កាលពីម្សិលមិញ លោកនាយករដ្ឋមន្ត្រី ហ៊ុន សែន បានបញ្ចេញលិខិតបើកចំហដែលមានបីទំព័រក្នុងឱកាសទិវាសន្តិភាពអន្តរជាតិរបស់អង្គការសហប្រជាជាតិ ដោយលើកសរសើរពីសមិទ្ធផលរបស់លោកផ្ទាល់ក្នុងការបញ្ចប់សង្គ្រាមស៊ីវិល ហើយទន្ទឹមនឹងនោះដែរលោកបានប្តេជ្ញា “បង្ក្រាប” អ្នកដែលប្រើ “ឧបាយកល” ក្នុងនាមសិទ្ធិមនុស្ស។
បន្ថែមពីលើការបញ្ចប់សង្គ្រាមស៊ីវិល ដែលលោកលើកឡើងថា ដោយសារនយោបាយ “ឈ្នះ-ឈ្នះ” ក្នុងការជំរុញឲ្យអតីតទាហានខ្មែរក្រហមដាក់អាវុធចុះដោយគ្មានការភ័យខ្លាចពីការធ្វើទុក្ខបុកម្នេញនោះ លោក ហ៊ុន សែន បានលើកឡើងពីសមិទ្ធផលផ្សេងៗទៀតរបស់រដ្ឋាភិបាលក្នុងរយៈពេលពីរទសវត្សរ៍កន្លងមកនេះ។
លោកបានលើកឡើងពីវឌ្ឍនភាពសេដ្ឋកិច្ច និងការងាររបស់រដ្ឋាភិបាលក្នុងការដឹកនាំសេចក្តីប្រកាសអំពីសិទ្ធិមនុស្សអាស៊ានក្នុងនាមជាប្រធានស្ថាប័នប្រចាំតំបន់ក្នុងឆ្នាំ២០១២។ លោកបានសរសេរថា “ប្រជាជនកម្ពុជាទាំងមូលរីករាយក្នុងការទទួលបានសុខសន្តិភាព និងការលើកកម្ពស់ជីវភាពរស់នៅរបស់គាត់ពីមួយថ្ងៃទៅមួយថ្ងៃ”។
លោកបានបន្ថែមថា “ទន្ទឹមនឹងនោះដែរ រាជរដ្ឋាភិបាលក៏មានការប្តេជ្ញាចិត្តយ៉ាងខ្លាំងក្លាក្នុងការបង្ក្រាប និងទប់ស្កាត់រាល់សកម្មភាព និងឧបាយកលទាំងអស់ក្រោមរូបភាពគាំទ្រលទ្ធិប្រជាធិបតេយ្យ និងសិទ្ធិមនុស្សក្នុងការបម្រើផលប្រយោជន៍នយោបាយបុគ្គល ឬមនុស្សមួយក្តាប់តូច”៕សារុន