លោក សម រង្ស៊ី មានប្រសាសន៍ថា ការរឹបអូសនឹងត្រូវធ្វើឡើងដោយតុលាការ
កាលពីម្សិលមិញ លោកនាយករដ្ឋមន្ត្រី ហ៊ុន សែន បានព្រមានថា ជ័យជម្នះរបស់គណបក្សសង្គ្រោះជាតិនៅក្នុងការបោះឆ្នោតជ្រើសតាំងតំណាងរាស្ត្រឆ្នាំ២០១៨ នឹងឈានទៅរកសង្គ្រាមដោយចៀសមិនផុត នៅពេលគណបក្សប្រឆាំងមួយនេះចាប់ផ្ដើមបែងចែកឡើងវិញនូវដីបានពីអ្នកមានឲ្យទៅអ្នកក្រ ជាអ្វីដែលលោក សម រង្ស៊ី ប្រធានគណបក្សប្រឆាំងមានប្រសាសន៍ថា នឹងត្រូវធ្វើឡើងដោយតុលាការឯករាជ្យតែម្នាក់គត់។
នៅឯសិក្ខាសាលាមួយស្ដីពីអនាគតទេសចរណ៍ក្នុងទីក្រុង ដែលរៀបចំឡើងនៅសណ្ឋាគារសុខា ក្នុងរាជធានីភ្នំពេញ លោកបានថ្លែងថា ទោះបីជាគណបក្សសង្គ្រោះជាតិឈ្នះឆ្នោតក៏ដោយ ក៏គណបក្សនេះនឹងត្រូវតស៊ូប្រឆាំងក្រុមកាន់អំណាចចាក់ឫសរឹងមាំនៅក្នុងប្រទេស។
លោកមានប្រសាសន៍សំដៅដល់ពាណិជ្ជករមានខ្នងបង្អែកក្រាស់ជាច្រើនដែលចូលរួមក្នុងពិធីនោះថា “បើបោះឆ្នោតឲ្យគេ [គណបក្សសង្គ្រោះជាតិនិយាយថា] បានវាដោះស្រាយនេះដោះស្រាយនោះ ក៏ប៉ុន្តែខ្ញុំហ៊ាននិយាយ អស់លោកនៅទីនេះសុទ្ធតែសត្រូវរបស់ពួកគេ។ អញ្ចឹង តើអាហ្នឹងសុខទេ អាហ្នឹង? នែ អស់លោក អ្នកឧកញ៉ាទាំងឡាយសុទ្ធតែជាសត្រូវវណ្ណៈណា គេនឹងរឹបអូសអូតែលហ្នឹងឲ្យទៅអ្នកក្រ។ អញ្ចឹងតើវាសុខទេ”។
យោងតាមក្រមសីលធម៌ដែលបង្កើតឡើងកាលពីខែឧសភា សម្រាប់ “វប្បធម៌សន្ទនា” ថ្មីរបស់លោកជាមួយលោក សម រង្ស៊ី លោកនាយករដ្ឋមន្ត្រី និងសហការីរបស់លោកក្នុងជួរគណបក្សប្រជាជនកម្ពុជា មិនត្រូវបានអនុញ្ញាតឲ្យគំរាមកំហែងរឿងផ្ទុះសង្គ្រាមស៊ីវិលឡើយ ប្រសិនបើគណបក្សសង្គ្រោះជាតិបង្កើតរដ្ឋាភិបាលនៅឆ្នាំ២០១៨។
ទោះជាយ៉ាងណា លោក ហ៊ុន សែន បានការពារការលើកឡើងអំពីសង្គ្រាមស៊ីវិល ដោយមានប្រសាសន៍ថា វាអាចនឹងកើតឡើងយ៉ាងពិតប្រាកដដោយសារតែគណបក្សសង្គ្រោះជាតិ មានគោលនយោបាយដែលអាចធ្វើឲ្យអ្នកមានរងការវិនាស និងការប្រទូសរ៉ាយជាមួយប្រទេសវៀតណាម។
លោកបានថ្លែងយ៉ាងដូច្នេះថា “ការដែលខ្ញុំហ៊ាននិយាយថានឹងកើតសង្គ្រាម មិនមែនគ្មានហេតុផលទេ ព្រោះដោយសារចំណុចពីរដែលត្រូវលើកយកមកនិយាយ។ ចំណុចទី១ គេចាត់ទុកអ្នកមានជាសត្រូវរបស់ពួកគេទៅហើយ។ ចំណុចទី២ យកប្រទេសជិតខាងជាសត្រូវទៅហើយ។ អញ្ចឹងរឿងអីវាមិនកើតសង្គ្រាម។ ចំណុចនេះជាចំណុចដែលត្រូវគិត។ ថ្ងៃណេះរឿងទេសចរណ៍ ប៉ុន្តែវាពាក់ព័ន្ធគ្នារវាងសង្គ្រាម និងសន្តិភាព។ មនុស្សរត់ចេញពីលីប៊ី ស៊ីរី អុីរ៉ាក់ ស្អីៗ ក្រែងរត់ទៅអឺរ៉ុបហ្អេស? អាហ្នឹងមកពីអី? មកពីសង្គ្រាម មកពីបដិវត្តន៍ពណ៌ មកពីចង់ផ្លាស់ប្ដូរ”។
លោក សម រង្ស៊ី បានមានប្រសាសន៍តាមទូរស័ព្ទបន្ទាប់ពីសុន្ទរកថារបស់លោក ហ៊ុន សែន ថា រដ្ឋាភិបាលរបស់គណបក្សសង្គ្រោះជាតិ នឹងមិនរឹបអូសដីធ្លី និងសណ្ឋាគាររបស់អ្នកមានទាំងអស់ភ្លាមៗឡើយ ហើយបានចោទប្រកាន់លោក ហ៊ុន សែន ថានិយាយមួលបង្កាច់ចំពោះគោលនយោបាយរបស់គណបក្សប្រឆាំង។
លោកថ្លែងថា ”វាជាការបកស្រាយខុស ជាការបកស្រាយខុសគួរឲ្យអស់សំណើចជុំវិញទស្សនទានរបស់ខ្ញុំចំពោះយុត្តិធម៌សង្គម។ ខ្ញុំធ្លាប់រស់នៅក្នុងប្រទេសអភិវឌ្ឍន៍ដែលមានអ្នកមានស្ដុកស្ដម្ភខ្លាំង ប៉ុន្តែគេមានប្រព័ន្ធបែងចែកប្រាក់ចំណូលឡើងវិញដោយសន្តិភាព និងស្ម័គ្រចិត្ត។ លោក ហ៊ុន សែន មានគំនិតជ្រុលនិយមខ្លះដែលគាត់មិនអាចលុបបំបាត់បាន។ អ្នករស់នៅក្នុងបណ្ដាប្រទេសអភិវឌ្ឍន៍ដឹងថា នេះមិនពាក់ព័ន្ធការបកស្រាយរបស់ខ្ញុំចំពោះយុត្តិធម៌ទេ”។
ទោះជាយ៉ាងណា លោក សម រង្ស៊ី បានថ្លែងថា ការបែងចែកដីធ្លីឡើងវិញអាចនឹងធ្វើឡើង ប្រសិនបើរដ្ឋាភិបាលរបស់គណបក្សសង្គ្រោះជាតិ បង្កើតតុលាការឯករាជ្យមួយដើម្បីស៊ើបអង្កេតករណីចាប់យកដីធ្លីដោយខុសច្បាប់ពីសំណាក់ឧកញ៉ាក្រោមការគ្រប់គ្រងរបស់លោក ហ៊ុន សែន។
លោកបានមានប្រសាសន៍បន្ថែមទៀតថា ”ខ្ញុំនឹងមិនធ្វើជាចៅក្រមទេ។ នេះជាកិច្ចការសម្រាប់តុលាការឯករាជ្យមួយដែលទទួលបន្ទុកដោះស្រាយបញ្ហាដីធ្លីលួចប្លន់ពីអ្នកក្រ ហើយអាចនឹងមានការស៊ើបអង្កេតនៅពេលអនាគតដោយតុលាការឯករាជ្យ។ ខ្ញុំនឹងមិននិយាយអ្វីដូចខ្ញុំជាតុលាការឡើយ។ ទស្សនទាន [នៃកំណែទម្រង់ដីធ្លី] គឺខុសគ្នាស្រឡះ។ សូម្បីនៅពេលយើងដឹកនាំរដ្ឋាភិបាលក៏ដោយ ក៏យើងនឹងទុកកិច្ចការនេះឲ្យតុលាការឯករាជ្យដែលឯករាជ្យពីអង្គនីតិប្រតិបត្តិ។ យើងមិនអាចនិយាយមុនថា យើងនឹងតម្រង់គោលដៅមួយនេះ ឬមួយនោះបានទេ។ យើងនឹងទុកវាឲ្យទៅប្រព័ន្ធយុត្តិធម៌”។
ជាថ្មីម្ដងទៀត លោក ហ៊ុន សែន ក៏បានលើកឡើងដែរអំពីបទសម្ភាសន៍របស់លោក សម រង្ស៊ី ជាមួយកាសែត Liberation មានមូលដ្ឋាននៅក្នុងទីក្រុងប៉ារីស កាលពីថ្ងៃទី២៣ ខែកក្កដា ដែលអំឡុងពេលនោះលោកបានមានប្រសាសន៍ថា លោកជឿថា លោក ហ៊ុន សែន ចង់ចៀសវាងមិនឲ្យមានជោគវាសនាដូចលោក មូអាម៉ា ហ្គាដាហ្វី មេដឹកនាំផ្ដាច់ការរបស់លីប៊ី ដែលត្រូវបានប្រហារជីវិត។
លោកមានប្រសាសន៍ថា ”អ្នកឯងនិយាយថាម៉េច ‘ជោគវាសនាដូច ហ្គាដាហ្វី?’ ផ្ដល់នូវការបកស្រាយសមរម្យ។ នោះមិនមែនជាការផ្លាស់ប្ដូរដោយការបោះឆ្នោតទេ។ អ្នកឯងចង់ផ្ដួលរំលំដោយយោធាហ្អេស? បើចង់ផ្ដួលរំលំដោយយោធា អ្នកឯងត្រៀមក្ដារមឈូសទុកឲ្យហើយ”។
លោកមានប្រសាសន៍ផ្ដាំទៅលោក សម រង្ស៊ី ថា “ខ្ញុំប្រាប់លោកឯងឲ្យហើយ មុនអញក្លាយទៅជា ហ្គាដាហ្វី ហ្អែងងាប់មុនអញសិន”។
ទោះជាយ៉ាងណា លោក សម រង្ស៊ី មានប្រសាសន៍ថា លោកមិនញញើតការគំរាមកំហែងពីសំណាក់ដៃគូរបស់លោកនៅក្នុង “វប្បធម៌សន្ទនា” ឡើយ ដោយលើកឡើងថា សង្គ្រាមនឹងជាការឆ្លើយទៅនឹងការខំប្រឹងប្រែងរបស់រដ្ឋាភិបាលអនាគតរបស់គណបក្សសង្គ្រោះជាតិ នៅក្នុងការស្វែងរកយុត្តិធម៌។
លោកបានបន្តថា “យើងមានឆន្ទៈកាន់តែរឹងមាំ។ វានឹងមិនមានសង្គ្រាមទេ ពីព្រោះនឹងមានរដ្ឋាភិបាលដ៏ធំមួយដែលមានមនុស្សមកពីគ្រប់ស្រទាប់វណ្ណៈ និងនិន្នាការ។ ដូច្នេះយើងអាចធានាបាននូវនីតិរដ្ឋ និងយុត្តិធម៌សង្គមជូនប្រជារាស្ត្រខ្មែរ។ អ្នកដែលមិនបានធ្វើអ្វីខុសចំពោះជាតិ និងប្រជារាស្ត្រ មានអ្វីត្រូវខ្លាច”៕ សុខុម