មន្ត្រីប្រឆាំងអំពើពុករលួយជាន់ខ្ពស់មួយរូបបាននិយាយថា អតីតនាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ត្រូវបង់ប្រាក់ចំនួន៣៥១.០០០ដុល្លារជាសំណូកដែលលោកបានកេងប្រវ័ញ្ចយកជាថ្នូរនឹងការផ្តល់កិច្ចសន្យាទិញមុង ដោយទទួលស្គាល់នូវកំហុសរបស់លោកអតីតនាយករូបនេះ ប៉ុន្តែថា លោកអតីតនាយកនេះមិនត្រូវទទួលការផ្តន្ទាទោសទេ។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានមានប្រសាសន៍ថា រដ្ឋាភិបាលមិនអាចប្តឹងលោក ឌូង សុជាតិ ដែលឥឡូវនេះជាទីប្រឹក្សារបស់លោក សាយ ឈុំ ប្រធានព្រឹទ្ធសភាមកពីគណបក្សប្រជាជនកម្ពុជាទៅកាន់តុលាការបានទេ ពីព្រោះបទល្មើសរបស់លោកបានកើតឡើងមុនមានច្បាប់ប្រឆាំងអំពើពុករលួយ។ យ៉ាងហោចណាស់នេះជាការដោះសាលើកទី៣ដែលលោក ឱម យ៉ិនទៀង ធ្វើឡើងសម្រាប់ការបដិសេធរបស់រដ្ឋាភិបាលមិនផ្តន្ទាទោសអតីតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់។
ក្នុងឆ្នាំ២០១៣ មូលនិធិសកលប្រយុទ្ធនឹងជំងឺអេដស៍ របេង និងជំងឺគ្រុនចាញ់ បានចេញលទ្ធផលនៃការស៊ើបរយៈពេលមួយឆ្នាំ ដែលចោទប្រកាន់លោក សុជាតិ ថាបានយកប្រាក់មួយចំនួនធំក្នុងប្រាក់៤១០.០០០ដុល្លារជាសំណូក ដើម្បីទទួលបានប្រាក់១២លានដុល្លារក្នុងប្រាក់ជំនួយមូលនិធិសកលសម្រាប់ក្រុមហ៊ុនផ្គត់ផ្គង់មុងបរទេសចំនួនពីរក្រុមហ៊ុនអស់រយៈពេលជាច្រើនឆ្នាំ។ អ.ប.ព. បានបើកការស៊ើបអង្កេតផ្ទាល់របស់ខ្លួន ហើយបាននិយាយថា ខ្លួនបានស៊ើបអង្កេតគណនីធនាគាររបស់លោក សុជាតិ នៅពេលថ្មីៗនេះ គឺខែមិថុនា។
កាលពីម្សិលមិញ លោក ឱម យ៉ិនទៀង បានមានប្រសាសន៍ថា ការស៊ើបអង្កេតរបស់ អ.ប.ព. បានបញ្ចប់ហើយ ហើយថា មូលនិធិសកលក៏សប្បាយចិត្តនឹងលទ្ធផលនោះដែរ។
លោកប្រធានអង្គភាពប្រឆាំងអំពើពុករលួយរូបនេះបាននិយាយថា “យើងបានបិទបញ្ហានោះរួចហើយ។ គ្លូប៊លហ្វាន់ក៏បានទទួលយកហើយ។ ហើយការស៊ើបអង្កេតរបស់យើងចំណាយពេលពីរឆ្នាំប៉ុន្តែ គេទទួលស្គាល់ថាត្រឹមត្រូវ។ គេផ្តល់ជំនួយជាធម្មតាដល់រាជរដ្ឋាភិបាលកម្ពុជា”។
លោក ឱម យ៉ិនទៀង មិនបានរៀបរាប់ពិស្តារនូវការរកឃើញរបស់ អ.ប.ព. ទេ។ សួរថា មានវិធានការផ្លូវច្បាប់អ្វីខ្លះដែលរដ្ឋាភិបាលប្រកាន់យកប្រឆាំងនឹងលោក សុជាតិនោះ លោក យ៉ិនទៀង បាននិយាយថា រដ្ឋាភិបាលនឹងមិនចាត់វិធានការណាមួយបានទេ ដោយសារតែបទល្មើសនោះចាស់ជ្រុលពេក។
លោកប្រធានអង្គភាពប្រឆាំងអំពើពុករលួយរូបនេះ បានមានប្រសាសន៍សំដៅទៅលើច្បាប់ប្រឆាំងអំពើពុករលួយដែលបានបង្កើតអង្គភាពប្រឆាំងអំពើពុករលួយថា “អាស្រ័យដោយច្បាប់ចូលជាធរមានក្រោយ ដូច្នេះពិតមែនថាយើងពុំអាចដំណើរការនៅមុខតុលាការ។ ប៉ុន្តែ យើងមានកាតព្វកិច្ចដើម្បីពន្យល់លោក សុជាតិ ដើម្បីឲ្យធ្វើការសងប្រាក់ហ្នឹងទៅវិញ ដោយស្របតាមវិធានផ្ទៃក្នុងរបស់គ្លូប៊លហ្វាន់។
ព្រះមហាក្សត្រ នរោត្តម សីហមុនី បានឡាយព្រះហស្តលេខាលើច្បាប់ប្រឆាំងអំពើពុករលួយកាលពីខែមេសា ឆ្នាំ២០១០។ យោងតាមការស៊ើបអង្កេតរបស់មូលនិធិសកលឲ្យដឹងថា លោក សុជាតិ បានទទួលសំណូកយ៉ាងហោចណាស់ត្រឹមខែកក្កដា ឆ្នាំ២០១០។ លោកបានចូលនិវត្តន៍ពីមជ្ឈមណ្ឌលប្រយុទ្ធនឹងជំងឺគ្រុនចាញ់ប្រហែលមួយឆ្នាំក្រោយមក។
កាលពីខែមីនា ឆ្នាំ២០១៤ លោក យ៉ិនទៀង បាននិយាយថា រដ្ឋាភិបាលមិនអាចផ្តន្ទាទោសលោក សុជាតិ បានទេ ពីព្រោះភ័ស្តុតាងប្រឆាំងនឹងអតីតប្រធានរូបនេះខ្សោយពេក ហើយដោយសារតែការចាញ់រឿងនេះនឹងធ្វើឲ្យខូចកេរ្តិ៍ឈ្មោះដល់ទាំងរដ្ឋាភិបាលកម្ពុជា ទាំងមូលនិធិសកល។
លោក ព្រាប កុល នាយកអង្គការតម្លាភាពកម្ពុជាបាននិយាយកាលពីម្សិលមិញថា រដ្ឋាភិបាលគួរផ្តន្ទាទោសករណីនៃអំពើពុករលួយស្ថិតក្រោមច្បាប់ដែលកើតឡើងមុននឹងមានច្បាប់ប្រឆាំងនឹងអំពើពុករលួយ។
លោក កុល បាននិយាយថា”ខ្ញុំគិតថា មានច្បាប់ដែលមានស្រាប់មុននឹងមានច្បាប់ប្រឆាំងអំពើពុករលួយដែលអាចប្រើបាន។ មានក្រមព្រហ្មទណ្ឌជាដើម។ ខ្ញុំជឿជាក់ថា ច្បាប់ដទៃទៀតបានកើតមុនដែលអាចប្រើដើម្បីផ្តន្ទាទោសមន្ត្រីបែបហ្នឹង”។
លោក កុល បាននិយាយថា ច្បាប់អាជ្ញាយុកាលពិតជាកើតមានសម្រាប់បទល្មើសតូចតាចខ្លះ រួមមានការសូកប៉ាន់រហូតដល់ទឹកប្រាក់៦០០.០០០ដុល្លារអាមេរិក។ ប៉ុន្តែលោកបានបន្ថែមថា អាជ្ញាយុកាលគឺ១០ឆ្នាំដែលធ្វើឲ្យបទល្មើសលោក សុជាតិ ដែលកើតមានឡើងតាំងពីឆ្នាំ២០០៦ គឺស្ថិតចំក្នុងអំឡុងពេលនោះ។
លោក កុល បាននិយាយថា ការបណ្តោយឲ្យអតីតនាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់រួចផុតពីប្តឹងទៅតុលាការ បានបញ្ជូនសារគ្រោះថ្នាក់មួយដល់មន្ត្រីផ្សេងទៀត។
លោក សុជាតិ មិនអាចទាក់ទងសុំការធ្វើអត្ថាធិប្បាយបានទេកាលពីថ្ងៃអង្គារ។ លោកបានបដិសេធមិនអត្ថាធិប្បាយចំពោះការចោទប្រកាន់លើរូបលោកទេ ចាប់តាំងពីរឿងរ៉ាវបានកើតឡើងមកម៉្លេះ។
លោក សិត ហ្វៃសុន អ្នកនាំពាក្យគ្លូប៊លហ្វាន់ បានបដិសេធមិនធ្វើអត្ថាធិប្បាយចំពោះសេចក្តីសម្រចរបស់អ.ប.ព.មិនផ្តន្ទាទោសលោក សុជាតិទេ។ ប៉ុន្តែលោកបាននិយាយថា រាល់សំណូកនិងមូលនិធិជំនួយដែលចាយខុស ដែលរកឃើញដោយការស៊ើបអង្កេតរបស់ខ្លួន ត្រូវបានសងមកវិញអស់ហើយដោយរដ្ឋាភិបាលកម្ពុជា។
របាយការណ៍ឆ្នាំ២០១៣របស់គ្លូប៊លហ្វាន់រៀបរាប់ពិស្តារពីប្រព័ន្ធមួយដែលលោក សុជាតិ បានបង្កើតឡើងជាមួយនឹងក្រុមហ៊ុនផ្គត់ផ្គង់មុង ដែលបញ្ចូលប្រាក់សំណូកចូលទៅក្នុងគណនីរបស់សាច់ញាតិ ឬភ្នាក់ងារប្រឹក្សាដែលតាមពិតទៅមិនមានទេ។
របាយការណ៍នោះសរសេរថា ” ទឹកប្រាក់ដែលបង់ឲ្យមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ត្រូវបានលាក់បំបាំងថាជាការបង់ប្រាក់កម្រៃជើងសារដល់ ‘ប្រឹក្សា’ ឬ ‘ភ្នាក់ងារ’ ជាការបង្កើតដែលផ្តល់យោបល់ដោយនាយក ដែលក្នុងនោះក្រុមហ៊ុនផ្គត់ផ្គង់បានជួលដើម្បីចូលរួមក្នុងជំនួញក្នុងនាមពួកគេនៅក្នុងប្រទេសកម្ពុជា”។
របាយការណ៍នោះបានបន្តថា “[អ្នកស៊ើបអង្កេត]រកមិនឃើញភ័ស្តុតាងណាមួយក្នុងការគូសបញ្ជាក់ថា ភ្នាក់ងារនេះពិតជាកើតមានទេ ដោយមានការលើកលែងនៃការតំណាងដោយនាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ដែលថានេះជាសាច់ញាតិគាត់។ ភ័ស្តុតាងបង្ហាញយ៉ាងច្បាស់ថា ភ្នាក់ងារនេះបម្រើការងារជាបណ្តាញសម្រាប់ការចំណាយប្រាក់មិនត្រឹមត្រូវ ក្នុងគោលបំណងលាក់អ្នកទទួលប្រាក់ពិតប្រាកដ គឺនាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់និងអនុប្រធាន”។
របាយការណ៍រួមបញ្ចូលសេចក្តីដកស្រង់នៃកិច្ចសម្ភាសជាមួយមន្ត្រីក្រុមហ៊ុនផ្គត់ផ្គង់មុងដែលបានទទួលស្គាល់ថាពួកគេដឹងថាពួកគេបានប្រព្រឹត្តខុស។ មានឧបសម្ពន្ធដ៏វែង រួមមានអ៊ីម៉ែលរវាងលោក សុជាតិនិងអ្នកតំណាងក្រុមហ៊ុនអំពីរបៀបបង់ប្រាក់៕ រើន