កាលពីថ្ងៃពុធ លោក កឹម សុខា អនុប្រធានគណបក្សសង្គ្រោះជាតិ បានជួបជាមួយលោកស្រី រ៉ូណា ស្មីត អ្នកធ្វើរបាយការណ៍ពិសេសថ្មីរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ដោយបានប្រាប់ប្រេសិតរូបនេះថា តុលាការប្រទេសកម្ពុជាចាំបាច់ត្រូវកែទម្រង់ជាមុន ទើបសិទ្ធិមនុស្សអាចទទួលបានការការពារត្រឹមត្រូវ។
លោកស្រី ស្មីត កំពុងបំពេញទស្សនកិច្ចលើកដំបូងរបស់លោកស្រីនៅប្រទេសកម្ពុជា ចាប់តាំងពីលោកស្រីទទួលបានការតែងតាំងជាប្រេសិតសិទ្ធិមនុស្សរបស់អង្គការសហប្រជាជាតិថ្មីប្រចាំប្រទេសនេះកាលពីខែមីនា។លោកស្រីនឹងរាយការណ៍ទៅសម័យប្រជុំលើកទី៣០នៃក្រុមប្រឹក្សាសិទ្ធិមនុស្សអង្គការសហប្រជាជាតិនៅចុងខែនេះអំពីស្ថានការណ៍សិទ្ធិមនុស្ស។
លោក សុខា បានប្រាប់អ្នកយកព័ត៌មានបន្ទាប់ពីកិច្ចប្រជុំថា “ខ្ញុំមិនបានលើកបញ្ហាជាក់លាក់ណាមួយទេ ពីព្រោះពិភពលោកដឹងរួចទៅហើយអំពីបញ្ហាទាំងនេះ។ ប្រសិនបើគ្មានបញ្ហានៅទីនេះទេ គេមិនបញ្ជូនលោកស្រីមកទេ”។
លោក សុខា បាននិយាយថា លោកបានប្រាប់លោកស្រី ស្មីត ថា បញ្ហាសិទ្ធិមនុស្សនៅកម្ពុជានឹងពិបាកដោះស្រាយ ប្រសិនបើមិនមានកំណែទម្រង់ក្នុងប្រព័ន្ធតុលាការរបស់ប្រទេសនេះដែលតែងតែរងការរិះគន់ជាមុននោះ។
លោកបាននិយាយថា “ត្រូវតែមានកំណែទម្រង់តុលាការជាមុន ហើយប្រសិនបើយើងមិនមានកំណែទម្រង់ពិតប្រាកដ ដើម្បីធ្វើឲ្យប្រព័ន្ធតុលាការឯករាជ្យទេ បញ្ហាសិទ្ធិមនុស្សនៅប្រទេសកម្ពុជាមិនអាចដោះស្រាយបានឡើយ”។
លោកស្រី អូលហ្គា ណាកាចូ ជំនួយការរបស់អ្នកធ្វើរបាយការណ៍ពិសេសរូបនេះ បាននិយាយតាមរយៈអីុម៉េលថា លោកស្រី ស្មីត បានយល់ព្រមជាមួយអនុប្រធានបក្សប្រឆាំងរូបនេះថា ប្រព័ន្ធតុលាការរបស់ប្រទេសកម្ពុជាចាំបាច់ត្រូវតែពង្រឹង។
លោកស្រី ណាកាចូ បាននិយាយថា “អ្នកធ្វើរបាយការណ៍ពិសេសបានយល់ស្របលើតម្រូវការចាំបាច់ឲ្យមានកំណែទម្រង់តុលាការថែមទៀត ក្នុងបំណងពង្រឹងឯករាជ្យភាពរបស់តុលាការ”។
បន្ថែមទៅនឹងការជួបពិភាក្សាកាលពីថ្ងៃពុធជាមួយលោក សុខា លោក ស្រី ស្មីត ដែលការបំពេញទស្សនកិច្ចរបស់លោកស្រីបញ្ចប់នៅថ្ងៃនេះ ក៏បានជួបប្រជុំជាមួយលោក សុខ អាន ឧបនាយករដ្ឋមន្ត្រី លោក ស ខេង រដ្ឋមន្ត្រីក្រសួងមហាផ្ទៃ និងលោក ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទផងដែរ។
លោក ផាត សុផានិត មន្ត្រីខុទ្ទកាល័យក្រសួងមហាផ្ទៃ បាននិយាយថា ក្នុងកិច្ចប្រជុំរវាងលោក ខេង និងលោកស្រី ស្មីត នៅក្រសួង អ្នកទាំងពីរបានពិភាក្សាអំពីសេចក្តីព្រាងច្បាប់ទាក់ទិននឹងឧក្រិដ្ឋកម្មអុីនធើណិត ដែលត្រូវបានពណ៌នាដោយមន្ត្រីរដ្ឋាភិបាលម្នាក់កាលពីឆ្នាំមុនថា “មិនមែនជាអាទិភាព”។
ទោះជាយ៉ាងនេះក្តី លោក សុផានិត បាននិយាយថា លោករដ្ឋមន្ត្រីក្រសួងមហាផ្ទៃ បានចាត់ទុកថា ច្បាប់នេះ “សំខាន់ណាស់”។
លោកស្រី ស្មីត បាននិយាយតាមរយៈសារអេឡិចត្រូនិកថា ទន្ទឹមនឹង “ការធានាឲ្យមាននិយតកម្មត្រឹមត្រូវ” នៃអីុធើណិតជាការប្រឈមមួយនោះ សិទ្ធិមូលដ្ឋានចាំបាច់ត្រូវលើកយកមកពិចារណា។
លោកស្រីបានបន្ថែមទៀតថា “ជាការសំខាន់ដែលច្បាប់បែបនេះធានាសេរីភាពនៃការបញ្ចេញមតិដូចមានចែងក្នុងច្បាប់សិទ្ធិមនុស្សអន្តរជាតិ”៕ និត (រាយការណ៍បន្ថែមដោយ Anthony Jensen)