យោងតាមក្រុមមន្ត្រីបានឲ្យដឹងថា ផ្លូវជាតិលេខ២ ដែលតភ្ជាប់រាជធានីភ្នំពេញទៅកាន់តំបន់ព្រំដែនក្នុងខេត្តតាកែវជាប់ប្រទេសវៀតណាម បានកកស្ទះអស់ជាង២ម៉ោងកាលពីម្សិលមិញ បន្ទាប់ពីរថយន្ត ធុនធំដឹកថ្មលើសចំណុះមួយគ្រឿង បានធ្វើឲ្យស្ពានដែកមួយកន្លែងនៅក្នុងខេត្តកណ្តាលបាក់ស្រុត។
លោក ប៊ូ ណារ៉េត អធិការនគរបាលស្រុកកណ្តាលស្ទឹងបានលើកឡើងថា រថយន្តប្រហែល១០០គ្រឿងបានជាប់គាំងនៅក្នុងការកកស្ទះចរាចរណ៍ បន្ទាប់ពីរថយន្តដឹកលើសចំណុះមួយគ្រឿងនេះ ធ្វើឲ្យបាក់ស្ពានក្រោយម៉ោង២រសៀល។
លោកអធិការនគរបាលស្រុករូបនេះបានមានប្រសាសន៍ថា “បន្ទាប់ពីយើងឃើញមានការកកស្ទះចរាចរណ៍ មន្ត្រីនគរបាលរបស់យើងបានប្រាប់អ្នកបើកបររថយន្តឲ្យត្រឡប់ក្រោយ ហើយរកផ្លូវវាង”។
លោកបានលើកឡើងទៀតថា អ្នកបើកបររថយន្តបង្កហេតុបានគេចខ្លួនពីកន្លែងកើតហេតុ ហើយថា នគរបាលកំពុងស្វែងរកម្ចាស់រថយន្តមួយគ្រឿងនេះ។
លោកបានថ្លែងថា “យើងចាប់ខ្លួនអ្នកបើកបរមិនបានទេ ព្រោះអ្នកបើកបររូបនេះបានគេចខ្លួនភ្លាមៗក្រោយពេលកើតហេតុ។ ខ្ញុំគិតថា ម្ចាស់រថយន្តនេះត្រូវតែទទួលខុសត្រូវចំពោះការជួសជុលស្ពាននេះឡើងវិញ។ យើងនឹងទាក់ទងមន្ទីរសាធារណការ និងដឹកជញ្ជូនខេត្តឲ្យកំណត់អត្តសញ្ញាណម្ចាស់រថយន្តនេះ”។
លោកបានបន្ថែមថា នគរបាល និងកងរាជ អាវុធហត្ថត្រូវបានបញ្ជាឲ្យទៅយាមស្ពានដែលរងការខូចខាតនេះពេញមួយយប់”។ នៅថ្ងៃស្អែក យើងនឹងយករថយន្តស្ទូចទៅស្ទូចយករថយន្តបង្កហេតុេនះចេញ”៕ ស៊ុយឈាង