អតីតអគ្គកុងស៊ុលរងប្រចាំក្រុងហូជីមិញដែលតុលាការចោទប្រកាន់ពីបទក្លែងឯកសារ ដើម្បីអនុញ្ញាតឲ្យឈើប្រណីតនាំចេញទៅប្រទេសវៀតណាម ជាថ្មីម្តងទៀតបានបដិសេធចំពោះការចោទប្រកាន់នៅក្នុងសវនាការកាលពីថ្ងៃច័ន្ទ ទោះបីជាមានការបង្ហាញកំណត់ទូតដែលលោកបានចេញឲ្យដោយមិនត្រឹមត្រូវក៏ដោយ។
លោក តាំង សុខងី អាយុ ៣៨ឆ្នាំ ត្រូវបានចាប់ខ្លួនកាលពីខែមិថុនា ឆ្នាំមុននៅក្រុងភ្នំពេញ ពីបទប្រើឯកសារក្លែងក្លាយក្នុងការអនុញ្ញាតឲ្យក្រុមហ៊ុនខ្មែរនាំចេញឈើប្រណីតប្រហែល ៣០០.០០០ម៉ែត្រគូបពីប្រទេសកម្ពុជាទៅប្រទេសវៀតណាម។
ក្នុងករណីមួយ អ្នកតំណាងម្នាក់នៃក្រុមហ៊ុន ហេង លី បានផ្តល់ឲ្យលោក សុខងី នូវអ្វីជាការអះអាងថាជាលិខិតក្រសួងពាណិជ្ជកម្មដែលអនុញ្ញាតឲ្យនាំឈើ១.០០០ម៉ែត្រគូបចេញទៅវៀតណាម ដោយលោក សុខងី ចេញកំណត់ទូតយល់ព្រមចំពោះការនាំចេញដោយគ្មានការពិនិត្យភាពត្រឹមត្រូវនៃលិខិតឡើយ។
លោក សុខងី បានអះអាងនៅថ្ងៃទីមួយនៃសវនាការកាលពីខែសីហាថា លោកបានពិនិត្យភាពពិតប្រាកដជាមួយក្រសួងពាណិជ្ជកម្ម ហើយគេបានបង្ហាញឲ្យលោកមើលលិខិតពេលសវនាការនៅតុលាការក្រុងភ្នំពេញ រួមជាមួយនឹងកំណត់ទូតអនុញ្ញាតផងដែរ។
ចៅក្រម វែង ហួត បានសួរថា “នេះជាឯកសារដែលលោកបានទទួល មែនទេ?”
លោក សុខងី បានឆ្លើយថា “បាទ ខ្ញុំបានទទួល”។
ចៅក្រមបានសួរថា “តើលោកបានទទួលលិខិតពីអ្នកណា?”
លោក សុខងី បានឆ្លើយដោយសំដៅទៅលើអ្នកតំណាងនៃក្រុមហ៊ុន ហេង លី ថា”ខ្ញុំបានទទួលលិខិតពីលោក ឡា អន”។
តុលាការក៏បានបង្ហាញសេចក្តីជូនដំណឹង៦ច្បាប់ផ្សេងទៀតដែលយល់ព្រមឲ្យនាំឈើចេញ ដែលត្រូវគេបញ្ជូនពីគណៈរដ្ឋមន្ត្រីទៅក្រុងហូជីមិញ។ សេចក្តីជូនដំណឹងនីមួយៗមានកំណត់ទូតជាច្រើនពីលោក សុខងី ដែលភ្ជាប់នឹងការអនុញ្ញាតឲ្យនាំចេញ។
បន្ទាប់មក ចៅក្រម ហួត បានសួរលោក សុខងី ថាហេតុអ្វីលោកបានចេញកំណត់ទូតលើសពីមួយក្នុងសេចក្តីជូនដំណឹងមួយ ដោយមួយលើកៗបែងចែកចំនួនអនុញ្ញាតនាំចេញសរុបទៅជាផ្នែកតូចៗ ហើយក៏ផ្តល់លិខិតអនុញ្ញាតដល់ក្រុមហ៊ុនដ៏ច្រើន។
លោក សុខងី បានពន្យល់ថា អ្នកនាំចេញឈើមិនអាចលក់ចំនួនឈើទាំងអស់ដែលអនុញ្ញាតម្តង ដូច្នេះពួកគេបានស្នើឲ្យលោកចេញកំណត់ទូតដាច់ដោយឡែកពីគ្នាដោយអនុញ្ញាតឲ្យមានចំនួនតូចៗ ដើម្បីឆ្លងកាត់ទៅប្រទេសវៀតណាម។
លោក សុខងី បាននិយាយថា “អាជ្ញាប័ណ្ណត្រូវលក់ចំនួននេះ ប៉ុន្តែអ្នកទិញមិនមានលទ្ធភាព[ទិញចំនួននោះទេ] ដូច្នេះគេស្នើសុំបែងចែកវា ដើម្បីលក់ឲ្យក្រុមហ៊ុនទាំងនោះ”។
ចៅក្រមហួត បានឆ្លើយតបថា “វាប្រឆាំងនឹងសេចក្តីជូនដំណឹង”។
លោក ខាំ សុផារី ព្រះរាជអាជ្ញារង បានប្រាប់តុលាការថា មានភ័ស្តុតាងគ្រប់គ្រាន់ដើម្បីបង្ហាញថា លោក សុខងី មានទោស។
លោក សុផារី បាននិយាយថា “ផ្អែកតាមការត្រួតពិនិត្យភ័ស្តុតាង និងអង្គហេតុដែលបានរៀបរាប់មកហើយ ព្រះរាជអាជ្ញាមានភ័ស្តុតាងគ្រប់គ្រាន់ថា តាំង សុខងី មានពិរុទ្ធពីបទក្លែងឯកសារសាធារណៈ”។
លោកស្រី មួង ធនលាភី មេធាវីលោក សុខងី បាននិយាយថា តុលាការគ្រាន់តែបានបង្ហាញថា កូនក្តីរបស់លោកស្រីបានយកឯកសាររដ្ឋាភិបាល ហើយបកប្រែទៅជាភាសាវៀតណាម ដើម្បីអនុញ្ញាតឲ្យនាំឈើឆ្លងកាត់តាមព្រំដែន។
លោកស្រីបាននិយាយថា ការនេះមិនអាចជាការក្លែងបន្លំទេ ព្រោះថាលោក សុខងី បានពិនិត្យឃើញថា សេចក្តីជូនដំណឹង គឺស្របច្បាប់ ហើយបន្ទាប់មកធ្វើការងាររបស់លោកក្នុងនាមជាមន្ត្រីកុងស៊ុលប៉ុណ្ណោះ។
លោកស្រីមេធាវីបាននិយាយថា “ប្រសិនបើកូនក្តីខ្ញុំកែសេចក្តីជូនដំណឹង បន្ថែមអត្ថន័យទៅនឹងសេចក្តីជូនដំណឹង កែក្នុងហ្វូតូសប ឬក្លែងហត្ថលេខា អ៊ីចឹងទើបជាអ្វីដែលកូនក្តីខ្ញុំក្លែង។ តាមពិត មិនមានអ្វីក្លែងទេ”។
សាលក្រមនឹងប្រកាសនៅថ្ងៃទី៣០ ខែតុលានេះ៕ រើន