នគរបាលបាននិយាយកាលពីម្សិលមិញថា អ្នកបើកបររថយន្តឈ្នួលអាយុ២៥ឆ្នាំម្នាក់មកពីខេត្តកំពង់ធំត្រូវបានចាប់ខ្លួនកាលពីថ្ងៃសៅរ៍ បន្ទាប់ពីប៉ុនប៉ងរំលោភស្ត្រីទេសចរជនជាតិអង់គ្លេសម្នាក់មិនបានសម្រេច ខណៈដែលបុរសរូបនេះបើករថយន្តទៅខេត្តក្រចេះ។
លោក ហួត លឹមហ៊ាង នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានមានប្រសាសន៍ថា នឹម ប៊ុនថន ត្រូវបានចាប់ខ្លួនបន្ទាប់ពីនគរបាលបានដេញតាមមួយសន្ទុះនៅក្នុងស្រុកឆ្លូងខេត្តក្រចេះ បន្ទាប់ពីស្ត្រីទេសចរអាយុ២៤ឆ្នាំរូបនេះបានប្រាប់នគរបាលថា ជននេះបានព្យាយាមរំលោភនាង។
លោកបានថ្លែងថា ”បន្ទាប់ពីយើងទទួលបានសេចក្តីរាយការណ៍ ខ្ញុំបានបញ្ជាឲ្យកម្លាំងនគរបាលទៅឃាត់រថយន្តឈ្នួលនេះនៅតាមផ្លូវក្នុងស្រុកឆ្លូង ខណៈបុរសនេះបើករថយន្តយ៉ាងលឿនដើម្បីគេចខ្លួន។ យើងបានចាប់ខ្លួនបុរសរូបនេះនៅម៉ោង ៣និង២០នាទីរសៀលថ្ងៃដដែល”។
លោក លឹមហ៊ាង ដែលបានដឹកនាំការស៊ើបអង្កេតបានថ្លែងថា ស្ត្រីរូបនេះបានជិះរថយន្តឈ្នួលរបស់ឈ្មោះ ប៊ុនថន នៅពេលរសៀលក្នុងក្រុងសួង ខេត្តត្បូងឃ្មុំ ហើយជាមនុស្សនៅចុងក្រោយគេក្នុងរថយន្តនេះ។
លោកបានពន្យល់ថា ”មុនពេលហេតុការណ៍កើតឡើង ស្ត្រីជនជាតិអង់គ្លេសរូបនេះបានធ្វើដំណើរពីក្រុងសួងជាមួយអ្នកដំណើរមួយចំនួនទៀត ប៉ុន្តែ អ្នកដំណើរទាំងនោះបានឈប់ហើយចុះទៅផ្ទះរបស់ខ្លួនអស់” តាមផ្លូវចន្លោះក្រុងសួង និងខេត្តក្រចេះ។
យោងតាមមន្ត្រីនគរបាលរូបនេះបានឲ្យដឹងថា ពេលនោះ ប៊ុនថន បានបើករថយន្តរបស់ខ្លួនចូលទៅក្នុងព្រៃតាមផ្លូវជាតិលេខ៧ក្នុងស្រុកចិត្របុរី ប្រហែលជាពាក់កណ្តាលផ្លូវចន្លោះក្រុងទាំងពីរដែលមានមនុស្សច្រើនហើយបានប៉ុនប៉ុងរំលោភនាង។
លោក លឹមហ៊ាង បានថ្លែងថា “នៅពេលបានមកដល់ស្រុកចិត្របុរី ជននេះបានអូសដៃស្ត្រីរូបនេះចូលក្នុងព្រៃចម្ងាយប្រហែល៥០ម៉ែត្រ ហើយបានប៉ុនប៉ងរំលោភនាង។ ជននេះបានបឺតមាត់ និងស្រាតខោអាវនាង ប៉ុន្តែ ជនរងគ្រោះបានតដៃ”។
លោកបានបន្ថែមថា “នាងបានយំអង្វរជនសង្ស័យកុំឲ្យរំលោភនាង ហើយបាននិយាយថា នាងនឹងដកលុយពីម៉ាស៊ីន ATM ឲ្យនៅពេលពួកគេទៅដល់ក្រុង។ជាភ័ព្វសំណាងហើយដែលជនសង្ស័យរូបនេះព្រមជូននាងទៅដល់គោលដៅ ហើយខ្ញុំយល់ថា ជនសង្ស័យគិតថា នាងនឹងមិនប្តឹងខ្លួនឡើយ”។
លោក លឹមហ៊ាង បានថ្លែងថា នៅពេលស្ត្រីរូបនេះមកដល់ខេត្តក្រចេះភ្លាម នាងបានឃើញភោជនីយដ្ឋានមួយមានជនបរទេសផ្សេងទៀត ហើយបានចុះពីលើរថយន្តធ្វើជាទៅដកលុយ ដោយពន្យល់ពីស្ថានភាពរបស់នាងប្រាប់ដល់ភ្ញៀវទេសចរដទៃទៀត។ ភ្ញៀវទេសចរទាំងនោះបានជួយនាង ដើរស្វែងរកនគរបាលមូលដ្ឋាន ហើយ ប៊ុនថន បានគេចខ្លួនបាត់។
លោក លឹមហ៊ាង បន្ថែមថា “នៅពេលនាងបានមកដល់ក្រុង នាងបានដាក់ពាក្យបណ្តឹងទៅនគរបាលទេសចរដែលបានជូនដំណឹងមកការិយាល័យរបស់ខ្ញុំ។ បុរសរូបនេះបានសារភាពរួចហើយ។ នៅថ្ងៃស្អែកយើងនឹងបញ្ជូនជននេះទៅសាលាដំបូងខេត្តដើម្បីធ្វើការចោទប្រកាន់”៕សារុន