29 C
Phnom Penh

សាក្សីរៀបរាប់​​​ប្រាប់​សាលា​ក្តីខ្មែរ​​​ក្រហម​​​ពី​ការ​សម្លាប់ខ្មែរអិុស្លាម​​​​យ៉ាង​​​រង្គាល​

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិលមិញ សាក្សី​​​ម្នាក់​​​នៅ​​​សាលា​​​ក្តី​​​ខ្មែរ​​​ក្រហមបាន​​​រៀប​​​រាប់​​​ប្រាប់​​​តុលាការ​​​ពី​​​របៀប​​​ដែលខ្លួន​​​បាន​​​ជួយ​​​យាម​​​​​​​​ខ្មែរ​​​អិុស្លាម​​​រាប់​​​រយ​​​នាក់​​​ក្នុង​​​ខេត្ត​​​កំពង់​​​ចាម​​​ មុន​​​ពេល​​​ពួក​​​គាត់​​​ត្រូវ​​​បាន​​​កម្ទេច​​​អំឡុង​​​របប​​​កម្ពុជា​​​ប្រជា​​​ធិបតេយ្យ​​​។

លោក សែន ស្រ៊ុន (ឆ្វេង) ផ្តល់​​​សក្ខីកម្ម​​​នៅ​​​សាលាក្តីខ្មែរ​​​ក្រហម​​​ កាល​​​ពីម្សិលមិញ។  លោកបាន​​​រៀប​​​រាប់​​​ប្រាប់​​​សាលា​​​ក្តី​​​ពី​​​របៀប​​​ដែល​​​លោក​​​ជួយ​​​យាម​​​ខ្មែរ​​​អិុស្លាម​​​រាប់​​​រយ​​​នាក់​​​ក្នុង​​​ខេត្ត​​​កំពង់​​​ចាម​​​ មុន​​​ពេល​​​ពួក​​​គេ​​​ត្រូវ​​​បាន​​​កម្ទេច។ រូបថតៈ សាលាក្តីខ្មែរក្រហម
លោក សែន ស្រ៊ុន (ឆ្វេង) ផ្តល់​​​សក្ខីកម្ម​​​នៅ​​​សាលាក្តីខ្មែរ​​​ក្រហម​​​ កាល​​​ពីម្សិលមិញ។ លោកបាន​​​រៀប​​​រាប់​​​ប្រាប់​​​សាលា​​​ក្តី​​​ពី​​​របៀប​​​ដែល​​​លោក​​​ជួយ​​​យាម​​​ខ្មែរ​​​អិុស្លាម​​​រាប់​​​រយ​​​នាក់​​​ក្នុង​​​ខេត្ត​​​កំពង់​​​ចាម​​​ មុន​​​ពេល​​​ពួក​​​គេ​​​ត្រូវ​​​បាន​​​កម្ទេច។ រូបថតៈ សាលាក្តីខ្មែរក្រហម

លោក សែន ស៊្រុន​​​ អាយុ​​​៦៦​​​ឆ្នាំ ដែល​​​​​​មាន​​​ ភារកិច្ច​​​​ឡើង​​​ត្នោតនៅក្នុង​​​​​កង​​​ចល័ត​​​មួយ​​​ បាន​​​និយាយ​​​ថា គាត់​​​​ត្រូវ​​​បាន​​​កម្មាភិបាល​​​ ខ្មែរ​​​ក្រហម​​​​​​​​ក្នុង​​​ឃុំ​​​ពាម​​​ជីកង​​​ ស្រុក​​​កង​​​មាស​​​ ឲ្យ​​​ជួយ​​​យាម​​​អ្នក​​​ភូមិ​​​ខ្មែរ​​​អិុស្លាម ខណៈ​​​ដែល​​​ពួក​​​គាត់​ត្រូវ​​​បាន​​​ចាប់​ប្រមូល ​​​និង​​​ដឹក​​​យក​​​ទៅ​​​មន្ទីរ​​​សន្តិ​​​សុខ​​​វត្ត​​​អូរ​​​ត្រកួន​​​ក្នុង​ខែ​​​មីនា ឬ​​​ខែ​​​មេសា​​​ឆ្នាំ​​​១៩៧៧​​​។

លោក ស្រ៊ុន បាន​​​និយាយ​​​​​​អំឡុង​​​ពេល​​​សាក​​​​​​សួរ​​​របស់​​​ជំនួយ​​​ការ​​​ព្រះរាជ​​​អាជ្ញា​​​  ដាឡេ លីសាក់​​​ ថា “នៅ​​​ពេល​​​ខ្ញុំ​​​​​​ជិត​​​ទៅ​​​ដល់​​​ផ្លូវ​​​ធំ​​​ទៅ​​​ហើយ ខ្ញុំ​​​បាន​​​ឃើញ​​​ខ្មែរ​​​អិុស្លាម​​​ត្រូវ​​​គេ​​​ចាប់ខ្លួន​​​​​​​​។ ខ្ញុំ​​​បាន​​​ឃើញ​​​ស្ត្រី​​​ម្នាក់​​​ដែល​​​កំពុង​​​ងូត​​​ទឹក​​​ជា​​​មួយ​​​កុមារ​​​ខ្មែរ​​​អិុស្លាម ​​​ត្រូ​​​វ​​​គេ​​​អូស​​ទៅ​ទ្វារ​​​របង​​​វត្ត។ ហើយខ​​​្ញុំ​​​ត្រូវ​​​គេ​​ប្រាប់​​​​ឲ្យយាម​​​ស្ត្រី​​​រូប​​​នេះ​​​”។ លោក​​​បាន​​​និយាយ​​​ថា ”ខ្មែរ​​​អិុស្លាម​​​ត្រូវ​​​បាន​​​គេ​​​នាំ​​​មក​​​កាន់​​​តំបន់​​​នេះ​​​ជា​​​បន្ត​​​បន្ទាប់​​​ជា​​​ទី​​​ដែល​​​ខ្ញុំ​​​បាន​​​ឈរ​​​ជើង​​​ ហើយ​​​ខ្ញុំ​​​ត្រូវ​​​គេ​​​ចាត់​​​តាំង​​ឲ្យ​​​យាម​​​ខ្មែរ​​អិុស្លាម​​​ទាំង​​​នោះ ហើយ​​​ខ្ញុំ​​​ត្រូវ​​​គេ​​​ព្រមាន​​​ថា ប្រសិន​​​បើខ្មែរ​​អិុស្លាម​​​​​​​​​ណា​​​រត់​​​រួច នោះ​​​ខ្ញុំ​​​​​​​​​នឹង​​​គ្រោះ​​​ថ្នាក់​​​ដល់​​​ជីវិត​​​​​​មិន​ខាន​”។

លោក ស្រ៊ុន បាន​​​និយាយទៀត​​​ថា អ្នក​​​ទោស​​​បុរស ”ត្រូវ​​​គេ​​​វាយ​​​នឹង​​​ដែក​​​បំពង់​​​ទីប​​​ដើម្បី​​​ព្រមានអ្នក​​​ផ្សេង​​​ទៀត​​​កុំ​​​ឲ្យ​​​តដៃ និង​​​កំុ​​​ឲ្យ​​​បះបោរ​​​”មុន​​​ពេល​​​អ្នក​​​​ដែលត្រូវ​ឃុំ​​​ខ្លួន​​​​ទាំង​​​អស់​​​នោះ​​​ ត្រូវ​​​បាន​​​នាំ​ចូល​ទៅ​​​​​ក្នុង​​​វត្ត​​​អូរ​​​ត្រកួន​​​ ហើយ​​​ដាក់​​​ច្រវាក់​​​។

ដោយ​ប៉ាន់ប្រមាណ​​​ថា​”ក្រុម​ដាវវែង” ជា​កង​កម្មាភិបាល​មូលដ្ឋាន​ដែលមាន​ភារកិច្ច​ចាប់ខ្លួន​​​ ​ព័ទ្ធ​​​ចាប់​​​បានមនុស្ស​​​ពី​​​​៤០០​​​ទៅ​​​៥០០នាក់​​​រួម​​​ទាំង​​​កុមារ​​​ផង​​​ដែរនោះ លោក​​​បាន​​​និយាយ​​​​​​ថា ”នៅ​​​ម៉ោង​​​ប្រហែល​​​៧ ឬ​​​៨​​​យប់ ខ្មែរ​​អិុស្លាម​​​​​​ទាំង​​​អស់​​​នៅ​​​ក្នុង​​​ឃុំ​​​ត្រូវ​​​បាន​​​ចាប់​​​ខ្លួន។

លោក​​​ ស្រ៊ុន បាន​​​និយាយទៀត​​​​​​ថា ​​​”បន្ទាប់​​​ ពី​​​ខ្ញុំ​​​បាន​​ទៅ​​​ដល់​​​ផ្ទះវិញ មាន​​​ការ​​​ចាក់​​​ចម្រៀង​​​ឮៗ​​​ចេញ​​​ពី​​​វត្ត ហើយ​​​ខ្ញុំ​​​គិត​​​ថា ខ្មែរ​​អិុស្លាម​​​​​​ទាំង​​​ នេះ​​​ត្រូវ​​​គេ​​​សម្លាប់​​​ចោល​​​នៅ​​​យប់​​​នោះ​​​”។

លោក​​​បាន​​​បន្ថែម​​​ថា នៅ​​​ពេល​​​ព្រឹក​​​ បន្ទាប់​​​ ពី​​​ការ​​​ចាប់​​​ខ្លួន​​​ លោក​​​បាន​​​និយាយ​​​ទៅ​​​កាន់​​​មិត្ត​​​ភក្តិ​​​ម្នាក់គឺ​ “សមមិត្ត​​​ មឿន” ដែល​​​ជា​​​សមាជិក​​​កង​​​សន្តិសុខ​​​នៅ​​​វត្ត​​​នេះ​​​ និង​​​ជា​​​អ្នក​​​ដែល​​​ត្រូវ​​​បាន​​​ចាត់​​​តាំង​​​ឲ្យ​​​ឡើង​​​ត្នោត​​​ផង​​​ដែរ​​​។

លោក ស្រ៊ុន និយាយ​​​ថា ”ខ្ញុំ​​​បាន​​​សួរ​​​ មឿន  អំពី​​​កូនក្មេង​ ឬទារក​​​ដែល​​​នៅ​​​ជាមួយ​​​ម្តាយ​​​ ហើយ​​​គេ​​​បាន​​​ប្រាប់​​​ខ្ញុំ​​​ថា កូនក្មេង​ និង​​​ទារក​​​ទាំង​​​នោះ​​​ត្រូវ​​​បាន​​​គេចាប់​​​​បោក​​​ផ្ទប់​​​នឹង​​​ដើម​​​ឈើ​​​។​​​គាត់​​​បាន​​​ប្រាប់​​​ខ្ញុំ​​​ថា ខ្មែរ​​អិុស្លាម​​​​​​ទាំង​​​អស់​​​ នោះ​​​ត្រូវ​​​បាន​​​សម្លាប់ និង​​​កម្ទេច​​​ចោល​​​”។

អំឡុង​​​ការ​​​សាក​​​សួរ​​ដោយ​​​​លោក វីកទ័រ  កូប៉េ ជា​មេធាវីការ​​​ពារ​​​ នួន​​​ ជា លោក​​​ ស្រ៊ុន  បាន​​​បន្ថែម​​​ថា ការ​​​សម្លាប់​​​នេះ​​​​​​ធ្វើ​​​ឡើង​​​ដោយ​​​កម្មាភិបាល​​​ក្មេង​​​ៗ​​​ ដែល​​​បាន​​​​​​ប្រណាំង ប្រជែង​​​​គ្នា​​​​​​ជាមួយ​​​កម្មាភិបាល​​​ក្មេង​​​ៗផ្សេង​​​ទៀត។

លោក​​​បាន​​​និយាយ​​​ថា ”ប្រសិន​​​បើ​​​ពួក​​​គេ​​​សម្លាប់​​​បាន​​​ច្រើន​​​នោះ​​​ ពួក​​​គេ​​​នឹង​​​ត្រូវ​​​ជ្រើស​​​រើស​​​ឲ្យ​​​ទទួល​បន្ទុក​​​កង​​ចល័ត​។ហើយ​​​​​​មាន​​​ករណី​​​មួយ​ដែល​​​ខ្ញុំ​​ឮ​​​ ក្នុង​​​រយៈ​​​ពេល​​​មួយ​​​​​​ម៉ោង  សមាជិក​​​​វ័យ​​​ក្មេង​​​ម្នាក់​​​ដែល​​​មាន​​​វ័យ​​​ប្រហែល​​​ ២០​​​ឆ្នាំ បាន​​​សម្លាប់​​​មនុស្ស​​​អស់​៧០នាក់​​​ហើយ​​​ថា ជា​​​ឯតទគ្គកម្ម​​​​”។

នៅ​​​ពេល​​​ត្រូវ​បានសួរ​ដោយ​លោក  លីសាក់  ថា តើ​​​គាត់​​​​​​មានចាំ​​​បាន​​​​​​​​អ្នក​​​ដែល​​​មក​​​ពី​​​កង​​​ដាវ វែង​​​ “ដែល​​​និយាយ​​​ថា ខ្មែរ​​អិុស្លាម​​​​​​គឺ​​​ជា​​​ជាតិ​​​សាសន៍​​​ផ្សេង​​​ដែល​​​ត្រូវ​​​តែ​​​កម្ទេច​​​ ខណៈ​​​ដែល​​​គាត់​​​រាយ​ការណ៍​​ប្រាប់​​​​ព្រះរាជ​​​អាជ្ញា​​​សាលា​​​ក្តី​​​នៅ​​​ក្នុង​​​បទ​​​សម្ភាសន៍​​​ឆ្នាំ​​​២០០៨​​​ ដែរ ឬ ទេ លោក ស្រ៊ុន និយាយ​​​ថា គាត់​មិន​​​ចាំ​​​​​​ ទេ​​​។ លោក​​​ ស្រ៊ុន បាន​​​និយាយ​​​ថា “ខ្ញុំ​​​ប្រហែល​​​​​​ ជា​​​ភ្លេច​​​រឿង​​​រា៉វ​​​ក្នុង​​​របប​​​នោះ​​​ទៅ​​​ហើយ​​”។ លោក​បាន​បន្ថែមថា ខ្មែរ​​អិុស្លាម​​​​​​មិន​​​មែន​​​ជា​​​ក្រុម​​​តែ​​​មួយ​​​គត់​​​ដែល​​​ជា​​​គោល​​​ដៅ​​​របស់​​​របប​​​ ប៉ុល​​​ ពត​​​ឡើយ។

លោក​​​បាន​​​និយាយ​​​បន្ថែម​​​ថា ”មិន​​ត្រឹមតែ​​​ខ្មែរ​​អិុស្លាម​​​ទេ​​​ដែល​​​​​​​​​ត្រូវ​​​បាន​​​កម្ទេច​​​​​​នោះ​​​។ ខ្មែរ​​អិុស្លាម​​​​​​​​​ត្រូវ​​​បាន​​​កម្ទេច​​​បន្ទាប់​​​ពី ‘​​​អ្នក​​​ចំណូល​​​ថ្មី’ ​​​ឬ​​​ ‘អ្នក​​​១៧​​​មេសា​​’ ឬ​​​អ្នក​​​ដែល​​​ជាប់​​​ពាក់​​​ព័ន្ធ​​​នឹង​​​អតីត​​​របបនោះ ឬអតីត​​​សង្គម​​​នោះ​​​ផង​​​ដែរ​​​”។

ការ​​​ផ្តល់​​​សក្ខីកម្ម​​​របស់​​​លោក ស្រ៊ុន ​​​បន្ត​​​ទៀត​​​នៅ​​​ថ្ងៃ​​​េនះ៕សារុន​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស