ចំនួនអ្នកស្វែងរកសិទ្ធិជ្រកកោនជនជាតិភាគតិចម៉ុងតាញ៉ានៅក្នុងរាជធានីភ្នំពេញបានកើនឡើងទ្វេដងក្នុងរយៈពេលពីរខែកន្លងមកនេះ ដោយអង្គការសហប្រជាជាតិបានលើកឡើងកាលពីម្សិលមិញថា ឥឡូវនេះមានជនជាតិភាគតិចម៉ុងតាញ៉ាជាង២០០នាក់ហើយនៅក្នុងរាជធានី ប៉ុន្តែនាយកដ្ឋានជនភៀសខ្លួនបានបដិសេធជាថ្មីម្ដងទៀតថា ខ្លួនមិនដឹងទេចំពោះក្រុមនេះ។
លោកស្រី វ៉ានហៀ លី តំណាងប្រចាំប្រទេស នៃការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានលើកឡើងនៅក្នុងអីុម៉េលមួយថា នាយកដ្ឋានជនភៀសខ្លួននៃក្រសួងមហាផ្ទៃនៅមិនទាន់ចុះឈ្មោះអ្នកស្វែងរកសិទ្ធិជ្រកកោនជនជាតិភាគតិចម៉ុងតាញ៉ាចំនួន២១៩នាក់នៅឡើយទេ។
ទោះបីជាចំនួនជនជាតិភាគតិចម៉ុងតាញ៉ាជាជនជាតិដើមភាគតិចមកពីប្រទេសវៀតណាមដែលសមាជិកនៃក្រុមនេះអះអាងថា ខ្លួនគេចខ្លួនពីការធ្វើទុក្ខបុកម្នេញផ្នែកសាសនា និងនយោបាយពីសំណាក់រដ្ឋាភិបាលក្រុងហាណូយ បានកើនឡើងជាបន្តបន្ទាប់ក្តី តែកាលពីម្សិលមិញនាយកដ្ឋានជនភៀសខ្លួនបានលើកឡើងម្តងទៀតដូចអ្វីដែលខ្លួនធ្លាប់បានលើកឡើងជាច្រើនខែមកនេះថា ខ្លួនមិនដឹងអំពីវត្តមានរបស់ក្រុមនេះនៅក្នុងរាជធានីឡើយ។
លោក តាន់ សុវិជ្ជា ប្រធាននាយកដ្ឋានជនភៀសខ្លួនដែលទើបតែតែងតាំងថ្មីបានមានប្រសាសន៍នៅពេលត្រូវបានសាកសួរអំពីជនជាតិភាគតិចម៉ុងតាញ៉ាចំនួន២១៩នាក់ថា “ខ្ញុំមិនដឹងទេ”។
លោកក៏បានអះអាងផងដែរថា UNHCR មិនបានទាក់ទងនាយកដ្ឋានរបស់លោកអំពីការចុះឈ្មោះអ្នកស្វែងរកឯកសារឡើយ។
បុគ្គលិក UNHCR មួយរូបប្រចាំរាជធានីភ្នំពេញ ដែលស្នើសុំមិនបញ្ចេញឈ្មោះព្រោះខ្លួនមិនត្រូវបានអនុញ្ញាតឲ្យនិយាយជាមួយប្រព័ន្ធផ្សព្វផ្សាយបានលើកឡើងថា អង្គការសហប្រជាជាតិព្យាយាមចុះឈ្មោះក្រុមអ្នកស្វែងរកសិទ្ធិជ្រកកោននីមួយៗ ខណៈពួកគេមកដល់រាជធានី រួមទាំងអ្នកស្វែងរកសិទ្ធិជ្រកកោនពីរនាក់ ដែលធ្វើដំណើរពីខេត្តរតនគិរីមកដល់ភ្នំពេញកាលពីព្រឹកម្សិលមិញផងដែរ។
លោកបានមានប្រសាសន៍ថា ” UNHCR បានស្នើឲ្យនាយកដ្ឋានជនភៀសខ្លួនចុះបញ្ជីអ្នកទាំងនោះដើម្បីទទួលបានសិទ្ធិជ្រកកោននៅក្នុងប្រទេសទី៣ជាច្រើនលើកច្រើនសាមកហើយ ប៉ុន្តែ ពួកគេបានបដិសេធ”។
លោក ខៀវ សុភ័គ អ្នកនាំពាក្យក្រសួងមហាផ្ទៃមិនអាចទាក់ទងសុំការបំភ្លឺបានទេកាលពីម្សិលមិញ ប៉ុន្តែលោកបានលើកឡើងម្តងហើយម្តងទៀតថា រដ្ឋាភិបាលគ្មានគម្រោង ចុះឈ្មោះអ្នកស្វែងរកសិទ្ធិជ្រកកោនឡើយ ហើយបានចាត់ទុកពួកគេជាជនអន្តោប្រវេសន៍ខុសច្បាប់ ដែលទីបំផុតអាចនឹងត្រូវនិរទេសខ្លួន។
លោកស្រី ដេនីស ខហ្វលេន ប្រធានអង្គការ Jesuit Refugee Service ជាអង្គការធ្វើការពាក់ព័ន្ធនឹងជនភៀសខ្លួនក្នុងរាជធានីភ្នំពេញ និងដែលកំពុងផ្តល់ជំនួយដល់ជនជាតិភាគតិចម៉ុងតាញ៉ានៅពេលពួកគេមកដល់រាជធានីបានលើកឡើងថា វាមិនអាចទៅរួចទេក្នុងការកំណត់ថា តើសមាជិកនៃក្រុមនេះមានសិទ្ធិស្របច្បាប់ឬយ៉ាងណានោះ លុះត្រាតែពួកគេត្រូវបានចុះឈ្មោះដោយនាយកដ្ឋានជនភៀសខ្លួន។
លោកស្រីបានមានប្រសាសន៍ថា “យើងពិតជាចង់ឲ្យរដ្ឋាភិបាលចុះឈ្មោះពួកគេហើយបន្ទាប់មកអាចចាប់ផ្តើមដំណើរការកំណត់ថា តើពួកគេជាជនភៀសខ្លួន ឬក៏អត់”៕ ស៊ុយឈាង