ្នាំ ប៉ុន្តែបាននិយាយថា គាត់គ្រាន់តែជាប់ក្នុងពន្ធនាគារ៨ខែប៉ុណ្ណោះ ហើយក៏បញ្ជាឲ្យគេប្រគល់រថយន្ត SUV ឲ្យគាត់វិញ។
ចៅក្រម លាង បានប្រកាសថា “តុលាការសម្រេចផ្ដន្ទាទោស ថាវ ថាវី អាយុ៣២ឆ្នាំ ឲ្យជាប់ពន្ធនាគារ២ឆ្នាំ ប៉ុន្តែបញ្ជាឲ្យគាត់ជាប់ត្រឹមតែ៨ខែប៉ុណ្ណោះពីបទជួញដូរគ្រឿងញៀន។ តុលាការសម្រេចផ្ដល់រថយន្ត Audi ឲ្យម្ចាស់ដើមវិញ”។
ស្រី ចាន់ និង ខៀវ ស្រីរ័ត្ន ទាំងពីរនាក់មានអាយុ២១ឆ្នាំដូចគ្នា ត្រូវបានកាត់ឲ្យជាប់ពន្ធនាគារពីរឆ្នាំ និងបង្គាប់ឲ្យជាប់ពន្ធនាគារតែ១១ប៉ុណ្ណោះ។ ស្ត្រីទាំងពីរនាក់ត្រូវបានចាប់ខ្លួនក្នុងខែកញ្ញា នៅខណ្ឌសែនសុខ ហើយក៏មានការជាប់ទាក់ទងនឹងលោក ថាវី ដែរ។
ចៅក្រម លាង បាននិយាយថា មេតំហ្វេតាមីនចំនួន៤,៤ក្រាម ត្រូវបានរឹបអូសជាភ័ស្តុតាងនៅក្នុងករណីនោះ។ ចៅក្រមរូបនេះបានទាត់ចោលការការពាររបស់អ្នកទាំងពីរ ដែលរួមមានការអះអាងថា របាយការណ៍ដំបូងរបស់ខ្លួនចំពោះប៉ូលិសគឺក្លែងក្លាយ ហើយថា ពួកគេមិនស្គាល់គ្នា ឬស្គាល់លោក ថាវី ។
ចៅក្រមរូបនេះបាននិយាយថា “មានភ័ស្តុតាងគ្រប់គ្រាន់ចំពោះ ស្រី ចាន់ ខៀវ ស្រីរ័ត្ន និង ថាវ ថាវី ថាបានជួញដូរគ្រឿងញៀន”។
មន្ត្រីមកពីអង្គភាពប្រឆាំងអំពើពុករលួយដែលបានចាប់ផ្ដើមស៊ើបអង្កេតលើលោក មាលតី ភ្លាមៗបន្ទាប់ពីការបណ្ដេញចេញពីតំណែង មានវត្តមាននៅក្នុងតុលាការ ហើយក៏ថតវីដេអូក្នុងការប្រកាសសាលក្រមនេះដែរ។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយមិនអាចទាក់ទងសុំការធ្វើអត្ថាធិប្បាយបានទេ៕ រើន