យោងតាមនគរបាលបានឲ្យដឹងកាលពីម្សិលមិញថា បុរសបីនាក់ដែលជឿថា សាច់ញាតិរបស់ខ្លួនបានស្លាប់ដោយសារអំពើអាបធ្មប់ ត្រូវបានបញ្ជូនទៅសាលាដំបូងខេត្តកំពង់ ឆ្នាំងនៅក្នុងថ្ងៃេនះពីបទសម្លាប់បុរសម្នាក់ដែលពួកគេគិតថា ជាអ្នកធ្វើឲ្យអ្នកទាំងនោះស្លាប់ និងដែលត្រូវបានបញ្ជាក់ភិនភាគដោយគ្រូទាយម្នាក់។
យោងតាមលោក លីវ ប៊ុនសុង អធិការរងនគរបាលស្រុកទឹកផុស បានឲ្យដឹងថា នគរបាលបានរកឃើញសពរបស់ ម៉ឹស ថាន អាយុ៤៩ឆ្នាំ ក្បែរទន្លេក្នុងស្រុកទឹកផុសកាលពីថ្ងៃពុធ ដោយដៃជាប់ចំណង និងក្បាលជិតដាច់ពីខ្លួនទៅហើយ។ ហើយនៅថ្ងៃពុធដដែលនោះ នគរបាលបានចាប់ខ្លួនបុរសបីនាក់[ក្នុងនោះពីរនាក់ជាបងប្អូនបង្កើតនឹងគ្នាម្នាក់ឈ្មោះ ឃឹម សុឃីម អាយុ២២ឆ្នាំ និងម្នាក់ទៀតឈ្មោះ ឃឹម សុខា អាយុ២១ឆ្នាំ ហើយបុរសទី៣ឈ្មោះ ដួង ចិត្រា អាយុ១៨ឆ្នាំ] ដែលបានប្រាប់អ្នកស៊ើបអង្កេតថា ពួកគេបានសម្លាប់ ម៉ឹស ថាន ព្រោះគាត់បានធ្វើអំពើបណ្ដាលឲ្យសាច់ញាតិពីរនាក់របស់ពួកគេស្លាប់។
លោកមានប្រសាសន៍ដោយរៀបរាប់អំពី ការសារភាពរបស់ជនសង្ស័យថា”ជនសង្ស័យបានប្រើដំបងវាយជនរងគ្រោះ បន្ទាប់មកចងដៃ ហើយយកពូថៅកាប់ជនរងគ្រោះរូបនេះស្ទើរដាច់ក្បាល។ យើងបានរកឃើញដំបង និងពូថៅនៅកន្លែងកើតហេតុ”។
អធិការរងនគរបាលស្រុករូបេនះបាន លើកឡើងទៀតថា បងប្អូនប្រុសទាំងពីរនាក់នេះបានទៅជួបគ្រូទាយម្នាក់ប្រហែល១ខែមុនដើម្បីចង់ដឹងថា តើការឈឺរហូតដល់ស្លាប់ របស់ឪពុកក្មេក និងសាច់ថ្លៃពួកគេកាលពីប្រហែល២ឆ្នាំមុនបណ្តាលមកពីមូលហេតុអ្វី។
លោក លីវ ប៊ុនសុង បានមានប្រសាសន៍ថា “គ្រូទាយរូបនោះបានប្រាប់ពួកគេថា មានមនុស្សម្នាក់ដែលរស់នៅក្បែរពួកគេបានធ្វើអំពើដាក់សាច់ថ្លៃរបស់ពួកគេ”។ លោកបានបន្ថែមទៀតថា គ្រូទាយរូបនោះមិនបានប្រាប់ឈ្មោះអ្នកធ្វើអំពើដល់បងប្អូនប្រុសទាំងពីរនាក់នេះទេ ប៉ុន្តែគាត់បានប្រាប់ពីភិនភាគរបស់អ្នកធ្វើអំពើរូបនោះ។
ពីរបីសប្ដាហ៍ក្រោយមក បងប្អូនប្រុសទាំងពីរនាក់នេះបានកំណត់ថា ម៉ឹស ថាន គឺជាគោលដៅរបស់ខ្លួន ហើយបានបញ្ចុះបញ្ចូលឲ្យ ដួង ចិត្រា ដែលរស់នៅក្នុងភូមិមោង ឃុំ ក្បាលទឹកឲ្យជួយសងសឹក។
លោកបានមានប្រសាសន៍ថា “នៅម៉ោងប្រហែល៣រសៀល [ថ្ងៃអង្គារ] ពួកគេបានបញ្ចុះបញ្ចូលជនរងគ្រោះឲ្យទៅផឹកស្រាជាមួយគ្នានៅក្នុងខ្ទមមួយដែលស្ថិតនៅវាលស្រែ”។ បន្ទាប់ពីផឹកស្រាសអស់ជាច្រើនលីត្រ “ជនសង្ស័យបានសួរជនរងគ្រោះថា ‘តើអ្នកចេះធ្វើអំពើដូចគ្រូអាបធ្មប់ដែរឬទេ?’”។ ម៉ឹស ថាន បាននិយាយថាទេ ប៉ុន្តែពួកគេនៅតែសម្លាប់គាត់ចោល។
លោក ប៉ុល វុទ្ធី ស្នងការរងខេត្តនេះបានលើកឡើងថា ជនសង្ស័យទាំងនេះកំពុងឃុំ ឃាំងនៅស្នងការដ្ឋាននគរបាលខេត្ត ហើយនឹងត្រូវបញ្ជូនទៅសាលាដំបូងនៅថ្ងៃនេះ។
លោក លីវ ប៊ុនសុង បានលើកឡើងទៀតថា តុលាការត្រូវតែធ្វើការសម្រេចថាតើត្រូវ សាកសួរគ្រូទាយនោះឬយ៉ាងណា៕ ស៊ុយឈាង