មន្ត្រីម្នាក់បាននិយាយកាលពីម្សិលមិញថា មនុស្សពីរនាក់ដែល បានប៉ះទង្គិចគ្នាជាមួយមន្ត្រីរដ្ឋបាលព្រៃឈើ បន្ទាប់ ពីមន្ត្រីទាំងនោះបានបណ្តេញអ្នកភូមិជាង៥០គ្រួសារក្នុងខេត្តសៀមរាបកាលពីថ្ងៃអង្គារ ត្រូវបានចោទប្រកាន់ពីបទល្មើសព្រៃឈើ ហើយត្រូវបានចាប់ដាក់ពន្ធនាគារ។
លោក ទៀ គឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាបបានមានប្រសាសន៍ថា មន្ត្រីរបស់លោកបានទៅពិនិត្យមើលការបណ្តេញអ្នកភូមិជាច្រើនគ្រួសារចេញពីចម្ការរបស់ខ្លួននៅក្នុងឃុំពាក់ស្នែង ស្រុក អង្គរធំ កាលពីព្រឹកថ្ងៃអង្គារ។ លោកបានលើកឡើងថា នគរបាល និងកងរាជអាវុធហត្ថក៏ បានជួយបណ្តេញសហគមន៍នេះដែរ ដែលលោកចោទប្រកាន់ថា បានមកតាំងទីលំនៅអនាធិបតេយ្យលើដីរដ្ឋទំហំប្រហែល១០០ហិកតា ហើយបានរានព្រៃដើម្បីសាងសង់លំនៅដ្ឋានរបស់ខ្លួន។
លោបានថ្លែងថា “នៅវេលាព្រឹក បន្ទាប់ពីយើងបានបញ្ចប់ការបណ្តេញអ្នកភូមិនិងរុះរើផ្ទះរបស់ពួកគាត់មក អ្នកភូមិមួយក្រុមបានយកម៉ូតូរបស់ខ្លួនមករាំងផ្លូវរថយន្តធុនធំរបស់យើង”។
លោកបានថ្លែងបន្តថា “នៅពេលយើងសួរពួកគាត់ថា តើហេតុអ្វីបានជាពួកគាត់រារាំងពួកយើង ពួកគាត់បានស្រែកដាក់ពួកយើង ហើយបានកាន់កំាបិតផ្គាក់ និងដំបងធំៗ ហើយចង់វាយមកលើពួកយើងទៀត។ខ្ញុំគិតថា ពួកគាត់មានកំហឹង និងចង់បង្ហាញប្រាប់ពួកយើងនូវកំហឹងរបស់ខ្លួន ហើយបន្ទាប់មកមានការប៉ះទង្គិចគ្នាមួយប្រាវ។
លោក គឹមសុទ្ធ បានមានប្រសាសន៍ថា ការតវ៉ានេះដឹកនាំដោយមនុស្សបីនាក់ ហើយថា អាជ្ញាធរ បានចាប់ខ្លួនពួកគាត់ពីរនាក់ឈ្មោះ កី ដឹក អាយុ៤៧ ឆ្នាំជាកសិករ និង ពុធ គូចៀម អាយុ២៧ឆ្នាំ ចំណែកអ្នកទី៣បានរត់គេចខ្លួន។
លោកបានថ្លែងថា អ្នកស្រី ដឹក និងលោក គូចៀម ដែលបានធ្វើសកម្មភាពយ៉ាងគឃ្លើនអំឡុងការតវ៉ានោះ ត្រូវបានបញ្ជូនទៅតុលាការ រួចត្រូវបានចោទប្រកាន់ពីបទរានដីព្រៃរបស់រដ្ឋតាមច្បាប់ព្រៃឈើ ហើយត្រូវបានបញ្ជូនទៅពន្ធនាគារខេត្ត។
លោក គឹមសុទ្ធ បានបន្ថែមថា ដំបូងអាជ្ញាធរ បានបង្គាប់ឲ្យគ្រួសារទាំងនេះចាកចេញពីចម្ការ របស់ខ្លួនក្នុងឃុំពាក់ស្នែងប្រហែល ពីរខែមុន។
លោកបានលើកឡើងថា “មុនពេលយើងបណ្តេញ ពួកគាត់ចេញ យើងបានជូនដំណឹងដល់ពួកគាត់មួយសប្តាហ៍មុនថា តំបន់ដែលពួកគាត់រស់នៅ និងធ្វើចម្ការនេះគឺជាដីរបស់រដ្ឋ ហើយថា ការរានដីរបស់រដ្ឋគឺខុសច្បាប់”។
លោក ចាន់ ជួន អាយុ៤៣ឆ្នាំ ជាកសិករដាំចេក និងអំពៅ បាននិយាយថា គាត់បានរស់នៅក្នុងតំបន់នេះរយៈពេល១៣ឆ្នាំមកហើយ មុនពេលអាជ្ញាធរដុតបំផ្លាញដំណាំរបស់គាត់នៅសប្តាហ៍នេះ ហើយការតវ៉ានេះមិនដែលមានបំណងបង្កហិង្សាឡើយ។
លោកបានថ្លែងថា “យើងទៅរារាំងពួក គេពីព្រោះយើងចង់សុំឲ្យពួកគេស្វែងរកដំណោះស្រាយសមស្រប ឬរកដីផ្សេងសម្រាប់ពួកយើង។ យើងប្រដាប់ដោយកាំបិតផ្គាក់ និងដំបងធំៗ ប៉ុន្តែ យើងគ្មានបំណងវាយប្រហារពួកគេទេ”៕ សារុន