ក្រុមមន្ត្រីបានឲ្យដឹងថា លោក ប៉ា សុជាតិវង្ស អភិបាលរាជធានីភ្នំពេញ និងជាប្រធានកាកបាទក្រហមកម្ពុជាសាខារាជធានីភ្នំពេញ បានធ្វើជាអធិបតីក្នុងការបើកឲ្យដំណើរការសណ្ឋាគារកម្ពស់ប្រាំមួយជាន់ដ៏ទំនើបនៅក្នុងក្រុងព្រះវិហារកាលពីម្សិលមិញ។
យោងតាមកាកបាទក្រហមកម្ពុជាបានឲ្យដឹងថា សណ្ឋាគារឈ្មោះ ហ្គ្រីនភែលេស ព្រះវិហារ (Green Palace Hotel) ដែលត្រូវបានសាងសង់អស់រយៈពេល៣ឆ្នាំ ហើយជាគម្រោងរួមគ្នារវាងកាកបាទក្រហមកម្ពុជាសាខារាជធានីភ្នំពេញ និងកាកបាទក្រហមកម្ពុជាសាខាខេត្តព្រះវិហារ នឹងរកប្រាក់ចំណូលជូនអង្គការមនុស្សធម៌នេះ។
ដោយបដិសេធមិនធ្វើអត្ថាធិប្បាយបន្ថែម លោកស្រី ម៉ែន នារីសុភ័គ អ្នកនាំពាក្យកាក បាទក្រហមកម្ពុជាបានមានប្រសាសន៍ថា “ខ្ញុំសង្ឃឹមថា យើងនឹងទទួលបានប្រាក់ចំណូលច្រើនពីសណ្ឋាគារនេះ”។
លោក រ័ត្ន សុភា ប្រធានស្ដីទីកាកបាទក្រហមកម្ពុជាសាខាខេត្តព្រះវិហារបានលើកឡើងថា សណ្ឋាគារថ្មីនេះមាន៨០ បន្ទប់ ហើយ ថា ប្រាក់ចំណូលដែលទទួលបានពីសណ្ឋាគារនេះ នឹងបញ្ចូលទៅក្នុងប្រអប់កាកបាទក្រហមសាខាទាំងពីរនេះ។
លោកបានថ្លែងថា “នេះគឺជាសណ្ឋាគារដ៏ទំនើបបំផុតនៅក្នុងខេត្តព្រះវិហារ”។
លោកស្រី ពុំ ចាន់ទីនី អគ្គលេខាធិការកាកបាទក្រហមកម្ពុជាដែលរៃអង្គាសប្រាក់បានជាង១៣លានដុល្លារនៅក្នុងពិធីបរិច្ចាគប្រចាំឆ្នាំកាលពីខែឧសភា បានបដិសេធមិនធ្វើអត្ថាធិប្បាយទាក់ទិននឹងមូលនិធិ ឬប្រាក់ចំណេញនាពេលអនាគតរបស់សណ្ឋាគារនេះឡើយ។
កាលពីខែមេសា ឆ្នាំមុន លោក អ៊ុយ សំអាត ប្រធានផ្នែកឆ្លើយតបគ្រោះមហន្តរាយនៅកាកបាទក្រហមកម្ពុជាបានលើកឡើងថា មូលនិធិសម្រាប់បង្កើតសណ្ឋាគារនៅក្នុងខេត្តព្រះវិហារនេះ “បានមកពីមនុស្សមួយក្រុមដឹកនាំដោយលោក ប៉ា សុជាតិវង្ស”។
ដោយដឹកនាំដោយលោកស្រី ប៊ុន រ៉ានី ភរិយារបស់លោកនាយករដ្ឋមន្ត្រី ហ៊ុន សែន កាកបាទក្រហមកម្ពុជា ត្រូវបានមជ្ឈដ្ឋានទូទៅមើលឃើញថា មានជាប់ពាក់ព័ន្ធរឿងនយោបាយ ដោយសារមានទំនាក់ទំនងជាមួយគណបក្សប្រជាជនកម្ពុជា ជាសកម្មភាពមួយដែលផ្ទុយទៅនឹងបទប្បញ្ញត្តិរបស់ទីភ្នាក់ងារមនុស្សធម៌ពិភពលោក។
លោកស្រី ពុំ ចាន់ទីនី បានរិះគន់អ្នកយកព័ត៌មានកាលពីខែឧសភា ដោយសារការលើកឡើងយ៉ាងច្រើនបែបនេះ ទោះបីជា
លោកស្រី ប៊ុន រ៉ានី ធ្លាប់ថ្លែងគាំទ្រគណបក្ស ប្រជាជនកម្ពុជាអំឡុងពិធីផ្ដល់ជំនួយមនុស្សធម៌ពីមុនៗមកក៏ដោយ។
កាលពីខែមេសាឆ្នាំមុន លោក ឡោ ចាន់ អ្នកសម្របសម្រួលនៅអង្គការសិទ្ធិមនុស្សអាដហុកប្រចាំខេត្តព្រះវិហារ បានលើកឡើងថា លោក ប៉ា សុជាតិវង្ស និងក្រុមរបស់លោកប្រហែលជាសម្រេចសាងសង់សណ្ឋាគារ ជ្រកក្រោមស្លាកកាកបាទក្រហម ដើម្បីគេចពីការបង់ពន្ធ។
កាលពីម្សិលមិញ លោក ឡោ ចាន់ បានលើកឡើងថា អង្គការរបស់លោកនឹងឃ្លាំមើលសណ្ឋាគារនេះ។ លោកមានប្រសាសន៍ ថា “តាមគំនិតរបស់ខ្ញុំ ប្រាក់ចំណូលដែលបានមកពីសណ្ឋាគារនេះនឹងមិនទៅដល់កាកបាទក្រហមកម្ពុជា១០០ភាគរយឡើយ ហេតុដូច្នេះយើងនឹងបន្តឃ្លាំមើល”៕ ស៊ុយឈាង